Kóngssona kvæði

1. Kóngurinn átti synina þrjá,

– alvara í gamni –

sjúkur bjóst að falla frá.

– það var nærri sanni.

2. Heimti hann til sín alla senn:

– alvara í gamni –

„Eg vil gera mitt testament.

– það var nærri sanni.

3. Sá skal stýra ríkjum hér

– alvara í gamni –

latastur sem allra er."

– það var nærri sanni.

4. Svaraði einn af sonum hans:

– alvara í gamni –

„Mér skipst hefur sá veldiskrans.

– það var nærri sanni.

5. Því letin er so meðfædd mér

– alvara í gamni –

þegar til svefns og hvíldar fer

– það var nærri sanni.

6. þó mér drjúpi í augu ögn

– alvara í gamni –

ligg eg kyrr í þánka og þögn,

– það var nærri sanni.

7. og þó eg missti heyrn og sýn

– alvara í gamni –

hræri eg aldrei hendur mín."

– það var nærri sanni.

8. Annar sonurinn svaraði þá:

– alvara í gamni –

„Ríkið eg með réttu á.

– það var nærri sanni.

9. Letin er mér hjarta kær

– alvara í gamni –

þó eg sitji eldi nær,

– það var nærri sanni.

10. þó loginn brenni hæl eða tá

– alvara í gamni –

aldrei vík eg fæti frá."

– það var nærri sanni.

11. Þriðji svarar og sór við trú:

– alvara í gamni –

„Faðir minn gaf mér ríkið nú.

– það var nærri sanni.

12. Letin er so við mig föst

– alvara í gamni –

þó snara lögð sé mér um hóst

– það var nærri sanni.

13. og þó eg hafi í hendi kníf

– alvara í gamni –

frelsa eg ekki sjálfs míns líf.

– það var nærri sanni.

14. Fyrr er upp í gálga heng

– alvara í gamni –

en eg bregði hnífi á streng."

– það var nærri sanni.

15. Lata kalla eg þessa þrjá,

– alvara í gamni –

málahlut þann margur á.

– það var nærri sanni.

16. Sá sem umflýr ærlegt starf

– alvara í gamni –

sult og armóð tekur í arf.

– það var nærri sanni.

17. Soddan ríki og reginment,

– alvara í gamni –

er tilgangslítið testament.

– það var nærri sanni.