新巴將併入城巴 回顧新巴在沙田的服務擴展

創立25年嘅新巴，當年因接替不獲延專營權嘅中巴而成立，現已踏入最後一個月，1/7起併入城巴，完成歷史任務，兩年內完成更換車身顏色。我哋一齊回顧新巴開辦新線進軍沙田嘅歷史。

馬鞍山至柴灣嘅682最初由九巴建議開辦，後來運輸署將此線公開招標，並由新巴投得。2000年開辦時提供上下午繁忙時間服務，係新巴喺沙田嘅第一條獨營路線，短短3個月後更擴展至全日雙向服務。此後多年不斷新增分支，擴張版圖。例如682A服務大水坑海旁，682B成為水泉澳邨落成第一批開荒牛路線，再增設大幅改經西隧嘅988。隷屬同一間母公司嘅城巴近年投得686、989，新巴城巴自此包攬整個沙田區往返東區嘅巴士服務。

另一較為創新嘅路線非798莫屬。2000年起將軍澳已有地區意見爭取巴士線往返沙田，然而運輸署及九巴一直以觀塘道轉乘為由拒絕。十年後，新巴2010年增設798直接往返將軍澳至沙田，免卻於觀塘市中心轉乘之苦，更直達沙田市中心，客似雲來。798多年以來都係沙田往返將軍澳嘅主要路線，直至2022年九巴投得90、96、97經營權，覆蓋沙田及將軍澳更多地區，呢個局面先被打破。

展望將來，與馬鞍山連成一線嘅十四鄉將迎來5條招標路線，營辦商有待遴選。九巴則已增設299X去石門轉乘對外路線嘅優惠，準備迎戰。合併後嘅城巴會否再喺新界東擴展業務，一決高下？