#12 雙子橋 (NF224,NF267)

城門河上最受跑友同單車友歡迎嘅打卡景點，雙子橋肯定佔一席位，而且係踩單車往返馬鞍山同大埔嘅必經之路。呢兩條並排嘅橋樑，其實冇正式名稱 (只有編號)，但係街坊都叫佢「孖橋」或者「雙子橋」。

孖橋分為南北兩條，亞公角填海工程完成之後，1986年興建橋樑連接對岸嘅污水處理廠同馬場，就係而家嘅南橋。同年水廠街與馬場一段城門河單車徑駁通，但係因為對岸仍然一片荒蕪，南橋出入口以鐵絲網圍封，不准進入。據聞曾有單車友為咗行呢條捷徑，連人帶車越過鐵絲網。正常嚟講，當時由大埔踩單車去馬鞍山或西貢等地，要繞道至禾輋，先可以取道翠榕橋過河。

富安花園同恆安邨落成不久後，1988年南橋正式開放予公眾使用，大幅縮短踩單車往返馬鞍山同大埔嘅時間。1993年北橋先起好，橋下其實係水管，連接亞公角至污水處理廠，所以先特登起多條橋。雙子橋空間寬闊，附近係單車公園。橋上行人能遠眺馬鞍山同吐露港，而且有座椅供行人使用，因此成為跑友同單車友休息嘅中途站。

(拍攝地點: 雙子橋東岸望向污水廠)