#5 沙田鐵路 未有建造 ?! (下)

上回我哋講到沙中綫嘅雛形——沙田綫早於1967年已經出現喺政府嘅地鐵計劃。但係後來政府調低預計人口數字，喺1970年嘅集體運輸計劃中取消咗沙田新市鎮嘅路段。

當時沙田已開始發展，日後仍然需要有鐵路連接。因此1976年提出興建沙田環狀綫(Sha Tin Loop)。同1967年嘅計劃唔同，有別於新增一條全新鐵路，沙田環狀綫係同九廣鐵路直通運行嘅支線，並以捷運(地鐵)形式運作。值得一提嘅係，沙田環狀綫並唔係”環狀”。英文名稱當中嘅”Loop”，其實係指由主線分離，行經其他地區，再併入主線嘅運作模式。而喺沙田環狀綫嚟講，就係喺馬場站之後離開主線，經過禾輋，城河東各站，再連接九鐵路軌往紅磡或尖沙咀。

雖然最終都無起到環狀綫，但係沙田區新鐵路嘅研究從來冇停止過。以上嘅計劃後來成為1981年馬鞍山鐵路輕鐵研究方案嘅一部分，到1993年再提出新版本嘅東九龍綫(馬鞍山至九龍機鐵站)等4個方案。馬鐵通車嘅16年後，終於延伸到九龍。喺不久嘅將來，當屯馬綫全線通車，沙田將圓鐵路直通尖沙咀之夢。然而，屯馬綫接連出現超支同安全問題，恐怕呢段未竟之鐵路仍然有好長嘅路要行。