#13 大老山公路

呢個系列話咁快就做到第5個月，我哋逐一介紹城門河上嘅主要橋樑，從上游嘅大圍行到下游嘅亞公角，今次嚟到位處出海口嘅大老山公路T6橋，係連接亞公角近單車公園至馬料水嘅主幹道。

T6橋並未如城門河其他主要橋樑般冠上名稱，只得一個編號，係大老山公路嘅一部分，於1991年與大老山隧道一同落成。當年規劃時考慮到新界北部發展，政府將石門至亞公角一段馬鞍山路改為快速公路，併入大老山公路，方便車輛出隧道後直入新界北。同時為照顧亞公角漁民新村，增建亞公角街作為輔助道路。乘搭雙層巴士駛經此橋，向北能遠望吐露港廣闊嘅景色，向南可觀賞城門河全景。然而馬料水一帶或將填海，為科學園「提供擴建土地」，將來可能面目全非。此外，新界北部進一步發展，政府正研究將T6橋由雙線雙程擴建成三線雙程，容納日益增長的人口和交通需求。

(拍攝地點: 馬鞍山海濱長廊終點，近錦泰苑)