Lækurinn

1. Ég er að horfa hugfanginn

í hlýjum sumarblænum

yfir litla lækinn minn

sem líður framhjá bænum.

2. Ó, hve marga æskustund

áður hér ég dvaldi,

saklaust barn með létta lund

og leggina mína taldi.

3. Bæ ég lítinn byggði þar

blómum utan skreytti.

Yfir tún og engjarnar

oft ég læknum veitti.

4. Nú er ekkert eins og fyr,

á öllu sé ég muninn.

Löngu týndir leggirnir

og litli bærinn hruninn.

5. Æskan hverfur, yndið dvín,

allt er líkt og draumur.

Áfram líður ævi mín

eins og lækjastraumur.

6. Meðan æðum yljar blóð

og andinn má sig hræra

vil ég syngja lítið ljóð

um lækinn silfurtæra.

7. Þegar ég er uppgefinn,

og eytt hef kröftum mínum

langar mig í síðsta sinn

sofna á bökkum þínum.