1 - 5 јуни, 2020

Драги мои ученици,

Оваа седмица завршуваме со академскиот дел од нашата учебна година, а бидејќи КРАЈОТ ГО КРАСИ ДЕЛОТО, токму во текот на оваа седмица треба да го дадеме НАЈДОБРОТО од себе.

1. Бидете навреме присутни на нашата Гугл средба во вторник во 13 часот.

2. Во меѓувреме, започнете да го откривате светот на птиците преку книгата „Птици“ - овде.

3. Во вашите тетратки за почетно пишување одговорете со употреба на целосни реченици на прашањата напишани на последните две страници од книгата.

4. Ве молам пратете ми ја завршената задача не подоцна од петок - 5 јуни, 13 часот.

Ве сака,

Деспина

26 мај, 2020

Драги ученици и почитувани родители,

Она што им е познато на учениците е дека постојат 6 групи животни и учениците умеат да ги набројат овие групи на англиски јазик. Она што би сакала учениците да го научат е именувањето на овие групи на македонски јазик.

Оттука:

• mammals - цицачи,
• birds - птици,
• insects - инсекти,
• fish - риби,
• reptiles - влекачи и
• amphibians - водоземци.

Во текот на оваа седмица, би сакала секој ученик да:

• ја прочита првата книга „Цицачи“ од едицијата во изработка „Чудесни животни“,
• одговори со употреба на целосни реченици на прашањата напишани на страницата 15 и на страницата 16.

Ве молам, испратете ми ја сработената задача според веќе востановената пракса.

И...доколку ви се допадне книгата, слободно поттикнете го авторот преку споделување "like" за книгата на страницата :-).

Убава работна недела посакувам.

Ваша,

Деспина

18 мај, 2020

Драги ученици и почитувани родители,

Продолжуваме да се запознаваме со живите организми што живеат на земјата.

За почеток, предлагам учениците да го слушнат мојот аудио - видео поздрав, поставен на оваа врска.

Следно, треба да се прочита книгата „Чудесни растенија“ поставена на оваа врска.

Потоа, учениците треба да одговорат на прашањата напишани низ страниците на книгата, но и на последната страница од книгата.

Најпосле, испратете ми ја сработената задача до крајот на работната седмица, а според веќе востановената пракса.

Искрено ваша,

Деспина Мукоска

11 мај, 2020

Драги ученици и почитувани родители,

во согласност со актуелната IPC (заб. од англиски) тема, во текот на работната седмица од 11 - 15 мај продолжуваме со откривање на нашето тело и неговите неограничени можности.

Секој ученик треба да:

• ја прочита книгата „Што се умее моето тело“, достапна на оваа врска.
• да одговори со употреба на целосни реченици на прашањата поставени на последната страница од книгата, а во својата тетратка за почетно пишување или на хартијата за почетно пишување поставена - овде.

Пред почетокот на читањето советувам повторување на буквите преку употреба на азбучните карти. Врската кон азбучните карти е овде.

Сработените задачите треба да се испратат заклучно со 15 мај о.г. Начинот на којшто се испраќаат сработените задачи од учениците, посочен е овде.

Во пресрет на нашата Гугл средба во вторник во 13 часот, би сакала да ве известам дека отсега па до крајот на учебната година, поканите за овие средби ќе ги испраќам само преку меиловите на учениците, а секако дека ќе го ценам и вашето присуство.

Ви посакувам убава и продуктивна работна седмица.

Срдечно,

Деспина Мукоска

Корисни информации и врски:

1. Забавни - едукативни домашни активности:

• Музички буквар
• Бушава азбука на ТВ
• Пакет активности за домашно учење низ игра
• Детски драми
• Бонтон за деца
• Дигитални аудио сликовници - библиотека „Чекор по чекор“
• Аудио - визуелни приказни - „Светот на Биби“
• На буква, на буква... - игра
• Македонски народни инструменти - квиз
• Македонски центар за е-учење

2. Корисни извори за родителите:

• Прирачник за следење на читањето за прво одделение (Нова) - второ одделение (Државни училишта)
• Азбучни карти - се користат пред секое читање и помагаат при полесно меморирање на буквите.
• За полесно читање, пред секое читање - подготви се.

Испраќање сработени задачи

Сработените задачи од учениците се испраќаат на despina.mukoska@nova.edu.mk

Доколку тековно зададената задача вклучува повеќе од еден наставен лист, Ве молам НЕ ги испраќајте наставните листови наизменично и по случаен (random) редослед. Почекајте вашето дете да ја сработи задачата целосно и дури потоа испратете ја како единствен документ. На овој начин ќе му дадете значење и тежина на она што го работи вашето дете, a јас ќе имам соодветен преглед и можност за темелно и посветено оценување на задачите. Задачите НЕ се работат одеднаш, туку во континуирани кратки термини определени за македонски јазик.

Испратените задачи треба да бидат јасно фотографирани или скенирани.

Задачите се испраќаат до крајот на работната седмица.

Често поставувани прашања:

1. Како да постапам доколку немам печатач и не можам да ги преземам наставните листови од страницата?

одговор: Дозволете му на Вашето дете да го прецрта наставниот лист приложен од наша страна. Доколку листот вклучува елементи што се предизвик за дете на оваа возраст, Ве молам направете тоа Вие за Вашето дете.