Þorrablótsvísur 1863

1. Nú drekkum, drekkum, drekkum burt

vort dauða-blóð!

Að bíta lengi brauðið þurt

og bryðja lífsins remmi-jurt,

það gjörir lífið kalt og kjurt

í klakaþjóð.

Því teygum í oss hetju-hug

:,: og hressum lífs og sálar dug :,:

og móð!

2. En nú er önnur öld, en þá

er Egill sat

á ölbekk forðum Ármóð hjá

og alla skelfði', er horfðu á,

þær holskeflur af horna-sjá,

sem hirt hann gat;

og ætli meira ættum vér

:,: hjá Agli bónda' í „karaktér" :,:

en „gat"?

3. Þótt bannað sé að bera hjör

og bana-spjót,

þarf enn að verja frelsi' og fjör

og forðast marga lyga-ör

og efla lands vor auðnu-kjör

með endurbót.

Því framför Íslands frelsi, trú

:,: í fornum anda signum nú :,:

vort „blót"!