Vilhjálms kvæði

1. Guttormur ríður sig

af þingunum heim,

úti stendur hún Vendilmón

og fagnar þeim.

– Öl segir allan vilja.

2. „Heill og sæll, Guttormur

bróðir minn,

hvur eru nú tíðindin

af þingunum þín?“

3. „Þau eru nú tíðindin

sem þér þykja verst

að dauður er hann Vilhjálmur

sem þig hefur fest.“

4. „So hafa mér draumarnir

gengið í ár

að ég mundi hann Vilhjálm

með lífinu sjá.“

5. „Vendilmón mín systir,

viltu þann mann

sem á allan hátt

sigla og róa kann?“

6. „Ekki vil eg þann mann

sem sigla og róa kann

því báran hún blekkir

so margan mann.“

7 .„Vendilmón mín systir,

viltu þann mann

sem á allan hátt

smíða kann?“

8. „Ekki vil eg þann mann

sem fyrir aflinum situr,

hann líkist svínum

og verður niðurlútur.“

9. „Vendilmón mín systir,

viltu þann mann

sem á allan hátt

syngja og kveða kann?“

10. „Ekki vil eg þann mann

sem syngja og kveða kann,

huglausu hjartanu

stýrir hann.“

11. „Vendilmón mín systir,

viltu þann mann,

Jón Stallarason

heitir hann?“

12. „Eigðu sjálfur

þinn stallarasvein,

so lengi sem ég lifi

þá réð ég mér ein.“

13. „Þú skalt ekki, Vendilmón,

ráða þér lengur,

þín biður aldrei

vaskari drengur,“

14. Guttormur stígur sig

á hallar gólf:

„Jón Stallarason,

festu Vendilmón.“

15. „Laust verði okkar

lófa traust,

gæfi það guð hann Vilhjálmur

kæmi heim í haust.

16. Laust verði okkar

lófatak,

gæfi það guð hann Vilhjálmur

kæmi heim í dag.“

17. Þar kom einn lítill drengur

hlaupandi í öll:

„Nú er ég vísari

en þið gjörvöll.

18. Ég sá sigla fimmtán skip

sunnan undir höll,

Vilhjálmur hinn þýski

hann á þau öll

19. „Ef það er satt

sem þú segir mér

fimmtán bú á Gautlandi

skal ég gefa þér.“

20. „Ef það er ekki satt

sem ég segi þér

þá láttu mig hanga

svo hátt sem þú sér.“

21. Vilhjálmur hinn þýski

með sinn bitra brand

fyrstan drap hann brúðgumann

þegar hann sté á land

22. Vilhjálmur hinn þýski

og hans festarfrú

gáfu þau sínum sögusveini

fimmtán bú.

 – Öl segir allan vilja.