Embedded Files
Eskolan gaudela, askotan izango dugu besteen aurrean zerbait kontatu beharra, baina, denok ez gara hizlari trebeak, eta lotsa dugulako edo zer esan ez dakigulako, egoera deserosoa izaten da gutako zenbaitentzat.
Kontu honetan ere argi dago, neska-mutilok! Ereduak hartu, aztertu, apur batean landu eta, dena argi dugunean, gurea egiten ahalegindu; horixe da, bada, ikasteko bidea. Ekingo diogu guk ere ahozkoan trebatzeari? Irakurri arretaz jarraitu beharreko prozedura:
- Behar bezala hasteko, ereduak ikusiko ditugu: zuen adineko ikasle batzuen azalpenen grabazioak. Ikusiko duzuenez, hizlari profesionalak ez izan arren, guztiek dute zerbait probetxagarri.
- Grabazioak ikusi ostean, galdera batzuk erantzungo dituzue talde handian, eta ikusitakoaren gaineko hausnarketa egingo duzue irakaslearen laguntzaz.
- Bukatzeko, zer ondorio atera duzuen adierazteko aukera izango duzue, hurrengo orrian aurkituko duzuen taula erabilita.
Orain, egin klik eta ikusi bideoak arretaz:
Interesgarriak, ezta? Dena ulertu duzue? Zalantzaren bat baduzue, jo ezazue berriro bideoetara eta ikusi itzazue behar beste aldiz. Gero, ondorengo galderak erantzuten ahaleginduko zarete.
Azalpenaren egiturari erreparatzeko
- Esaten dute nor diren? Eta zer gairi buruz hitz egingo duten?
- Erabiltzen dute bukaera-formularen bat ala bat-batean bukatzen dute?
- Egokia izan da ideien ordena? Txandak errespetatzen dituzte taldean egiten dutenean?
Azalpenaren egokitasuna aztertzeko
Ulertu duzue esan duten guztia? Norbaiti ulertzeko zailtasunak izan badira, zein dira, zuen ustez, arrazoiak? Aukeratu hauen artean:
+ Baxuegi hitz egiten zuen eta lurrari begira.
+ Ez zuen ondo ahoskatzen eta arinegi hitz egiten zuen, dena tonu berean.
+ Ez zituen hitzak aurkitzen eta etenaldi luzeak egiten zituen.
Entzuleekiko jarreraz ohartzeko
- Nori begira hitz egiten dute? Entzuleei begira ala kamerari begira?
- Azalpen guztietan zerbait izan dute erakusteko: argazkiak, kartulinak, … .Era egokian erabili dituzte? Norbaitek erabili du azalpenari laguntzeko?
- Egiten dute keinu adierazgarririk? Erabiltzen dituzte eskuak?
- Egokia da, zuen ustez, ahozko azalpen batean testuak hitzez hitz irakurtzea? Eta buruz ikasita eramatea esan beharreko guztia? Zer egingo zenukete zuek?
Lehen esan dugunez, denok daukagu zer hobetu, eta besteei erakusteko zenbait gauza ere bai, jakina!
Jakin dakigu zuen hitzaldirako ideia pila atera duzuela bideoak aztertzen zenituzten bitartean, eta, horrez gain irakasleak zenbait pista eman dizue, ezta? Ikus dezagun, bada, zer ikasi duzuen egiten!
Page updated
Google Sites
Report abuse