專門服務第一城嘅接駁路線K11

近來沙田第一城嘅邨巴計劃大幅削減班次，似乎越做越縮。小編又諗起另一條專做第一城嘅非專營巴士，往返火炭火車站嘅九鐵巴士K11。呢條線早喺1985年開辦，係第一城早期巴士線之一，與同期嘅城巴62R一同爭奪接駁鐵路嘅客源。K11喺第一城嘅總站，好長時期都係位於圖中嘅寶城街。

K11主要方便第一城居民往返火炭火車站，不過2004年馬鐵通車後，K11取消同東鐵嘅轉乘優惠，令到客量下跌。翻查資料，2006年嘅服務時間大約係朝6晚10，每7-15分鐘一班。2007年呢條線就取消咗。

不過即使第一城站通車，仍然有唔少居民沿用舊有方式嘅轉乘方式。時至今日，乘搭811小巴去火炭站再轉東鐵去大埔同北區，仲係相當普遍，始終都係快過搭馬鐵兜去大圍先轉東鐵。