Кніга, веды, школа
Выказванні пра кнігу, веды, школу
Кожны з нас памятае прачытаную ў юнацтве першую кнігу. (Я. Скрыган)
А наогул я люблю чытаць. (І. Шамякін)
Я вярнуўся дадомы з прывычкай многа чытаць. (К. Чорны)
Праходзілі вякі, адыходзілі ў нябыт пакаленні, знікалі магутныя дзяржавы. а кніга - вялікае цуда, створанае чалавечым розумам, - жыла, хвалявала сэрцы, абуджала думку. (С. Александровіч)
Бясследна нішто не міне,
Гісторыя слова адродзіць.
Ты — мост,
па якім да мяне
Мінуўшчына ў госці прыходзіць.
Мільгаюць старонкі твае —
I мы размаўляем з вякамі,
I продак да нас дастае
Радкамі, нібыта рукамі.
Учора і сёння —
Штодня —
У люты мароз і ў адлігу
Стварае людская радня
Жыцця непаўторную кнігу.
Мы пішам адменным пяром,
Што ўручана родным народам.
Пілот у нябёсах —
крылом,
Араты на полі —
нарогам.
Мы — словы такога пісьма,
Якое ў вяках не сатрэцца.
Ты — мост,
па якім нездарма
Іду я з патомкам сустрэцца.(П. Макаль)
Асвета ёсць першай прыступкай, як фізічнага, гэтак аднолькава і маральнага паляпшэння побыту (В. Дунін-Марцінкевіч).
Любіце кнігу, бо яна – крыніца мудрасці, ведаў і навукі, лекі для душы (Ф. Скарына).
Кожную кнігу трэба пісаць так, нібы гэта твая лепшая і апошняя (У. Караткевіч).
Сярод хаты -
Стол для частунку, для бяседы,
А на сцяне - рог паляўнічы
І стрэльбіна старога дзеда,
І побач - з кнігамі паліца.
Я ўзяў адну, без пераплёту,
Відаць, шмат па руках хадзіла,
Відаць, чыталася з ахвотай...
"Мой родны кут, як ты мне мілы.." (М. Танк)
Звяртайце ўвагу не на багацце, але на сэрца, навуку і славу ў людзей (В. Дунін-Мірцінкевіч).
Псалтыр, пакрытую няжорсткай бурай кожай,
Я ўзяў і срэбныя засцёжкі адамкнуў,
Перачытаў радкі кірыліцы прыгожай
I воску з ладанам прыемны пах пачуў. (М. Багдановіч)
З паглядам,
дзе мары вялікія спелі,
жаданні —
пасобіць айчыне хоць крышку,
каб ластаўкай
родныя словы запелі,
і родныя словы,
і першыя кніжкі. (М. Дукса)
Казалі, — рукапісы не гараць,
А я аднойчы бачыў, як гарэлі
У печы Галубковы акварэлі,
Як вершы адпраўлялі паміраць,
Сагрэтыя яшчэ жывым дыханнем,
I ласкаю, і трапяткім каханнем,
А кажуць, — рукапісы не гараць. (С. Грахоўскі)
Ёсць рукапісы, змест якіх сцярты, ледзь знаць,
Ці нат другі напісан сэнс бязбожна.
Іх палімпсестамі прынята здаўна зваць,
І першы іхні змысл пайме не кожны. (У. Жылка)
Кніга – набытак… І унікальны,
вопыт духоўны, наш скарб на зямлі;
кніга – знак сакраментальны,
каб мы мову шанавалі,
край свой бераглі!.. (М. Курыла)
Старая кніга. Яна звонку –
Нібы чароўная скарбонка:
Па верхнім вечку з цёмнай скуры
Ідуць арнаменты, фігуры (Л. Сільнова)
Бывай, гаманлівае звонкае лета!
Нясём мы у класы вясёлкі букетаў.
Мы бор абуджалі гамонкай вясёлай.
Бывай, лета звонкае! Крочым мы ў школу (П. Прануза).
Вучыся, нябожа, вучэнне паможа
Змагацца з нядоляй, няволяй (Я. Купала).
Няма, браткі, большага шчасьця на гэтым сьвеце, як калі чалавек мае розум і навуку ў галаве (К. Каліноўскі)
Навука – свет, які выклікае павагу (І. Мележ)
Трэба многа ўсім вучыцца,
Трэба многа ведаў мець, -
Можна свету таямніцы
Толькі з імі зразумець. (К. Крапіва)
Калі я чытаю добрую кнігу, не папракайце мяне ў гультайстве. Не хочаце прызнаць, што я працую, дык думайце, што я малюся – Слову (Я, Брыль)
Усялякае Слова, Богам натхнёнае, – карыснае! Яно вучыць, выкрывае, выпраўляе і карае (Ф. Скарына).
Корань навукі горкі, ды плады яго салодкія (Я. Колас)
А сягоння верасень.
Дзверы зноў адкрыў.
І гасцінна, ветліва
Запрашае нас
З адпачынку летняга
У любімы клас. (Н. Гілевіч)
Народ без школы ў роднай мове дзічэе (Б. Тарашкевіч).
Аснова нацыянальнага адраджэння кожнага народу – яго родная школа (Б. Тарашкевіч).