#7 三黑四紅路線介紹: 81C

81C早於1989年開辦，係政府放寬公共交通協調政策之後，再有巴士線來往新界至尖沙咀。

90至00年代，九巴沙田車廠經常將最新款巴士派到包括81C在內嘅7條路線。(另外6條為87D, 281A, 170, 182, 680, 681)巴士迷稱之為 ’三黑四紅’。黑，代表路線牌以黑色為底色嘅路線，紅，就係路線牌底色係紅色嘅過海巴士。派車嘅新穎程度經常引起熱議。馬鐵通車前係81C嘅黃金時代。據說當年上午繁忙時間到錦鞍苑已告客滿。九巴除咗加派巴士喺中途站疏導乘客，亦有平日上午同假日中午特快班次。1993年增設上午沙田圍特別班，後來改稱81P。

然而好景不常，2003年馬鐵通車前夕，運輸署建議削減多條沙田區巴士線，其中包括取消81C，但係由於居民反對而擱置。往後嘅日子81C班次不斷削減，同時，由於81C唔經低排放區，10幾年來都主要使用同一車型。

- 2012年，上午班次分拆為281B及281X，為馬鞍山海旁居民提供特快服務，然而亦屢次被減班。

- 2014年，287X開辦，搶走唔少81C喺佐敦嘅客源。

- 2019年，81C假日中午特快班次無聲無息地消失。

然而，繁忙時間客量仍然不俗，經常頂閘。

回望由最初客似雲來，到之後馬鐵通車，以至287X開辦之時，81C已失去太多求變嘅機會。展望將來，屯馬線直通尖東，81C將迎來新一波挑戰。到時仲有冇可能生存落去呢？我哋下次再講。