Fuglinn í fjörunni

Fuglinn í fjörunni er barnagæla, dýraþula og þjóðvísa. Theodóra Thoroddsen (f. 1863. d. 1954) notaði þessa þjóðvísu í þulum sínum. Líklega hefur þulan upprunalega verið undir vikivakakvæðahætti, eins og Krumminn á skjánum og Hér er gott að dansa. Brot úr þulunni er einnig notað sem viðlag í Færeyjum við danskvæði um Gunnar á Hlíðarenda.

Fyrirsögn:

Fuglinn í fjörunni

Lagboði:

Íslensk þjóðlög. Sum þeirra líklega gömul vikivakalög

Höfundur:

Ókunnur. Þjóðkvæði

Kvæðagrein:

Barnagæla; Vikivakakvæði; Dýravísur; Þulur; Íslensk þjóðkvæði

Kvæði undir sama bragarhætti: 

1. Ef vildi Friggjan elda ósa - Upphaf: „Ef vildi Friggjan elda ósa." Vikivakakvæði

2. Enn eitt kvæðiskorn að kveða - Upphaf: „Hér er gott að dansa/ hér er stofan ný/ hún er öll tjölduð og þakin með blý." Vikivakakvæði

3. Eitt kvæði - Upphaf: „Mistekst ei af réttum Suptúngs hátt." Vikivakakvæði

4. Krumminn á skjánum - Upphaf: „Krumminn á skjánum/ kallar hann inn."  Kvæði undir vikivakakvæðaháttum.

Heimild/kvæðið á prenti:

Viðlag: Fuglinn í fjörunni,

hann heitir már.

Silkibleik er húfan hans

og gult undir hár.

Er sá fuglinn ekki smár,

bæði digur og fótahár,

á bakinu svartur, á bringunni grár.

Bröltir hann oft í snörunni

– Fuglinn í fjörunni –

Fuglinn í fjörunni

hann er bróðir þinn.

– Ekki get ég stigið við þig stuttfótur minn.

________________________________

Útgáfa Jónínu Jónsdóttur frá Meiðavöllum í Kelduhverfi.

Fuglinn í fjörunni,

hann heitir már.

Silkibleik er húfan hans

og gult undir hár.

Er sá fuglinn ekki smár,

bæði digur og fótahár,

bakið blátt, brjóstið hvítt,

burt slapp hann úr snörunni

– Fuglinn í fjörunni.

Sambræðingur með erindi úr Titlíngs kvæði:

Viðlag: Fuglinn í fjörunni,

hann heitir már.

Silkibleik er húfan hans

og gult undir hár.

Á vorin situr hann efst í eikum,

ýtir saman kvistum bleikum

með fögrum söng og listileikum

leggst hann þá í hreiðrið sitt

kveði nú allir kvæðið mitt!

Útgáfa Sigurðar Runólfssonar:

Fuglinn í fjörunni

hann heitir már

silkibleik er húfan hans

og gult undir hár.

Fjaðraveikur flýgur um sker

bæði getur ei leitað sér

því hann er sár.

Silkibleik er húfan hans og gult undir hár.

Fuglinn í fjörunni

hann er bróðir þinn

ekki get ég stigið við þig

stuttfótur minn.