#4 石門

你對石門嘅印象係點嘅呢？係寧靜嘅河畔公園同住宅，定係工廠大廈，抑或人來人往嘅商業區？石門呢度三樣都有，但係冇傳統工業區嘅紛亂，反而出奇地融洽共存，近年更成為居民新去處。

沙田新市鎮最早嘅規劃中，城門河東岸以小瀝源路為盡頭。未規劃白石角同馬鞍山兩個「擴展區」前，石門位處市鎮邊陲地帶，後來先劃定大涌橋路以南為工業區；以北係住宅區 (濱景花園一帶)。80-90年代落成嘅住宅區沿河而建，有幽靜嘅河畔長廊；大涌橋路另一邊係工業區，工廈群延伸至石門站，係沙田4個輕工業區之一；而馬鐵站嘅對面係千禧後發展嘅碩門邨。壁壘分明嘅設計保留咗空間感，因此工業區並無對居民生活質素造成太大影響。

石門工業區近年已悄悄步入轉型過程：由傳統工業區轉變為側重商業。京瑞廣場為石門居民提供消費新選擇，唔再完全依賴第一城。更重要嘅係打破咗區內嘅隔膜，對安景街3個屋苑嘅居民而言，大涌橋路嘅另一邊唔再係毫無關係嘅工業區，變成居民日常生活同消閒不可或缺嘅一部分。京瑞廣場容納咗無數街坊小店同食肆，連鄰區居民都慕名而來，同時引起交通嘅轉變。新辦小巴路線接駁其他市民前來石門，例如65M往小瀝源，806M往白石角。睇見車站廣場嘅busking同圍觀嘅大批市民，不禁慨嘆十年間變化之大。

小編會以「麻雀雖小五臟俱全」形容石門，工業商業住宅休憩共存而不雜亂，自成一角，20分鐘由頭行到尾嘅小社區，的確有其迷人之處。