1 - 5 јуни, 2020

• Слушни ја басната „Штркот и лисицата“ од познатиот баснописец Езоп - овде.
• Погледни ги илустрацијата и моделот за буквата - /ш/.
• Создади сопствен модел за буквата.
• Прераскажи ја басната.
• Сработи го наставниот лист.
• Молиме, пратете ни ги задачите не подоцна од петок - 5 јуни, 13 часот.

26 мај, 2020

Драги ученици и почитувани родители,

Буквите /Ч/ и /Џ/ може да ги изговориме со еднаква поставеност на устата и забите. Единствено, испуштаме два различни звука, а тие звуци се запишуваат со помош на буквите

/Ч/и /Џ/. Доколку се обидете, ќе забележите дека само за изговарање на буквата /Џ/ вложуваме мал напор со употреба на јазикот.

Во текот на оваа работна седмица, ученикот треба да:

• ги погледне сликите и моделите на буквите /ч/ и /џ/,
• создаде сопствени модели за двете букви,
• ги слушне приказните: „Биби, Боби и чудовиштето од Охридското Езеро“ и „Биби и џиновите“,
• ги сработи наставните листови за двете букви.

Ве молиме, пратете ни ги моделите и сработените наставни листови според веќе востановената пракса и имајте убава работна седмица.

Срдечно,

Лидија и Деспина

11 мај, 2020

Драги ученици и почитувани родители,

Најпрвин, дозволете ни да ви се заблагодариме за сите форми на презентација коишто пристигнаа до нас, а коишто се однесуваат на домашниот проект поврзан со правењето парфем. Малата, но исклучително квалитетна виртуелна изложба може да ја погледнете на оваа врска.

Исто така, доколку имате видео материјал поврзан со вонучилишна активност којашто го промовира и зајакнува учењето на мајчиниот јазик на вашето дете, и сакате тоа да го споделите, испратете ни го материјалот на меил како што тоа направи нашата ученичка Мина Ефкоски. Уживајте во изведбата на Мина преку оваа врска.

Оваа седмица, ви ветуваме дека малку ќе здивнете:-). Продолжуваме со примена на стандардните техники на изучувањето на буквите од кириличната азбука, а стигнавме до буквата /Х/.

Еве ги активностите за оваа недела...

Секој ученик треба да:

• (1) ја моделира буквата /Х/ со помош на ситни предмети или делови од растенија и семиња како што ние тоа сме го направиле на фотографијата подолу (овојпат беше едноставно и за нас :-),
• (2) ја слушне приказната „ Свирачот од Хамелин“ на видеото поставено подолу,
• (3) ја прераскаже приказната преку слики и зборови или кратки реченици на наставниот лист поставен овде.
• (4) го сработи наставниот лист посветен на буквата /Х/, а поставен под овој текст.

Како и секогаш, благодариме за вашата соработка и домашна поддршка,

Лидија и Деспина

21 април, 2020

Драги ученици и почитувани родители, добре дојдовте повторно на нашата заедничка страница.

• Аудио - насоките и задачите за оваа работна седмица се наоѓаат под овој текст.
• Врската кон приказната „Чоколадната куќичка“ од Браќата Грим се наоѓа овде.
• Начинот на којшто се испраќаат сработените задачи посочен е овде.
• Доколку немате печатач покрај вас, прочитајте ги нашите предлози - овде.
• За умните главчиња коишто секогаш сакаат да сработат нешто повеќе, користете ги нашите предлози - овде.

Срдечно,

Лидија Вангелова - Андреева и Деспина Мукоска

Корисни информации и врски:

1. Забавни - едукативни домашни активности:

• Азбучни карти - се користат за меморирање на буквите преку игра. Поврзани се со курикулумот и приказните препознатливи за учениците.
• Музички буквар
• Бушава азбука на ТВ
• Пакет активности за домашно учење низ игра
• Детски драми
• Бонтон за деца
• Дигитални аудио сликовници - библиотека „Чекор по чекор“
• Аудио - визуелни приказни - „Светот на Биби“
• На буква, на буква... - игра
• Македонски народни инструменти - квиз
• Македонски центар за е-учење

2. Наставни листови за учениците:

Често употребуваните наставни листови, може да ги најдете на самиот крај од оваа страница или:

• евидентен лист за читање
• наставен лист за прераскажување приказна

Испраќање сработени задачи

Сработените задачи од учениците се испраќаат јасно фотографирани или скенирани на крајот на тековната работна недела исклучиво на:

despina.mukoska@nova.edu.mk - за Деспина Мукоска

lidija.vangelova@nova.edu.mk - за Лидија Вангелова - Андреева

ВАЖНО

Доколку тековно зададената задача вклучува повеќе од еден наставен лист, Ве молиме НЕ испраќајте ги наставните листови наизменично и по случаен (random) редослед. Почекајте Вашето дете да ја сработи задачата целосно и дури потоа испратете ја како единствен документ. На овој начин, ќе му дадете значење и тежина на она што го работи Вашето дете, a ние ќе имаме соодветен преглед и можност за темелно и посветено оценување на задачите. Задачите не се работат одеднаш, туку во континуирани кратки термини наменети за македонски јазик.

Често поставувани прашања:

1. Како да постапам доколку немам печатач и не можам да ги преземам наставните листови од страницата?

одговор: Дозволете му на Вашето дете да го прецрта наставниот лист приложен од наша страна. Доколку листот вклучува елементи што се предизвик за дете на оваа возраст, Ве молиме направете тоа Вие за Вашето дете.

Вонучилишни активности

Доколку го поттикнувате учењето на македонскиот јазик на вашето дете преку хоби, домашна активност или членување во вонучилишна едукативна група, споделете ја работата на вашето дете на оваа страница. Едноставно, испратете ни меил со подготвен материјал, а ние ќе го објавиме материјалот.

Ученички проект „Од домашна градина до шишенце“

Буквата /Ф/ ја изучувавме преку анимираниот филм за деца „Фифи и малите цвеќиња“. Инспирирани од Фифи која прави парфем од различни билки одлучивме и ние да го сториме истото, а според насоки и предлози од учителките Лидија и Деспина. За тоа дека синергијата „ученик - учител - родител“ претставува гарантиран патоказ за успех, укажува и идејата на нашиот родител г. Герман Филков, којшто спонтано на овој проект му даде име „Од домашна градина до шишенце“. Му благодариме. Уживајте во проектите на учениците, поставени под овој текст. Проектите се поставени според редоследот на нивното пристигнување.