Þorrablót 1900

1. Engin fleiri aldamót

ætla má vér hjörum,

Þorra gamla þakkarblót

því mun skylt vér gjörum.

Þó skal heiðið Herjans þjór

honum enginn bjóða,

heldur gullinn Braga bjór

beztu hjartans ljóða.

2. Setjum hátt á sjónarhól

svásleg tákn að skoða:

yfir kaldan klakastól

kvöld- og morgun-roða. –

Tveggja alda sigursól

sumardagar boða!

Inn með vonir, ást og skjól!

Út með sorg og doða.

3. Hræðumst ei, þótt holdið sé

hjómi líkt og bólu;

bólan hver í báruhlé

brosir glöð við sólu.

Ef vort kyn er ýlustrá

undir köldum bárum,

stráið það mun sólu sjá

signað feginstárum.

4. Helgað sé vort fyrsta full

feðra vorra minni: –

allir fegnir færa gull

föður og móður sinni.

Kyn frá kyni, öld af öld

áum blæddu sárin,

svo vér þetta Þorrkvöld

þekktum færri tárin.

5. Næstu minnin vígjum vér

vorum beztu mönnum.

Lifi drós og drengur hver

dáðum prýddur sönnum.

Lifi sá, er sinni þjóð

selur kraft og blóma,

meðan háleit hrífa ljóð

hljóti frægð og sóma!

6. Blessi svo vorn sjónarhól

sjálfur Drottins alda!

Vermdu, heilög himinsól,

höfuð landsins kalda!

Birtu ljós og líknarráð

lífsins sólarhöllu.

Finnum oss í frjálsri dáð!

Finnum Guð í öllu!