#6 佐敦與沙田 連繫60年

70年代初沙田開始發展，公共交通如雨後春筍般湧現。你又有冇諗過，喺新市鎮發展之前，已經有巴士線專門服務沙田呢？

早喺1954年，九巴由15線(文錦渡至佐敦) 分拆出15B，來往沙田至佐敦道碼頭(今高鐵西九龍站)，行經大埔道，可謂沙田區巴士線嘅鼻祖。最初15B只於假日服務(有指為農曆年假)，疏導前往沙田郊遊嘅人流。數年後增設平日服務並延長到火炭何東樓，即係今日嘅駿景園。往後幾年15B曾經斷斷續續咁提供過幾年嘅全日服務，直至六七暴動就停止服務。

直至1973年，政府宣布發展沙田，九巴著手重組新界巴士路線編號，當時19A(上水至佐敦) 分拆出71。無獨有偶，新線同當年15B一樣，都係來往沙田至佐敦道碼頭。由當時開始，71已經見證著沙田嘅蓬勃發展。1987年，71改名，成為今日大家熟悉，服務沙田數十年嘅老牌路線81。