Promoción do galego en Berlín

Fecha de publicación: 23-oct-2010 23:18:56

A Freie Universität de Berlín, en Alemaña, desenvolverá durante o curso académico 2010-2011 un importante programa de actividades para promover o coñecemento e a difusión da lingua e da cultura galegas entre a comunidade universitaria. O responsábel do Centro de Estudos Galegos (CEG), Uli Reich, presentoulle este mércores ao secretario xeral de Política Lingüística, Anxo Lorenzo, o plan de actividades durante a reunión de traballo que mantiveron na Facultade de Filosofía e Humanidades da USC.

As liñas de actuación do CEG de Berlín durante o curso 2010-2011 centraránse en tres aspectos principais: un programa académico de materias de galego en titulacións de grao, mestrado e doutoramento; o impulso de varios proxectos de investigación, entre os que destaca o impacto do galego na formación das variedades americanas do español e do portugués; e a promoción de diversas actividades culturais e de extensión universitaria co fin de promover a lingua, a literatura e a cultura galegas entre o alumnado, a comunidade universitaria e a cidadanía en xeral.

Segundo Política Lingüística, dende as cátedras e os lectorados de Alemaña foméntase o coñecemento do galego. No curso académico 2009-2010, foron máis de 200 os estudantes universitarios de Alemaña que estudaron materias de lingua, literatura e cultura galegas grazas aos centros de estudos galegos.

Fonte: http://www.anosaterra.org/nova/a-freie-universitaumlt-promocionara-a-lingua-galega.html