செபங்கள் - புனித சூசையப்பர் நவநாள்

கோடி வரங்களை வாரி வழங்கும் புனித சூசையப்பரின் நவநாள் செபம்

➕திருச்சிலுவை அடையாளத்தினாலே ➕எங்கள் பகைவர்களிடமிருந்து எங்களை மீட்டருளும் ➕எங்கள் இறைவா! ➕தந்தை, மகன், தூய ஆவியாரின் பெயராலே… ஆமென்.

தொடக்க செபம்:

முத: ஓ புனித சூசையப்பரே! உம்முடைய பாதுகாவல் இறைவனின் அரியாசனத்தின் முன் பெரியதும் வலியதும் தீவிரமாய் செயல்படுவதுமாய் இருக்கிறது. எங்களுடைய ஆவல்களையும் ஆர்வங்களையும் உம் திருமுன் வைக்கிறோம். உமது திருமகனும் எங்கள் ஆண்டவருமாகிய இயேசு கிறிஸ்துவின் வழியாக அவரிடமிருந்து எல்லா ஆன்மீக நன்மைகளையும் உமது விண்ணக வல்லமையுள்ள மன்றாட்டினால் எங்களுக்கு பெற்றுத் தருவீராக. உமது விண்ணக வலிமையை இவ்வுலகில் காண்பிப்பதற்காக விண்ணகத் தந்தைக்கு எங்களது நன்றியையும் வணக்கத்தையும் செலுத்துகிறோம். புனித சூசையப்பரே! உம்மையும், உமது கரங்களில் அயர்ந்து உறங்குகின்ற குழந்தை இயேசுவையும் தியானிப்பதில் நாங்கள் ஒருபோதும் சோர்வடைய மாட்டோம். உமது இதயத்தின் அருகில் இயேசு இளைப்பாறுகையில் நாங்கள் உமதருகில் வர துணிய மாட்டோம்.

எல்: எங்கள் பெயரால் அவரை அரவணைத்து அவரது அழகிய தலையில் முத்தமிட்டு நாங்கள் இறுதி மூச்சு விடும் வேளையில் அந்த முத்தத்தை எங்களுக்கு தரும்படி மன்றாடுவீராக. மரணத்தருவாயில் இருக்கும் ஆன்மாக்களுக்கு பாதுகாவலரான புனித சூசையப்பரே, எங்களுக்காக வேண்டிக்கொள்ளும் ஆமென்.

முத: தந்தை, மகன், தூய ஆவியாரின் பெயராலே...

எல்: ஆமென்.

முத: நீதிமானாகிய புனித சூசையப்பரே, எங்கள் தகப்பனே, தொழிலாளர்களுக்குப் பாதுகாவலரே, உம்மை நம்பி உமது அடைக்கலம் தேடி வந்துள்ளோம்.

எல்: எங்கள் அன்பின் தகப்பனே, தேவ அன்னைக்கும் உமது வளர்ப்பு மகனாகிய எங்கள் ஆண்டவர் இயேசு கிறிஸ்துவுக்கும் / நீர் காட்டிய அன்பையும் / பராமரிப்பையும் வியந்து / உமக்கு நன்றி செலுத்துகிறோம். உம்மிடமிருந்து நாங்கள் பெற்ற எண்ணற்ற வரங்களுக்காக / உமக்கு அன்போடு நன்றி கூறுகிறோம்.

முத: மிகுந்த வணக்கத்தோடு உம்மை எங்களுக்கு தந்தையாகவும் பாதுகாவலராகவும் தெரிந்து கொள்கிறோம்.

எல்: இறைமகன் இயேசு கிறிஸ்து / தமது திரு இரத்தத்தால் சம்பாதித்த மக்களாகிய எங்களை / தயவாய் கண்ணோக்கி / நீர் திருக்குடும்பத்தை வழி நடத்தியது போல / எங்களையும் வழிநடத்தி / எல்லாப் பாவங்களிலிருந்தும் / தீமைகளிலிருந்தும் / எங்களைப் பாதுகாத்து / வழிநடத்த வேண்டுமென்று / உம்மைக் கெஞ்சி மன்றாடுகின்றோம்.

முத: தாவீது அரசரின் புகழ்பெற்ற உத்தமரே...

எல்: எங்களுக்காக வேண்டிக் கொள்ளும்.

விண்ணப்பங்கள்:

முத: ஆண்டவராகிய இயேசு கிறிஸ்துவே திருக்குடும்பத்தின் பாதுகாவலரும், தொழிலாளர்களின் மாதிரிகையும், நல்ல படிப்பின் பாதுகாவலரும், நல்ல மரணத்தின் காவலருமாகிய புனித சூசையப்பரை எம் பாதுகாவலராக அளிக்க திருவுளமானீரே! அவர் வழியாக உமது ஆதரவைத் தேடி நாடி வந்துள்ள எங்கள் மீது இரங்கி எங்கள் மன்றாட்டுக்குச் செவிசாய்த்தருளும். எங்கள் நெஞ்சார்ந்த நன்றியை ஏற்றுக் கொண்டு நாங்கள் கேட்கும் விண்ணப்பங்களைக் கருணையோடு எங்களுக்கு அளித்தருளும்.

முத: இயேசு கிறிஸ்துவைப் பேணி வளர்த்த புனித சூசையப்பரே!

