我哋分享過沙田區內一啲越嚟越少人用，而且被屋苑名稱代替咗舊地名。例如多人知第一城而遺忘咗圓洲角，好彩仲可以喺少量建築物發現到踪影。不過有啲街坊留言提起馬鞍山嘅時候，總覺得有啲地方一片空白。其實除咗馬鞍山之外，仲有兩個 “馬鞍”，而痕跡早已少之又少。

 #馬鞍台 Ma On Terrace → #錦英苑 / #錦英路

以往錦英苑座落嘅山坡被稱為馬鞍台，由山下望上去好似山腰嘅一個平台咁。穿越此區嘅錦英路，1988年配合發展而通車，當時新路稱為馬鞍台。然而，隨住1991年錦英苑落成，馬鞍台1994年改稱錦英路。自此之後得返街市沿用舊名直至今日，相信係唯一仲見到馬鞍台呢個名嘅地方。

 #馬鞍西 Ma On West → #恆安邨 #耀安邨

2017年之前仲有少量路牌標示住馬鞍西，多數位於西沙路同恆康街十字路口 (頌安邨對出)，不過所有路牌上嘅馬鞍西已經被改為恆安。以路牌指引嘅方向得知，馬鞍西係指恆安同耀安一帶，估計1980年代屋邨發展時已經出現，由來已經不得而知，今日喺社區內亦完全冇任何踪跡留下。

 八九十年代嘅地名，今日仲有冇人記得？馬鞍山仲有其他被遺忘嘅地方，你又知唔知「紅泥塘」仲有「渡頭灣」喺邊度呢？