#2 消失道路 沙田繞道

觀塘繞道，中環灣仔繞道就聽得多啦，你有冇諗過以前有沙田繞道？

1970年代，政府開始發展沙田新市鎮，大埔公路逐漸難以應付龐大車流量。於是政府喺1974年興建沙田繞道，配合瀝源邨同沙田市中心發展。沙田繞道係新市鎮早期其中一條最重要嘅公路。當時唔少沙田墟(現今沙田市中心)嘅巴士線，例如81及89，都會駛經沙田繞道。巴士由沙田墟總站開出後，便直往繞道前往大埔公路或獅隧出九龍。

1980年，大埔公路擴闊為4線雙向行車，足夠容納更大車流量，於是政府拆卸沙田鄉事會路至沙田正街一段沙田繞道。後來建成沙田公園。公園內一段繞道已無跡可尋，對出嘅宜正里以前可能係沙田繞道嘅一部分。至於市中心以北一段，則改稱源禾路及禾輋街。而禾輋街亦再不能直通大埔公路，但仍然留有一小段支路，成為沙田繞道曾經存在嘅印記。