#9 沙燕橋 (沙田鄉事會路)

嚟到城門河中游嘅沙燕橋。此名源自沙田嘅「沙燕」少棒隊，由沙田基覺小學喺1982年成立。當年嘅成員喺老師眼中都係不成氣候，但係經過訓練後實力大增。1983年出戰香港少棒聯盟公開賽，結果擊敗日本嘅大熱隊伍，大獲全勝，轟動全港。球隊點解叫沙燕，據校長所講，除咗突顯隊伍嘅英姿以外，仲因為沙角邨有沙燕樓。後來此橋落成，區議會決定以「沙燕」命名，紀念呢個振奮人心嘅事蹟。沙燕橋連接沙田市中心及沙田圍，車輛、行人及單車駱驛不絕 ，係沙田其中一條最繁忙嘅天橋，堪稱區內交通網絡嘅心臟。

(拍攝地點: 城門河畔，面向沙燕橋及瀝源邨)