最得人驚嘅車站可能係大學站，弧形嘅月台令列車同月台之間嘅空隙甚闊，細個去中大都好驚叉錯腳飛落路軌。點解大學站嘅月台同路軌都係咁彎彎曲曲呢？小編揾到一份舊地圖同航拍照片，同大家一齊解開大學站急彎之謎。

1983年大學站剛剛完成火車電氣化工程。當時馬料水仲未填海，月台同路軌因此冇拉直，沿用原先依海岸而建嘅位置。呢幅地圖亦顯示咗舊馬料水碼頭大約位於吐露港公路近澤祥街橋底，碼頭有航線連接烏溪沙以至新界東北離島，至於車站往返碼頭嘅步程亦比現時近。1984年馬料水填海計劃正式實施，將海岸線由火車軌推前到今日嘅狀態，碼頭重置到現址。從當年嘅航空照片可見，海灣內已經開始興建海堤，更早期嘅航空照片中常見嘅舢舨都全部消失，取而代之嘅係運送砂石嘅工程船隻。

由於時序上係先翻新大學車站，再進行填海工程，因此火車軌等於以前嘅海岸線。伴隨填海工程，1985年吐露港公路落成，公路同火車軌之間嘅「半月形」填海地，卻同樣規劃為交通用途，後來成為公共運輸交匯處 (巴士小巴站)。不禁令人覺得當年錯失良機，冇趁機拉直大學站嘅路軌同月台。時至今日，彎月型嘅月台仍然見證住當年嘅海岸線。而家搭火車仲見到「山城」環抱山水日月之境，不過大學站已經唔再對正海邊。