எல்: எங்கள் பங்கில் உள்ள குழந்தைகள் அனைவரையும் / உம் திருப்பாதத்தில் வைக்கிறோம். அவர்களை கிறிஸ்துவைப் போல் / கடவுளுக்கும் மனிதர்களுக்கும் / உகந்தவர்களாக வளர்க்க / எங்களுக்கு உதவி புரிய வேண்டுமென்று / நல்ல படிப்பின் காவலரே / உம் வழியாக மன்றாடுகின்றோம்.

முத: இயேசு கிறிஸ்துவைப் பாசத்தோடு வளர்த்த புனித சூசையப்பரே!

எல்: எங்கள் பங்கில் உள்ள இளைஞர் / இளம் பெண்களை/ உமது பாதுகாவலில் வைக்கிறோம். அவர்களுக்குத் தூய ஆவியாரின் உதவியைப் பெற்றுத் தந்து / அவர்கள் தங்கள் வாழ்விலும் / பணியிலும் உயரிய இடத்தைப் பெற்று / மகிமையோடு வாழப் / புனித சூசையப்பரே / உம் வழியாக மன்றாடுகின்றோம்.

முத: திருக்குடும்பத்தின் பாதுகாவலரான புனித சூசையப்பரே!

எல்: குடும்பங்களில் ஒற்றுமையும் / சமாதானமும் / புரிந்து கொள்ளும் மனப்பான்மையும் / தியாக உணர்வும் / விட்டுக் கொடுத்து வாழும் விவேகமும் நிலவி / குடும்பங்கள் நன்மக்களை உருவாக்கி / திருச்சபையை வளர்க்க / உமது மேலான ஞானத்தைக் / குடும்பங்களுக்கு அளித்து / அவர்களைப் பராமரிக்க வேண்டுமென்று / புனித சூசையப்பரே / உம் வழியாக மன்றாடுகின்றோம்.

முத: உழைப்போரின் பாதுகாவலரான புனித சூசையப்பரே!

எல்: எங்கள் பங்கில் உள்ள அனைவரையும் / உம் திருக்கரங்களில் வைக்கிறோம். அவர்கள் அனைவரும் / தங்களுக்கு அளிக்கப்பட்ட தொழில்களைச் / செவ்வனே நிறைவேற்றி / நாட்டுக்கும் சமூகத்துக்கும் / பயனுள்ள முறையில் வாழ்ந்து / இறைவனின் திருவுளத்தை நிறைவேற்ற/ புனித சூசையப்பரே / உம் வழியாக மன்றாடுகின்றோம்.

முத: திருச்சபையின் அரணாக இருக்கும் புனித சூசையப்பரே!

எல்: திருச்சபையில் உள்ள அனைத்து வாழ்வு நிலைகளுக்கும் / இறை அன்பு ஒன்றே ஊற்றாய் இருப்பதால் / இல்லறத்தாரும் / துறவறத்தாரும் / இறை அன்பை அடிப்படையாகக் கொண்டு / இறைவனையும் மனிதனையும் அன்பு செய்து வாழவும் / திருச்சபை அன்பின் சமூகமாய் / நிறைவாழ்வை நோக்கி / வீறுநடை போட்டு வாழவும் / புனித சூசையப்பரே / உம் வழியாக மன்றாடுகின்றோம்.

முத: மனு உருக்கொண்ட இயேசுவின் கரங்களிலும், மனுக்குலத் தாயாம் மரியாளின் கைகளிலும் பாக்கியமான மரணம் அடைந்த புனித சூசையப்பரே!

எல்: நோயுற்றோர் உடல் நலச் சுகம் பெறவும் / மரண ஆபத்தில் இருப்போர் / உமது பரிந்துரையால் / ஆன்மீக நலன்களையும் / அவசர உதவிகளையும் / நிறைவாய் பெற்று / இறைவனில் அமைதி கொள்ள / நீர் அவர்களுக்கு உதவி புரிய வேண்டுமென்று / புனித சூசையப்பரே / உம் வழியாக மன்றாடுகின்றோம்.

முத: புனித சூசையப்பர் வழியாக நம் ஒவ்வொருவருடைய தனிப்பட்ட விண்ணப்பங்களை மௌனமாக இறைவனிடம் எடுத்துக் கூறுவோம்.

(நமது சொந்தக் கருத்துகளுக்காக சிறிது நேரம் மௌனமாக செபிப்போம்)

நன்றியறிதல்கள்:

முத: எங்களுடைய தேவைகளை வார்த்தைகளில் வெளிப்படுத்துவதற்கு முன்பே அவற்றை அறிந்து, வரங்களை மழையெனப் பொழிந்து எம்மை வழிநடத்தும் இறைவா! உமது பிரதிநிதியாய், பூவுலகில் திருக்குடும்பத்தின் தலைவராக எல்லாச் சூழ்நிலைகளிலும் உம் திருமகனையும், அவர்தம் அன்னையையும் பேணிக் காத்த அதே புனித சூசையப்பரைப் பாதுகாவலராகத் தந்து, எங்களை ஒவ்வொரு நாளும் வழிநடத்தி வரும் உமது வல்லமை நிறைந்த நன்மைத்தனத்திற்காக நாங்கள் உமக்கு நன்றி கூறுகிறோம்.

முத: கோடி வரங்களை வாரி வழங்கும் புனித சூசையப்பர் வழியாக அவர் மக்களாகிய நாங்கள் பெற்றுக் கொண்ட அனைத்து நன்மைகளுக்காகவும்...