#2 新翠邨

你覺得而家嘅商場係點嘅呢？好似新城市廣場咁冰冷，抑或係唔夠座位都唔多個？第一次去新翠邨嘅時候，先發現商場有咁多可能性。

新翠商場嘅小池塘同園林設計，印證住商場設計貼近自然嘅一面。透明天花嘅採光方式，加上各類植物，令室內地方都綠意盎然。正因為環境清幽，商場中央成為街坊打躉吹水之處。小編眼中嘅新翠邨係旺中帶靜嘅社區，幽靜之餘交通都好方便。除咗鄰近大圍中心地帶同大圍火車站，而且毗鄰通往獅子山隧道嘅紅梅谷路。

紅梅谷路天橋落成之前，只能夠經曾大屋上獅隧。當年翠田街嘅規劃係可以同紅梅谷路交匯，再穿入隆亨邨內，喺道路盡頭設有隆亨巴士總站。

後來實際建造嘅時候取消咗交匯設計，翠田街就改咗喺紅梅谷路橋底設置迴圈，並且改設新翠巴士總站，亦都係新翠總站點解黐住隆亨嘅原因。不過隆亨邨嘅發展，又係另一個故事啦。