80年代新市鎮發展迅速，政府喺火炭規劃中等密度住宅區，因而開發火炭工業區同落路下之間嘅山坡，即樂林路及樂蓮徑一帶。作為新發展區嘅盡頭，政府闢建樂信徑連接新區及山下嘅何東樓村 (今駿景園)，作為該村主要對外道路，而樂景街當時尚未落成。1983年新發展區入伙後，九巴88K線 (顯田 - 何東樓) 繞經樂林路，途經松頭下路連接工業區，再取道火炭路出沙田。唔少網友都估唔到，陡峭嘅樂林路以前竟然有巴士 (不過係單層巴士)，而且今日嘅88K根本同工業區無關，走線非常之唔同。

時至1985年，九鐵何東樓車廠上蓋物業銀禧花園落成，火炭車站以及車廠上蓋平台嘅樂景街通車，同時令何東樓出沙田有咗更直接嘅道路。適逢沙田區內巴士線重組實施不久，88K此時計劃改經樂景街直出源禾路，同時九鐵接駁巴士K11 (火炭車站 - 沙田第一城) 亦考慮改用新路。翻查區議會文件發現翌年2月相關討論中，有議員反對88K不經火炭工業區。1986年11月，88K正式改用樂景街，停靠銀禧花園及火炭車站，告別短暫服務嘅樂林路住宅區、工業區及銀禧體育中心 (今體育學院)。從此山上一帶屋苑公共交通只餘小巴。

往後九鐵持續發展車廠上蓋，1996年駿景園落成後，九巴將何東樓總站改稱駿景園。何東樓嘅名稱亦不斷褪色，逐漸從居民日常生活中消失，今日除咗港鐵車廠外，再無建築物以此命名。