Kvæði af Gunnlaugi og Sigurði

1. Sigurður lendir skipunum

við eina ey.

Gulli voru þau búin

með fagri fley.

– Svefn öngvan má eg sofa.

2. Sigurður biður Sigríðar

sem hann kann.

Hún vill ekki eiga þann

hinn væna mann.

3. Væn er hún Sigríður

systir þín.

Þó finnst annað fegra fljóð

á skipum mín.

4. En so svaraði hann Gunnlaugur

og varð við reiður:

Ég skal gefa þér hringa tólf

ef það er ei.

5. Sigurður gengur stuttan veg

til skipa sín.

Stattu upp, Sesselja,

systir mín.

6. Sesselja klæddi sig

í stakkinn blá.

Silfrinu temprar hún

þar utan á.

7. Sesselja klæddi sig

í safalaskinn.

So gengur hún í höllina inn

með meyjar fimm.

8. Sesselja settist undir

drykkjuborð.

Ekki mælti hún Sigríður

við hana orð.

9. Öllum þótti hún Sesselja

væn að sjá.

Þar lék henni Sigríði

öfundin á.

10. So lyktaði kvæðinu

fyrr og nær.

Sigríður átti barn

við borgarþræl.

– Svefn öngvan má eg sofa.