இறந்தோர் வீட்டில் சடங்குகள்

இறந்தோர் வீட்டில் சடங்குகள்

இந்தச் சடங்குமுறையானது ஒரு அருள்பணியாளர் (குருவானவர்) ஒருவரால் மட்டுமே நடத்தப்பட வேண்டும். குரு அல்லாத தனி நபர் எவரும் நடத்த அனுமதி இல்லை. ஆலயத் திருப்பலிக்காக இறந்தவரின் உடலைக் கொண்டு செல்லும் முன்னர் இது செய்யப்படும்.

தொடக்கப் பாடல்: (தகுந்த இறந்தோர் பாடல் ஒன்றைப் பாடவும்)

அப: தந்தை, மகன், தூய ஆவியாரின் பெயராலே...

எல்: ஆமென்.

அப: நம் ஆண்டவராகிய இயேசு கிறிஸ்துவின் தந்தை, இரக்கம் நிறைந்த கடவுள். அவரே ஆறுதல் அனைத்திற்கும் ஊற்று, அவரைப் போற்றுவோம்.

(தீர்த்தம் தெளித்தபின், 130ம் திருப்பாடலை வாசிக்கவும்)

பதிலுரைப்பாடல்: (திருப்பாடல் 130)

அப: ஆண்டவரே உம்மை நோக்கி மன்றாடுகிறேன்.

எல்: ஆண்டவரே உம்மை நோக்கி மன்றாடுகிறேன்.

முத: ஆண்டவரே, ஆழ்ந்த துயரத்தில் இருக்கும் நான் உம்மை நோக்கி மன்றாடுகிறேன். ஆண்டவரே, என் மன்றாட்டுக்குச் செவிசாய்த்தருளும். என் விண்ணப்பக் குரலை உம்முடைய செவிகள் கவனத்துடன் கேட்கட்டும்.

எல்: ஆண்டவரே உம்மை நோக்கி மன்றாடுகிறேன்.

முத: ஆண்டவரே, நீர் எம் குற்றங்களை மனதில் கொண்டிருந்தால், யார்தான் நிலைத்து நிற்க முடியும்? நீரோ மன்னிப்பு அளிப்பவர், மனிதரும் உமக்கு அஞ்சி நடப்பவர்.

எல்: ஆண்டவரே உம்மை நோக்கி மன்றாடுகிறேன்.

முத: ஆண்டவருக்காக ஆவலுடன் நான் காத்திருக்கிறேன், என் நெஞ்சம் காத்திருக்கின்றது, அவரது சொற்களுக்காக ஆவலுடன் காத்திருக்கின்றேன்.

எல்: ஆண்டவரே உம்மை நோக்கி மன்றாடுகிறேன்.

முத: விடியலுக்காய் காத்திருக்கும் காவலரை விட, ஆம்,விடியலுக்காய் காத்திருக்கும் காவலரை விட, என் நெஞசம் என் தலைவருக்காய் ஆவலுடன் காத்திருக்கின்றது.

எல்: ஆண்டவரே உம்மை நோக்கி மன்றாடுகிறேன்.

முத: இஸ்ரயேலே! ஆண்டவரையே நம்பியிரு. பேரன்பு ஆண்டவரிடமே உள்ளது. மிகுதியான மீட்பு அவரிடமே உண்டு. எல்லாத் தீவினைகளினின்றும் இஸ்ரயேலை மீட்பவர் அவரே.

எல்: ஆண்டவரே உம்மை நோக்கி மன்றாடுகிறேன்.

அப: ஆண்டவர் உங்களோடு இருப்பாராக.

எல்: உம் ஆன்மாவோடும் இருப்பாராக.

அப: மன்றாடுவோமாக.

ஆண்டவரே, உமது இரக்கத்தைக் கெஞ்சி மன்றாடும் எங்களுக்குச் செவிசாய்த்தருளும். உமது கட்டளைப்படி இவ்வுலகை விட்டுச் சென்ற உம் அடியார் _____________ (இறந்தவரின் பெயரைச் சொல்லி) அவர்களின் ஆன்மாவை உமது அமைதியும் ஒளியும் நிறைந்த இடத்தில் வரவேற்று, உம் புனிதர்களுடையத் தோழமையில் சேர்த்தருள வேண்டுமென்று எங்கள் ஆண்டவராகிய கிறிஸ்து வழியாக உம்மை மன்றாடுகிறோம்.

எல்: ஆமென்.

இறுதிப் பாடல்: (தகுந்த இறந்தோர் பாடல் ஒன்றைப் பாடவும்)

நித்திய இளைப்பாற்றியை அளித்தருளும், ஆண்டவரே...

முடிவில்லாத ஒளி இவர் மேல் ஒளிர்வதாக...