探討豪華巴士及On Demand巴士服務

政府喺2017年«公共交通策略研究»提出引入豪華巴士，提供更舒適快捷嘅長途巴士服務。經過4年研究後，九巴將於7月18日開辦兩條 ‘星級尊線’ P960同P968來往屯門/元朗至銅鑼灣。

 #星級尊線 

新線使用全新巴士行走，

~ 配備較寬敞座位 (其實係龍運嘅櫈)，設有窗簾

~ 免費WIFI同USB充電位(而家新車都有)

~ 走線比常規線快(少少)，但收費高出5成

~ 原本可以網上訂位，現已取消

消息公佈後，有唔少網民恥笑: ‘豪華喺邊？豪喺收費度’，又同其他機場巴士嘅豪華程度比較。講到豪華長途路線，以往已經有非專利巴士公司試過，仲要係沙田區:

 #早餐巴士

城巴1989年開辦88R，上午由第一城單向出中環，以 ‘早餐巴士’ 招徠。當時包早餐(三文治)同報紙一份，以配備絲絨座椅嘅冷氣巴士行走，同182嘅熱狗形成強烈對比。而且一站直達港島，十分吸引。豪華程度可謂創巴士業界先河，更獲外國傳媒報道。豪華巴士服務大家都唔陌生，不外乎係改善車廂環境同縮短車程。俾貴啲車錢換嚟特別舒適嘅車廂環境，切合唔同乘客需求，百貨應百客。只要唔影響常規服務就冇問題。

但係九巴嘅新線取消預約座位服務，浪費咗試行新類型交通服務嘅機會，小編覺得非常可惜。

 #OnDemandBus 

預約服務類似外國唔少地方試行嘅隨需而至 (On Demand) 巴士服務。喺交通需求比較細嘅地方(例如鄉郊同非繁忙時間嘅工業區)，營辦商難以維持頻密班次，班次太疏令市民搭車唔方便。於是網上預約巴士服務應運而生。以新加坡One-north科技城為例，可以用手機app設定上落車站同埋時間。智能系統會安排巴士走線同開出時間 (每班車嘅停站都唔同，按需求而定)，平衡乘客等車時間同營辦商成本。優點除咗等車時間縮短之外，可供選擇嘅上落客地點比以往嘅常規服務嘅站位更多，有需求先停站嘅安排可以加快車程，乘客通勤亦更具彈性，唔使限時限刻等固定班次嘅常規巴士線。

 #紅Van 

其實紅van正正做到呢個功能，但係因為紅van嘅停站，班次，收費等等都唔係制度化，唔熟嘅乘客往往難以選用，而On Demand Bus就係制度化嘅紅van，所以多數乘客都較大信心。

->總結:反觀香港嘅P960連屯門公路轉車站都停，拖慢車程，連預約服務都取消埋，證明巴士公司根本唔知乘客想要啲咩。On Demand嘅精髓就係乘客要乜，就俾啲乜。引入新類型嘅交通服務有助提高通勤效率，建設智能城市。不過礙於香港官僚作風，非繁忙時間想去科學園都係等20-25分鐘一班嘅272K同唔知幾點開嘅小巴27啦……