#3 兩代空港 一程直航

直達各區嘅巴士線係機場不可或缺嘅對外交通，其中圓洲角就係沙田區機場線嘅重地，無論係去啟德定赤鱲角，都曾經有巴士線直達。

1983年，九巴開辦85A，來往圓洲角及九龍城碼頭。除咗接駁渡輪之外，仲肩負住連繫機場嘅重任。根據街坊憶述，當年沙田居民主要乘搭85, 85A, 85B, 85C(已取消) 往來啟德機場。喺九龍城迴旋處附近落車後，穿過隧道就到達機場，可謂相當便捷。啟德機場客運同貨運量位居世界前列，但係座落香港市區核心，曾經有全球十大危險機場嘅稱號。為咗安全同其他原因，香港機場喺1998年搬遷往赤鱲角，至此85A連接機場嘅任務正式結束。

政府嘅新機場運輸研究建議開辦數條機場巴士線直達各區，其中包括A41。無獨有偶，新機場線同樣以圓洲角為總站。2001年，85A及A41一同遷往新落成嘅愉翠苑巴士總站。自此之後A41就再無大改動，為圓洲角居民延續自80年代起無間斷嘅機場巴士服務。