#0 瀝源九約竹枝詞 - 火炭

小編平時好鍾意探索地區歷史，之前研究沙田區古代村落嘅時候，睇到一篇《瀝源九約竹枝詞》，係百幾年前住喺沙田嘅兩位私塾教師所寫，佢哋一邊遊覧，一邊記載沙田以至全香港嘅風光。

“瀝源洞裏樂聳融　人住同安化日中

聞道約中多好景　拾年一醮舞金龍”

詞中包含好多舊時村落嘅名稱。小編仿效作者親身探索沙田，以現代嘅角度重新體驗呢篇詞。作者筆下嘅火炭寧靜舒適，海邊嘅村落以捕魚維生。今日發展成新市鎮，滄海桑田令人感歎。

“麵房火炭自相連　龜地形成極自然

尚有船埋落路下　擔魚男女不停肩”

以前覺得火炭只係普通嘅工業區，歷史應該已被一掃而空？事實並非如此。以往火炭有唔少村落，喺新市鎮發展時已經陸續搬遷甚至清拆。不過新發展區就用咗舊村名作為路名，以作紀念。

“河東河瀝背相通　雲出寒山石徑風

黃竹洋風山尾過 石寮凹背路西東”

步入火炭，小編留意到路名同政府設施仲見到當年遺留落嚟嘅痕跡。麵房街、山尾街、長瀝尾街等等，原來都係以前喺火炭河谷以至山上嘅村落名稱，今日已經荒廢哂，都喺詞中一一記載。漫步社區除咗可以發掘有趣嘅歷史，仲會有所體會。你又有冇對自己嘅社區新嘅感受呢？