Cecilíu minni

Cecilíu minni. Lagið er íslenskt þjóðlag úr Hymnodiu sacra en textinn er gamalt Cecilíukvæði frá kaþólskri tíð (Bjarni Þorsteinsson 1929, bls. V). Heilög Cecilía var, sem kunnugt er, dýrlingur og verndari tónlistarinnar. Bjarni Þorsteinsson prestur á Siglufirði og þjóðlagasafnari segir einnig, að Cecilíu minni sé gott dæmi um það „hvernig söngurinn fór fram til forna í brúðkaupum og öðrum veislum, þegar drukkin voru minni Maríu meyjar eða dýrðlinganna." (Bjarni Þorsteinsson 1929, bls. V). Því mætti einnig skilgreina Cecilíu minni sem brúðkaupskvæði og hálfgert vikivakakvæði.

Titill:

Cecilíu minni

Lagboði:

Íslenskt þjóðlag úr Hymnodiu sacra

Höfundur:

Ókunnur

Kvæðagrein:

Helgikvæði; vikivakakvæði; brúðkaupskvæði
Kvæði undir sama bragarhætti:

Óvíst

Heimild/kvæðið á prenti:

1. Sett hefur sjálfur drottinn,

Cecilía, þig, blessuð.

– Fari hér með fagnaði inni

frú Cecilíuminni.

2. Um ótaldar aldir,

ágætust í hásæti.

– Fari hér með fagnaði inni

frú Cecilíuminni.

3. Veiti vífið mæta

voldugt oss á foldu.

– Fari hér með fagnaði inni

frú Cecilíuminni.

4. Traust eilífðrar ástar

almáttugs guðs sáttum.

– Fari hér með fagnaði inni

frú Cecilíuminni.

Heilög Sesseslja. Listaverk eftir Pál Guðmundsson á Húsafelli. Ljóð eftir Thor Vilhjálmsson heitinn