唔少搭過81出九龍嘅街坊都覺得喺大圍好兜路，來來回回15分鐘又返回原點，因此想小編講下箇中緣由。簡單來講係道路基建變動導致呢個奇怪嘅情況，等我哋睇下點解會搞成咁。

2004年青沙公路工程開始後，根據計劃，大埔公路大圍段南行直接上山嘅支路會被拆卸，81服務美林後將無法直上大埔道出九龍。因此政府特意於美田路近青沙入口加建調頭處，2008年起，81過美林邨後繞經調頭處並加停積輝街，再返回大埔公路北行及松嶺路，取道新建嘅成運路上橋位前往大埔公路出九龍，自此形成今日原地打轉嘅局面。2018年，81九龍方向不再行經美田路青沙入口嘅調頭處及不停積輝街，改用美輝街調頭並設站方便美田邨，亦為部分大圍新村居民提供較近嘅車站。

 然而2020年本線重新繞經積輝街，同時保留美輝街站，變相雙重繞道，令走線更見迂迴。有街坊笑言，如果喺沙田市中心帝都酒店送車尾，步行15分鐘去松嶺路會追得返，可見巴士繞道相當耗費時間。81於居民嘅印象亦因而變差，雖然返沙田非常直接，大埔道落橋就到美林邨，然後直去市中心，相反九龍方向卻不斷兜兜轉轉，乘搭意欲下降。有居民意見認為積輝街站使用率偏低，營辦商及運輸署應考慮81取消此站。至於大圍村一帶乘客可改用美林邨站，步行距離相約，影響不大。而減少重複繞道能避免浪費時間，長遠改善路線觀感。你覺得是否可行呢？歡迎留言分享。