唔知你有冇留意過一啲喺馬鞍山嘅路牌，恆安邨嘅英文名間唔中有修改過嘅痕跡呢？呢塊喺耀安邨巴士站出面嘅路牌，Heng On嘅 ”e” 明顯有遮蓋嘅痕跡。翻查返Google Map街景，發現2009年嗰陣時呢塊路牌原來係寫 “a” 字嘅Hang On ?! 到底係路牌本身出錯，定係有其他原因呢？

其實恆安邨早期的確係譯做 Hang On ，就好似附近所有「恆」字開頭嘅街名一樣，例如恆康街 Hang Hong Street。後來邨名改咗做Heng On，而千禧後落成嘅恆安站都係跟隨屋邨嘅英文名。呢塊存在咗好多年嘅路牌本身沿用舊名，不過唔知點解至少到2011年，即係廿幾年後先修正，而且修改過嘅路牌唔止一塊。但係點解要改名呢？有一種講法係Hang On英文有「等陣」嘅意思，可能為咗避免混淆而改名。唔熟路又唔識中文嘅駕駛者見到路牌上寫住Hang On，可能真係會以為要等陣 (?)