Þernukvæði

1. Kristín unga klæðist með gull,

– ekki er dagur enn, –

hún á sér þernu flærðarfulla.

 – Vel dansa vífin.

2. Kristín gár fyrir kónginn sinn.

– ekki er dagur enn,  –

„Nú stár eg með barni þín."

 – Vel dansa vífin.

3. „Sé það sveinbarn, fái eg það séð

– ekki er dagur enn, –

þar liggur þín æran við.

 – Vel dansa vífin.

4. Sé það meybarn, vilji það lifa

– ekki er dagur enn, –

þá skal það í klaustur gefa."

 – Vel dansa vífin.

5. Þá fyrir sól á fjöllum rauð

– ekki er dagur enn, –

Kristín þoldi þunga nauð.

 – Vel dansa vífin.

6. Þegar að sól á fjöllum skein

– ekki er dagur enn, –

Kristín fæddi fríðan svein.

 – Vel dansa vífin.

7. Kristín talaði þreytt af móð:

– ekki er dagur enn, –

„Hvör gjörir mínum herra boð?"

 – Vel dansa vífin.

8. Þernan svaraði þarna:

– ekki er dagur enn, –

„Eg gef þín boðin gjarna."

 – Vel dansa vífin.

9. Þernan fór sem boðin var

– ekki er dagur enn, –

og kemur í höll þar kóngurinn var.

 – Vel dansa vífin.

10. Kóngurinn talar og varð við blíður:

– ekki er dagur enn, –

„Seg mér hvörninn Kristínu líður."

 – Vel dansa vífin.

11. „Henni gengur vel sem má,

– ekki er dagur enn, –

hún hefur fætt eitt meybarn á.

 – Vel dansa vífin.

12. Hún hefur fætt eitt meybarn á,

– ekki er dagur enn, –

það er líkt einum köldum ná.

 – Vel dansa vífin.

13. Það er líkt sem kaldur nár

– ekki er dagur enn, –

eður ljótur steinn sem liggur í lá.

 – Vel dansa vífin.

14. Heyrðu, kóngur, eg segi þér slíkt,

– ekki er dagur enn, –

það er þínum þræli líkt.

 – Vel dansa vífin.

15. Mér er hún Kristínu illu kennd,

– ekki er dagur enn, –

hún væri betur á báli brennd."

 – Vel dansa vífin.

16. Kóngurinn talar og varð við bráður:

– ekki er dagur enn, –

„Eg verð að finna Kristínu áður."

 – Vel dansa vífin.

17. Kóngurinn gekk í hæga loft,

– ekki er dagur enn, –

hún Kristín unga svaf þar oft.

 – Vel dansa vífin.

18. Kóngurinn lyftir upp klæði blá,

– ekki er dagur enn, –

Kristín unga undir lá.

 – Vel dansa vífin.

19. Tók hún upp hið bjarta barn,

– ekki er dagur enn, –

lagði hún það á kóngsins arm.

 – Vel dansa vífin.

20. Hann tók í hennar hægri hönd,

– ekki er dagur enn, –

festi frú og gaf henni lönd.

 – Vel dansa vífin.

21. Snemma einn morgun sagði hann:

– ekki er dagur enn, –

„Þernan uppi á báli brann."

 – Vel dansa vífin.