#1 美孚大圍 殊途同歸

呢個新系列主要係同大家介紹沙田交通嘅演變，而今日嘅主題就係大圍往返美孚嘅巴士線。相信大圍嘅街坊會記得以前46X同86B同樣來往顯徑同美孚，但途經地區完全唔同。點解會形成咁嘅情況呢？

1988年，九巴為配合顯徑邨入伙，開辦86B來往美孚，取道大埔道。當時大埔道仍然係沙田來往九龍西以至新界西其中一條主幹道路。1990年，城門隧道通車，九巴將原本行經大埔道去荃灣嘅48A取消，以46X取代，後來延長至美孚。城隧嘅出現分流咗唔少大埔道嘅巴士線，令新界東西嘅交流與日俱增。

直至2008年，青沙公路(長沙灣至沙田段)通車，新公路令大埔道嘅重要性減低。結果2012年，九巴開辦286X取代86B，提供全日青沙公路特快服務，而新線途經美孚附近嘅饒宗頤文化館，方便原有美孚嘅乘客。

隨著公路網日漸完善，來往同一目的地就有咗唔同嘅方法，巴士線亦隨之演變。適當地運用各條道路嘅優點，就能夠為市民提供良好嘅交通服務。