Kailangan o Kagustuhan sa Mainit na Kontrobersya

Ni Ayesha Lian Berdul

  Kasabay ng mainit na panahon sa bansa, dagdag perwisyong balita ang nang-abala sa mga konsumer ng Meralco, isang electric power distributing company. Ang kasalukuyang nakalulula ng bayarin sa kuryente ay lalo pang nadagdagan dahil nagkaroon ng pagtaas sa singil na siyang lalong nagpainit sa ulo ng masa sa kalagitnaan ng maalinsangang panahon. Naturalmente na ang taas singil sa kuryente para sa mga tao sa tuwing sasapit ang panahon ng el-nino o tag-init sa bansa na mula buwan ng Marso hanggang Mayo. Mataas na porsyento ng mga Pilipino ang apektado sa ganitong sitwasyon, kabilang na ang 51% na mga tao na inilarawan ang kanilang mga sarili bilang mahirap noong Marso 2023 — isang natuklasan na halos hindi nagbago mula Disyembre 2022, ayon sa Social Weather Stations. Bagamat maraming mga Pilipino ang apektado sa ganitong problema, alam naman nating mayroon pa ring dahilan ang Meralco kung bakit nagkaroon ng dagdag singil sa kuryente, kailangan man ito o kagustuhan lang. 

Ang Meralco ay kabilang sa monopolyo na nakapaloob sa imperfect competition sa Antas ng Pamilihan, sila lang ang nagbebenta ng produkto at serbisyo ng elektrisidad, kung kaya`t kontrolado nila ang presyo at pagpataw ng buwis sa mga konsumer, kung ito ba`y tataas o bababa sa loob ng isang buwan. Isa sa dahilan kung bakit mataas ang singil sa kuryente ay ang mga materyales na ginagamit sa pang angkat, pati narin ang production cost, sa kadahilanan na ang suplay ng kuryente ay inaangkat pa sa ibang bansa, kung kaya apektado sa paggalaw ng presyo sa world market at sa palitan ng piso kontra dolyar ang presyo nito. Noong Oktubre 2021, isa sa mga presidential candidate na si Ka Leody de Guzman ang nagbigay pansin para maresolba ang nakalululang bayarin sa kuryente, sa pamamagitan ng renewable energy at ang paggamit ng kuryente mula sa araw, hangin, atbp. 

Ramdam na ramdam ng masa ang pagkabalisa dahil sa mas matinding sikat ng araw at ng mainit na hangin sa bansa na hindi karaniwan at hindi nararanasan noon. Batay sa datos ng PAGASA, ang pinakamataas na heat index na naitala mula noong Marso 1, 2023, ay 49℃ noong Abril 16 sa Guiuan, Eastern Samar. Ang init ng panahon ay huhupa rin at hindi magtatagal ng isang taon sa bansa. Gustuhin man natin na maligo sa tubig na may umaapaw ng yelo dahil sa init at mataas na bayarin, hindi parin lalabo ang problemang ito, kaya naman bakit hindi ito gawan ng paraan ng mga namamahala sa gobyerno. Hindi maiiwasan ang chismis na nagkaroon ng dayaan sa singil sa kuryente, kaya tumataas ang singil ay dahil may nangyayaring pang-aabuso. Dahil mainit ang panahon ay doble ang konsumo ng kuryente at dagdag kita para sa kanila. Minsan hindi lang ‘to dahil sa kailangan, may nangyayari ring kagustuhan.