#3 新田圍邨

每當網民討論邊條公共屋邨最荒蕪嘅時候，沙田嘅代表總係新田圍邨。位處秦石邨對上嘅山頭，地理位置較為隔涉，居民非常依賴公共交通出入。

新田圍邨商場翻新中，有望不再頹垣敗瓦。先前商場經歷過商舖不獲續租，公共設施荒廢失修，甚至街市都執笠嘅慘劇。小編決定去新田圍探個究竟，特登搭282巴士入邨，發現乘客當中不乏拎住一袋二袋嘅長者同家庭主婦，睇嚟邨內真係冇嘢好買。落車後首先映入眼簾嘅係商場簇新嘅外牆。上到商場內部，人流稀疏而且舖頭數量極少，有如死城。街市只有幾個魚檔肉檔營業，顯然完全不能滿足居民所需。色彩鮮艷嘅外牆同殘舊嘅住宅大廈形成強烈對比，實在諷刺。

居民日常所需多數依賴附近屋邨，不過新田圍位處山上，又遠離鐵路，要行10-15分鐘長命斜先去到秦石邨或者新翠邨。因此不少街坊選搭巴士落山，例如282接駁沙田市中心。然而本邨公共交通堪稱全沙田公屋中最差劣：其他屋邨基本配備全日路線來往東九龍、油尖旺、西九龍，以及荃灣葵涌，反觀此邨巴士總站內僅有一條87B能直出九龍。雖然獅子山隧道公路有另外數條路線選擇，不過班次疏落之餘，居民要步行陡峭嘅石級先去到巴士站。

新田圍可謂沙田最唔方便嘅屋邨，不過每當有鐵路基建落成 (例如馬鐵及屯馬綫) ，本邨不但無改善鐵路接駁服務，巴士班次反被削減，80M, 86, 89, 281M等先後減班，甚或經已/即將削減到繁忙時間服務，近年僅有開辦281接駁大圍站能夠便利居民，其餘服務均乏善足陳。

小編喜歡遊覽公共屋邨，發掘各有特色嘅故事，當中唔少都有住樸素嘅活力同人情味，但係新田圍嘅感覺係了無生氣，實在令人惋惜。