唔知大家有冇見過8字頭，有3位數字嘅巴士線呢？其實呢啲係沙田馬場路線，接載馬迷來往馬場。

沙田馬場早喺1978年啟用，當時就安排咗巴士線往返各區。絕大部份路線都係散場服務，喺賽事完結後開出，而少部分路線更有入場班次。為咗提供更舒適嘅服務，曾設有預售車飛，只要喺各區投注站買飛，就可以優先上車前去馬場。沙田馬場巴士線全盛時期有多達13條，服務範圍遍佈全港各區。喺政府頒布嘅「路線表令」中，馬場路線有自己嘅收費標準，收費特別高，而且無長者/殘疾人士$2優惠。相反，東鐵馬場站就有優惠。結果，部分馬場線客量下跌，2018年更有4條被取消。

馬場線嘅客源除咗馬迷之外，仲有巴士迷。由於呢啲路線嘅派車通常較為獨特，因此往往吸引大量巴士迷乘搭，每逢周末亦會去馬場影巴士，令沙田馬場成為巴士迷文化重要嘅一環。