搭開小巴嘅街坊可能留意到，沙田嘅小巴線係跟住號碼順序編排。先係60-69，再到801-814，條條線都有齊… 除咗中間冇802。其實當年可能計劃咗架，但係最終冇成事。

#招標制度

成件事要由小巴線招標制度講起。1980年代起沙田不斷開發新區，政府為新區規劃小巴路線俾營辦商競投。沙田區獲編嘅號碼最初由60開始，去到69之後不敷應用，後來將8__分配俾沙田。所以號碼大細同開辦年份大致相關。1987年招標嘅一組小巴線有營辦商接辦，成為今日嘅68K以及69K。下次招標係1990年，有兩條線: 「耀安至火炭工業區」以及「石門翠湖花園至火炭站」，前者就係801 (現已取消)。編號802好大機會係預留俾「翠湖火炭線」，但係招標以失敗告終。下次招標係兩年後嘅803 804 805S。

#道路規劃

招標文件中嘅801與開辦時大相逕庭，規劃上預計離開馬鞍山後，改往T6路 (大老山公路) 到濾水廠外，然後直接轉落吐露港公路往火炭?! 可能早期規劃嘅T6路真係可以直落吐露港南行，而且招標時T6仲未起好，今日其實都無呢條支路。或許係道路網塵埃落定後，先發現801經濾水廠過橋此路不通，路線開辦時行經富安同石門，取道翠榕橋過河去火炭。原先只服務火炭工業區，後來繞經火炭站同樂景街，大致取代「翠湖火炭線」嘅角色。招標失敗後，後來嘅路線再冇用上802嘅編號，因此直至今日都冇出現過802。