#11 錦龍橋 (沙田路)

相比城門河其他較著名嘅橋樑，唔少居民都對錦龍橋呢個名感到陌生。

錦龍橋係沙田路嘅高架路段，整段公路連接獅子山隧道公路，橫跨城門河，到馬場一帶匯入大埔公路，方便車輛由九龍經獅隧直入大埔及北區，毋須繞經沙田市內街。1984年工商日報有關於橋樑即將通車嘅報導，引述區議員指出，城門河龍舟賽事以新橋嘅位置為終點，因此命名為錦龍橋，取「賽龍奪錦」之意。報導亦提及其他橋樑嘅命名來源，的確別具心思。

沙田路構思源起70年代沙田新市鎮開始發展，瀝源邨及禾輋邨等大型公共屋邨相繼落成，區內人口急升引致大埔公路不勝負荷。同時政府計劃發展大埔，於是規劃新公路直接連接獅隧及大埔公路，日後再通往吐露港公路直入大埔，減輕大埔公路近瀝源邨一段交通擠塞。從今日角度睇，城門河各橋樑嘅規劃成功分流各地車流，但大埔公路沙田段隨著市鎮發展再度擠塞，需要繼續思考解決方法。

(拍攝地點: 城門河畔近第一城)