Jólnasumbl

(Lagboði: Máninn hátt á himni skín)

1. Í heiðnum og í helgum sið,

á horfnri og nýrri öld,

ýtar hafa haldið

heilagt jólakvöld.

– Góðri glaðir á stund

gjalla látum róm,

skæran yfir skammdeginu

skáladóm.

2. Það er ekki þar með nóg;-

þursa og álfa drótt

og dvergaher í holtum

halda jólanótt.

– Góðri glaðir á stund

gjalla látum róm,

skæran yfir skammdeginu

skáladóm.

3. Vatna glærum úti á ís

álfar halda leik,

tungls þeir tína geisla

til að snúa í kveik.

– Góðri glaðir á stund

gjalla látum róm,

skæran yfir skammdeginu

skáladóm.

4. Í hólum standa búin borð

björtum dúk úr gljá,

og morgundaggar mjöður

minnstu skeljum á.

– Góðri glaðir á stund

gjalla látum róm,

skæran yfir skammdeginu

skáladóm.

5. Dvergur séra í Dvergastein

dvergum bíður heim;

þeir svara holt af holti

hátt og draga s-e-i-m.

– Góðri glaðir á stund

gjalla látum róm,

skæran yfir skammdeginu

skáladóm.

6. Vafurlogar lýsa þeim

lystugt yfir mó,

og hrævareldar hrökkva

hrauns úr hverri þró.

– Góðri glaðir á stund

gjalla látum róm,

skæran yfir skammdeginu

skáladóm.

7. Þá er glatt í gýgjarsal

galdra kyrjað lag,

-leikur foss á langspil

„Litla tröllaslag.“

– Góðri glaðir á stund

gjalla látum róm,

skæran yfir skammdeginu

skáladóm.

8. Skessur dansinn stíga stórt,

slitnar lindi og traf,

en í faldafeyki

fer þó gamanið af.

– Góðri glaðir á stund

gjalla látum róm,

skæran yfir skammdeginu

skáladóm.

9. Fósturjörðin fagurt mun

falda líka í kvöld,

milli fjalls og fjöru

fanna þenja tjöld.

– Góðri glaðir á stund

gjalla látum róm,

skæran yfir skammdeginu

skáladóm.

10. Stjarnan vísar vættum lands

veg til hásætis,

og Fjósakonur kveikja

kertum fegri blys.

– Góðri glaðir á stund

gjalla látum róm,

skæran yfir skammdeginu

skáladóm.

11. En norðurljósin láta sinn

loftið sópa vönd;

sú mun björtust brenna

blossa yfir lönd.

– Góðri glaðir á stund

gjalla látum róm,

skæran yfir skammdeginu

skáladóm.

12. Af því myrkrið undan snýr,

ofar færist sól,

því eru heilög haldin

hverri skepnu jól.

– Góðri glaðir á stund

gjalla látum róm,

strangan yfir styztum degi

staupadóm.

stóradóm.

13. Nú er jólna sopið sumbl,

sálminn lýk ég við.

Ef drykkurinn er daufur,

drósir, forlátið.

– Slítum mjaðar ei mót,

meðan blundar sól;

enginn veit, hvort aftur hittumst

önnur jól.

Kvæði: Grímur Thomsen

Lag: Færeyskt/íslenskt þjóðlag