記得睇過個post，網民稱公屋調遷有幾個選擇，其中一個係新田圍邨。留言一面倒勸告千祈唔好揀新田圍，原因不外乎係生活配套不足，以及交通問題。睇嚟交通不便嘅形象深入民心。特別係沙田大多數屋邨有全日巴士線去新界西，唯獨新田圍冇。但係原來1980年代曾經兩度有巴士線去荃灣葵涌？

80年代荃灣及葵涌工業發展蓬勃，成為香港工業重心之一，提供就業機會；同時沙田作為新興新市鎮，人口大量遷入，來往兩區嘅交通需求由此衍生。1984年8月九巴開辦48A (新田圍 - 荃灣碼頭 經葵涌)，取道大埔道及呈祥道往返，15分鐘一班車。由於行經狹窄多彎嘅大埔道，只能使用短身巴士行走。翻查資料，此線屬於沙田非常早期嘅巴士，開辦時全區只有約二十條對外路線。交通網絡迅速擴展下，同年9月為騰出總站空間開辦87B (新田圍 - 大角咀碼頭)，48A即縮短至秦石，結束服務新田圍邨短短一個月嘅「過渡期」。

沙田往返荃葵嘅客量持續上升，同樣行經大埔道嘅九巴48 (禾輋 - 荃灣碼頭) 改經獅子山隧道，以便改用長身12米雙層取代短車，同時於獅隧公路近新田圍增設分站。以今日角度睇，沙田行獅子山隧道去新界西實在太匪夷所思，但係當時城門隧道仍未落成，往返新界東西遠遠不及今日咁快捷。

1990年城門隧道通車，過時嘅48A, 48雙雙取消，去舊迎新嘅係城隧特快路線。前者由45X, 46X取代 (服務秦石、大圍、顯徑)，後者由47X, 48X取代 (服務禾輋、市中心、沙田圍)。然而4條新線都忽略咗新田圍，或許係因為總站唔夠位 ，畢竟87B全日10分鐘一班，頗為頻密。為彌補受影響居民，同年年政府曾招標小巴線往返新田圍至荃灣碼頭，大致按48A行走，可惜因流標無疾而終。結果新田圍廿幾年以來都再冇公共交通去新界西。歷經多年爭取，直至2018年開辦 47X特別班 (新田圍 - 葵盛東)，只於上午繁時單向服務，失落咗30年嘅新田圍交通先有返些少改進。