Iyong Tropeyo

Isinulat ni Isaiah Sachiko D. Robles

Kailan mo masasabing ika’y nagtagumpay sa buhay?

Ito ba’y kapag pinarangalan kang tunay?

O ‘pag abot kamay na ang pangarap na dalisay?

At sa’yo bang pagtahak nitong daang puno ng hamak

Ito ba’y kayang harapin ng buong galak?

Sa mabilis na pag inog ng mundo,

Dala nito’y limpak-limpak na pagbabago

Tagumpay ay ginawang laro at tayo bilang manlalaro

Ngunit ang palaruang puno ng payaso

Sa hamak na daan, kailangan maging tuso

Upang kilalaning mahusay, lahat ay iaalay

Ultimo kula ng ‘yong buhay

Isang desperading galaw

Masilayan lang ang sinag ng panibagong araw

Ngunit ‘di dapat kalimutan

Ang payak na pinagmulan

Tagumpay may magbibigay galak, ngunit ‘di nito mapupunan 

Ang usong nananabik ng tahanan

Kaya’t kung darating man ang panahong mahahagkan

Ang tagumpay na inaasam at inaasahan

Ito’y dapat pagkaingatan at alagaan

Sapagkat ito’y isang tropeyo

Na saksi sa mga laban at sakripisyo mo