Dans er hættur, höldum brott

1. Dans er hættur, höldum brott

hér er svell að dansa gott.

Heim er mál að halda nú,

höldum lengra, flytjum bú.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

2. Kyndlum vorum höldum hátt,

heitt er loft og fagurblátt.

Ljóma fögur ljósin blíð

lýsa myrkra Skuldartíð.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

3. Skyggnumst gegnum Skuldartjald

skartkonu ég sé með fald.

Geislar standa af bjartri brá,

blikar sólin faldinn á.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

4. Frelsisgyðjan helg og há

heima í vorum fjöllum á.

Aldrei flutti burt sitt bú,

blítt hún svaf – hún vaknar nú.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

5. Allar standa henni hjá

helgar vættir landi á.

Allar glaða bera brá,

blikar sólin faldinn á.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

6. Nú er ég glaður, nóg ég sá,

nú er gaman landi á.

Álfum, mönnum blikar blíð

broshýr, fögur, sælli tíð.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.

7. Mál er að halda í hólinn inn

heið og björt er framtíðin.

Blysin hátt vér hefjum nú,

hugglaðir við flytjum bú.

– Yfir frer, förum vér,

fagurt er á landi hér.

Fögnum ári nýju nú,

nýtt vér skulum reisa bú.