Á Sprengisandi

Á Sprengisandi er ein frægasta hestavísan á Íslandi eftir Grím Thomsen (f. 1820. d. 1896). Þá hefur Þjóðdansafélag Reykjavíkur reglulega dansað þetta kvæði, bæði með vikivakaspori og skottísspori.

Fyrirsögn:

Á Sprengisandi

Lagboði:

Íslensk þjóðlög (a.m.k. 3)
Lag eftir Sigfús Einarsson. Ss. I, 96.

Höfundur:
Grímur Thomsen (f. 1820. d. 1896)

Kvæðagrein:

Hestavísur; Önnur danskvæði

Kvæði undir sama bragarhætti:

Heimild/kvæðið á prenti:

1. Ríðum, ríðum, rekum yfir sandinn,

rennur sól á bak við Arnarfell.

Hér á reiki' er margur óhreinn andinn

úr því fer að skyggja á jökulsvell.

:,:Drottinn leiði drösulinn minn,

drjúgur verður síðasti áfanginn.:,:

2. Þei þei, þei þei. Þaut í holti tófa,

þurran vill hún blóði væta góm,

eða líka einhver var að hóa

undarlega digrum karlaróm.

:,:Útilegumenn í Ódáðahraun

eru kannski' að smala fé á laun.:,:

3. Ríðum, ríðum, rekum yfir sandinn,

rökkrið er að síga' á Herðubreið.

Álfadrotting er að beisla gandinn,

ekki' er gott að verða' á hennar leið.

:,:Vænsta klárinn vildi' ég gefa til

að vera kominn ofan í Kiðagil.:,: