NESOPHILIA - O NESOMANIA?
Insula de Man: Io es un nesophilo: io ama insulas. Omne insulas. Si un pecia de terra es circumferite per aqua, presto illo me interessa. Io vole explorar lo, gauder de illo, posseder lo. Admittite, io ha certe preferentias. Qualque insulas son tanto grande que illos perde lor homogeneitate, e on quasi oblida que illos son de facto insulas. A altere insulas manca un forma interessante ? insulas ronde son, como discos, aliquanto tediose in lor perfection e uniformitate. Ma istes son poc. Le majoritate me fascina.
Multe nesophilos, como io, opta a habitar super un insula. Nam sovente un insula, isolate e dunque protegite per le mar contra influentias externe, conserva su identitate e individualitate e es in se un microcosmo con su proprie flora e fauna, climate, population, cultura, e lingua o dialecto distinctive e non trovabile alicubi. On pote saper toto super un insula, cognoscer lo completemente, intimemente.
Le casos le plus sever de nesophilia tende verso nesomania, un condition lamentabile characterisate per le obsession de passar su vacantias per visitar plure insulas, de "colliger" los, justo como un homine plus rational collige libros, timbros, o objectos de porcellana. Le manifestation ultimate de nesomania on observa quando le suffritor, post passar tal vacantias, retorna al insula de su domicilio e comencia immediatemente leger libros ? o mesmo scriber ipse un libro ? super insulas. In ille stadio le morbo es jam incurabile e debe esser permittite a proceder inimpedite.
In seculos passate on credeva que un cura existeva. Quando ulle monacho del vetere ecclesia celtic de Irlanda e Scotia presentava le symptomas de nesomania, on le invitava a viver sol super un insula parvissime, pensante que le problemas disapparerea finalmente. Qual error! Quasi sin exception le remedio tanto exacerbava le morbo, que le povre monacho se retirava joiosemente a su insuletta e mesmo exprimeva le desiro de esser interrate ibi post su morte.
Il es fortunate que nesomania ancora rarmente se trova super le continente de Europa, ubi su incidentia sembla plus grande in Grecia, Danmark, e Britannia, que, per exemplo, in Austria o Bulgaria. Tentativas moderne e costose a curar le maladia include, in Danmark e Scotia, le construction de pontes inter insulas pro destruer le isolation tanto amate de nesophilos, e, in Nederland, le disaquation del mar circumferente pro ligar le insula al terra vicin, ma il es improbabile que on potera usar tal methodos in paises como Grecia, le Bahamas, Indonesia, Kiribati, o qualcunque regiones de Micro-, Mela-, e Polynesia. Ibi nesomania rege e regera incontrolate.
(Per Adrian Pilgrim, publicate in Panorama, januario-februario, 1998)
COMMERCIO DE SCLAVOS IN INDIA
India: Le urbe maritime de Masulipatnam - nunc Machilipatnam - durante le seculo decimo-septime esseva sub le sultan de Golconda, Mohommad Quli (1580-1611). Il esseva ab ille que le hollandeses, in augusto, 1606, obteneva un "firman" (derecto regal) per le qual illes poteva establir in le urbe un "factory" (un station commercial), cargate per le duo officiales Pieter Eyloff e Willemsz. Iste loco in le urbe ancora se appella Valanda-Palem ? Valanda essente le corruption de Holland, e Palem significante village, loco.
Sin dubita non existe plus le "factory", ma on pote trovar unes tumbas hollandese protegite per le departimento de archeologia. Le organisation del "factory" e su personal esseva tal que nulle difficultate era experientiate quanto a compras del drappo facite in le hinterland.
Un mercante superior attendeva al affaires general del "factory", durante que un mercante inferior le assisteva a comprar mercantias trahite del interior. De plus se empleava plure assistentes pro portar moneta al hinterland pro comprar textiles e altere articulos in le deltas del fluvios Krishna e Godavari ? e anque pro traher los al"factory".
Tamen, plus ardorosemente exigite que textiles esseva sclavos requirite a popular e cultivar colonias hollandese in Banda, Amboina, Moluccos, e Batavia. On estimava que ab 2.000 a 3.000 sclavos era inviate in 1621 ab Masulipatnam a Batavia, Amboina, e Banda.
Multo frequentemente Batavia inviava a Masulipatnam requisitiones pro sclavos tan grande que ille non poteva plenar los. Dunque le establimento hollandese de Masulipatnam permitteva que mercantes indian portava sclavos a paises del Asia sud-est..
Consequentemente un mercante muslim de Masulipatnam, Mohammad, esseva autorisate de collectionar viros e feminas, e le hollandeses permitteva que ille usava lor proprie naves pro transportar los a Batavia.
De plus, un anglese, Alberto Gomes, qui era empleate per le portugeses desde su infantia ? habeva permission pro emer sclavos in Masulipatnam e pro portar les a paises in Asia sud-est pro vender les.
Un grande numero de sclavos era disponibile in Masulipatnam durante le tempore de fames.
Totevia, iste commercio lucrative cessava quando le hollandeses, a causa de rivalitate politic contra angleses e portugeses, transfereva lor interesses a insulas est-indian, ubi illes comenciava a cultivar species.
(Per P. Narasimha Rao, publicate in Panorama, januario-februario, 1998)
Le czar fini su dies in Sancte Petroburgo
RUSSIA. Venerdi le 17 de julio – al 80-esime anniversario del assassination del ultime czar de Russia – Nicolai II, su sposa Aleksandra, le cinque infantes del copula e quatro servitores essera sepulcrate in Sancte Petroburgo, le russe capital imperial. Le governamento russe decideva le 27 de februario unanimemente que le assassinatos debe reposar in le Cathedral Petro e Paulo. In illo, omne czares russe ha essite sepulcrate desde le tempore de Petro le Grande in le initio del annos 1700. Le familia del czar esseva assassinate per le bolchevicos ante 80 annos. Intertanto plure citates – includente Moscova e Iekaterinburg – ha luctate pro voler sepulcrar le familia in lor citate. Le restos skeletal esseva trovate in 1991, e on ha dubitate le identitate de omne le personas trovate. Ma ora illes finalmente essera sepulcrate.
Anglese domina ora in le Union Europee
UNION EUROPEE. Anglese comencia devenir le lingua dominante in le commission del Union Europee, removente francese. Durante un periodo assatis longe, 42 pro cento del documentos official esseva traducite al 12 linguas official sur base de un texto original anglese, durante que 40 pro cento esseva originalmente in francese. Germano "ganiava" solmente sex pro cento, espaniol e italiano solmente tres pro cento.
Francese esseva durante decennios le lingua le plus usate como lingua de labor e como base de textos scripte, ma ora anglese ha assumite iste position. Le membrato de Svedia e Finlandia ha addite a iste developpamento, ma le allargamento futur del UE con paises central- e est-europee es expectate pulsar ancora plus al tendentia. Ante solmente poc annos anglese deveniva lingua equal con francese in le sala de pressa del commission del UE, ubi jornalistas cata die es informate super nove initiativas. Usque alora francese esseva le sol lingua usate, mesmo si le UE ha 12 linguas official, in le quales omne documentos – in principio – debe esser traducite, justo como le europarlamentarios etc. sempre pote usar lor lingua materne in debattos e scriptos.
Condolentia al suicidio
Le producente le plus grande de cartas de felicitationes e condolentias in le SUA, Hallmark, ha lanceate un carta a usar pro le familia de un victima de suicidio. Le copertura porta un parve barca e un grande celo plen de nubes. Le texto dice: "Quando un car escappa ab le vita, illo es si difficile a comprender. Ma le Creator vide lo que nos non vide, e ille ja ha date su benvenita a tu car." Suicidio es le causa de morte le none plus sovente in le SUA.
Aqua mineralissime
Aqua mineral sembla haber devenite le bibita national de Danmark. Le daneses bibeva in 1996 102 milliones litros de aqua mineral – in danese appellate "danskvand" (aqua danese). In 1997, le consumption habeva crescite a 146 milliones litros.
LE TERRA COLLABE SUB MEXICO CITY
Mexico: Pumpage vorace de aqua de fundo face le terra sub le capital mexican descender. Le ancian edificios se finde, tubos de cloaca e tunnels pro le traino subterranee rumpe, e le aqua potabile debe esser trovate alterubi.
In le initio de iste seculo le duo lacos circumferente Mexico City, quando illo originalmente esseva fundate in 1519, habeva disparite, e on comenciava fossar in le terra pro pumpar sempre plus de aqua pro le sempre crescente numero de habitantes; hodie 18 milliones habita in le capital mexican. Durante le prime decennios de iste seculo, le centro descendeva cinque centimetros per anno, ma plus tarde isto deveniva 47 cm per anno.
In 1910, le systema de drainage functionava ben. Un grande canal assecurava que le aqua quitava le urbe pro ir al Golfo Mexican. In 1950, le terra ha cadite tanto que le aqua residual debe esser pumpate in alto pro attinger le apertura del canal residual. In 1970, le canal residual non del toto functionava. Ora on establi un nove systema residual multo plus profunde sub Mexico City sin ulle inclination del canal. Le rete es de 198 km e ha costate quasi un milliardo dollars.
Multe edificios historic, ecclesias, e palatios antique ha essite destruite per le cadita del terreno. Pro isto, on cessava pumpar aqua ab le centro e lo transportava in vice ab le peripheria. Isto stoppava le cadita in le centro a 2,5 cm per anno, ma in certe suburbios le terra continua descender 45-70 cm per anno, scribe New York Times.8% del aqua potabile essera pumpate 1.300 metros in alto al rivo Cutzamala, a 128 km west del urbe. Ma Mexico City ha un rete multo permeabile de distribution. Circa un tertio de cata litro de aqua pur, pumpate a in le systema, dispare. Isto darea assatis de aqua pro provisionar le urbes Guadalajara e Monterrey con in toto 2,7 milliones de habitantes.
(Per Thomas Breinstrup, publicate in Panorama, martio-april, 1998)
FAMOSE CAMPO DE BATTALIA HISTORIC TROVATE
Germania: Le battalia decisive inter tribos germanic e le invadente legiones roman in anno 9 post Christo habeva loco 20 kilometros al nord del citate Osnabrük.Archeologos german ha trovate le loco.
Le imperio Roman experientiava su defaite le plus seriose quando le germanos stoppava le legiones de Varus. Circa 15.000 soldatos roman moriva durante le battalia. Usque ora on non ha potite trovar le loco exacte ubi isto occurreva, ma archeologos german ha trovate tracias roman de carrossas presso le citate Bramsche al nord de Osnabrück. Le tracias esseva trovate in un strata antique de plure kilometros, establite per le germanos, ma le romanos lo usava pro lor invasion.
"Il sembla que le germanos les escava in un trappa inter un area de marisco e le monte Kalkrieser, 157 metros alte", dice le archeologo Wolfgang Schlüter. Ille pensa que le action esseva planificate ben per le germanos, qui habeva construite un minor fortalessa in le vicinitate, e ab ci on attaccava le legiones roman al flancos.
Un legion roman esseva normalmente de 4.000-6.000 personas. On non reportava de superviventes. Quando le nova del massacro attingeva Roma, imperator Augusto diceva le parolas famose: "Quintulus Varus, retorna me mi legiones". Un essayo per le ductor Germanicus de penetrar in Germania in anno 16 p. Chr. anque errava. Le romanos se concentrava de defender le linea al Rheno, establiente un catena de citates fortificate: Colonia, Bonna (Bonn) e Conflutentes (Koblenz).
Per Thomas Breinstrup, publicate in Panorama, martio-april, 1998).
RADAR REVELA SECRETO DEL ANCIAN ANGKOR
Cambodia: Picturas prendite ab un radar del NASA ha revelate restos celate del ancian templos in Angkor Wat in Cambodia. Le methodo pote revolutionisar le maniera in le qual archeologos specta al developpamento del ancian citate.
Le radar AIRSAR esseva developpate per NASA. Illo detegeva un distribution de circular vallos prehistoric e templos non documentate al nordwest de Angkor. Angkor es un complexo enorme de 1.000 templos in le nord de Cambodia, construite per hindus e buddhistas. Illo coperi un area al grandor de Los Angeles, SUA. On expecta que illo in le era auree habeva un million habitantes. Le templos esseva construite ab le 8-ve al 13-tie seculo p. Chr. e esseva accompaniate per un massive systema hydrologic de reservoirs e canales. Hodie, le majoritate del civilisation de Angkor es celate per un dense boscage forestal e es inaccessibile a causa de mal vias, minas terrestre, e instabilitate politic.
Tres typos de imagines de radar esseva usate. Illos esseva prendite per le Jet Propulsion Laboratory de NASA ab un avion circulante supra le area.
"Le mappas de radar non solmente questiona conceptos traditional del evolution urban de Angkor ma revela evidentia de templos e civilisation precoce o absente o incorrecte in mappas topographic moderne e in reportos archeologic del initio del 20-esime seculo", dice dr. Elizabeth Moore, chef del Departimento de Arte e Archeologia del Schola de Studios Oriental e African al Universitate de London.
Le parve vallo in le perimetro del famose templo esseva discoperite in le imagines de radar in decembre, 1997. Post isto recercatores iva a pede in le area e trovava restos de un edificio del 10-me seculo. Reportos archeologic ab 1904 e 1911 non mentiona le forma circular distincte del vallo. On trovava quatro a sex restos de templos, anque structuras pre-angkorean, que suggere que on occupava le sito circa 300 annos plus tosto. Isto cambia radicalmente le chronologias acceptate super Angkor.
Elizabeth Moore anque discoperiva un sito con un templo al grandor de un stadio de football. Anque isto non esseva in ulle mappa.
"Le nove detaliate mappas topographic ha monstrate nos multe cosas hydrologic e demonstrate como illos functiona in le rituales e via quotidian del populo khmer",diceva Elizabeth Moore.
Angkor es situate al orlo del laco Tonle Sap. Le aqua del laco duplica in grandor durante le saison de pluvia. Per medio de mappas tridimensional on comprende melio le impacto human del ecosystema ab le ancian khmeres usque a hodie.
John Stubbs ab le Fundation pro Monumentos Mundial nomina le trovatas"extrememente promittente".
NASA expecta usar un simile systema de radar in su missiones spatial in 1999. Isto pote presentar circa 80 pro cento del superficie del Terra in detalios non experientiate ancora.
(Per Thomas Breinstrup, publicate in Panorama, martio-april, 1998)
ANTIQUE PONTE PROVA TECHNOLOGIA MEDIEVAL
SUA: Secundo un articulo in Science, (Scientia), le residuos de un grande ponte irlandese facite per ligno ha essite discoperte al fundo del rivo Shannon presso le village antique de Clonmacnoise. A 160 metros in longitude, illo es possibilemente le plus grande structura de ligno del comenciamento del medievo trovate usque ora in Europa. Su complexitate technic ha surprendite le archeologos. Le recercatores ora crede que le ponte, datate de 804 del era christian, esseva le labor de monachos del village vicin de Clonmacnoise.
Secundo le archeologo John Bradley del Universitate National de Maynooth, le discoperta de iste ponte fortia un revision de nostre conceptiones del Etate Medieval. Il habeva usque ora necun evidentia de grande pontes in Europa inter le era roman e circa 1100 post Christo. Mogens Schou Jorgensen es un experto super le grande pontes de ligno constructe per le vikings plure seculos plus tarde. Ille opina que pontes similar essera discoperte in Irlanda, como occurreva in Danmark post que le prime ponte de vikings esseva discoperte in 1932. Si isto es ver, illo significa que in le 9-ne seculo il habeva un rete de communicationes terrestre trans Irlanda.
Duo scafandreros, Donal Boland e Mattie Graham, qui se specialisa in le archeologia subaquatic, comenciava un studio del Rivo Shannon post incontrar un referentia interessante a un ponte in le Annales de Clonmacnoise, scripte in 1158. Illes se concentrava lor cerca in un region del rivo de circa 500 metros in largessa presso le ruinas de un antique monasterio.
In 1994 sub le direction archeologic de Fionbarr Moore del Servicio de Monumentos National de Irlanda, illes trovava lo que illes cercava: un antique palo de querco, projicente se del fundo del rivo. Usque al ultime autumno illes habeva trovate un toto de 130 pecias de ligno, toto arrangiate nettemente in pares 5 metros a parte, extendente se trans le plen largessa de 160 metros del rivo. Illes anque trovava nove piraguas (canoas de lignos extranchate), de que obreros possibilemente habeva injectate le palos in le fundo del rivo, e le residuo de un systema elaborate de supportos cruciconnecte que supportava un via super le ponte.
Le linea de palos curreva directemente a in le ruinas de un castello normanne del 13-tie seculo, ducente les initialmente a creder que le ponte esseva anque un construction normanne. Mais iste theoria esseva excludite post que illes inviava exemplos del lignos de querco al Universitate del Regina a Belfast pro datar los per analyse del anellos arboree. Le lignos esseva tranchate in 804, 365 annos ante le arrivata del normannos de Francia.
Le archeologos alora refocalisava lor cerca al colonia monastic a Clonmacnoise. Le urbe de plure milles habitantes esseva situate preter un via del est al west trans Irlandia, cognoscite como le Eiscir Riada, o Via de Eskar, que transversava le Rivo Shannon a iste puncto. Secundo Aidan O’Sullivan, le Director del Archeologia de Clonmacnoise, le ponte esseva constructe pro attraher le commercio, e le direction del construction esseva probabilemente providite per le monachos.
Le discoperta del ponte a Clonmacnoise ha ducite le archeologos a questionar si le cognoscentia del technologia roman esseva realmente perdite post le cadita del Imperio de Roma, al minus in partes distante del Europa que esseva sparniate le chaos del Etate Medieval. Bradley crede que le irlandeses conservava le textos roman. Illes anque poteva haber conservate al minus le cognoscentia del construction de pontes del romanos. Assi le populo del Etate Medieval non esseva semper si ignorante como on ha credite.
(Per Stan Mulaik, publicate in Panorama, martio-april 1998)
PIRATAS ESSEVA SOCIAL
Grande Britannia: Piratas non esseva personas brutal qui voleva vider sanguine. No, illes esseva robatores con un conscientia social, forsan predecessores de un socialista democratia popular.
Isto monstra examines scientific de cosas ab un nave de piratas, "Whydah", que in 1717 naufragava e in 1884 esseva trovate vicin al costa de Massachusetts. On ha anque analysate papiros in archivos american e anglese.
Le experto britannic de piratas, Daid Cordingly, ha scribite un libro super piratas como un gruppo de "expulsatos" con fixate regulas social e mesmo ethic de como conducer se. Su libro tracta del era auree de 1680 a 1725. Le naves de piratas esseva democraticamente organisate. Decisiones esseva prendite secundo votationes, mesmo le capitano sovente esseva eligite per le equipage. In ultra, le piratas esseva politicamente correcte. Il habeva nulle discrimination contra minoritates e nulle racismo. Il ha provas que un equipage con majoritate blanc eligeva un capitano nigre.
Un pirata qui perdeva un bracio o un gamba recipeva un compensation — como le pension pro invalides de hodie. E si le pirata moriva durante un battalia, su vidua o infantes recipeva un compensation.
(Per Thomas Breinstrup, publicate in Panorama, maio-junio, 1998)
ITALIA TROVA DINOSAURO BEN PRESERVATE
Italia: In Italia scientistas italian ha discoperite un dinosauro 24 centimetros longe que es si ben preservate que illo da nove informationes al paleontologos.
In le magazin scientific american Nature, on vide detalios del musculos e intestinos del dinosauro, un therapodo juvene appellate Scipionyx samniticus. Illo es in parentela distante del grandissime Tyranosaurus rex.
Le dinosauro italian moriva ante circa 113 milliones de annos post haber cadite a in un laco. Le basse contento de oxygeno in le aqua e le factor que illo esseva trovate in fango fin es le causa de su bon preservation.
Le dinosauros appareva ante circa 200 milliones de annos e esseva le maestros del Terra usque ante circa 65 milliones de annos.
(Per Thomas Breinstrup, publicate in Panorama, maio-junio 1998)
PYRAMIDE RECOPERITE PER ANCIAN BRICCAS
Egypto: Le pyramide le plus parve al plana de Giza, extra Cairo, debe esser re-inveloppate per briccas de rubie granito, como illos esseva in le antiquitate.
Le plano comprehende 2.000 briccas e es expectate durar dece annos. Le briccas ha essite trovate in tote le plano. Certes de illos pesa usque a 1,5 tonnas.
Le pyramide a esser re-inveloppate es illo de Mycerinos, rege inter 2490 e 2427 ante Christo. Illo esseva reaperite in martio post plure annos de restauration e es le plus parve del tres pyramides al plana, ubi anque le Sphinge se situa. Ja le anno passate archeologos e expertos comenciava mesurar e registrar le briccas trovate. Le granite esseva originalmente transportate in barcas per le Nilo ab Aswan — ubi se trova hodie le grande barrage — al plana de Giza.
On expecta que le re-copertura del pyramide costara circa cinque milliones dollars. Isto al mesme tempore protegera le construction pyramidal.
Solmente un tertio del fundo del pyramide esseva coperite per granite, e 70% del briccas cadeva de novo.
(Per Thomas Breinstrup, publicate in Panorama, maio-junio 1998)
POPULOS CAUCASOIDE IN AMERICA ANTIQUE?
SUA: Secundo le jornal Science, 10 april 1998, in le prime septimanas de april un helicoptero operante sub le direction del Corpore de Ingenieros del Armea in le Statos Unite discargava grande blocos de petra e gravilla preter le ripa del Riviera Columbia presso le village de Kennewick in le stato de Washington. Le objecto de iste operation esseva stoppar le erosion a un puncto preter le ripa del riviera, ubi on discoperiva circa duo annos antea un ancian skeleto de 9.300 annos ante le presente, cognoscite como "Le homine de Kenwick." Lo que es significante es que iste skeleto ha alcun characteristicas caucasoide.
Totevia, anthropologos dice que iste operation va interrar le sito — ubi additional ossos esseva discoperite justo duo septimanas ante isto — in loco de proteger lo. Illes mesmo ha convincite le Congresso a passar un lege interdicente le operation. Mais proque le legislation non esseva finite ante que le Congresso vadeva in recesso, le lege non poteva stoppar le movimento del terra.
Isto es solmente le plus recente torno in un lucta acrimoniose super un trovata que, multe archeologos crede, poterea provider indicios importante super le population del America antique. Octo anthropologos prominente ha citate in judicio le Corpore de Ingenieros del Armea, que ha le jurisdiction del sito Kennewick, pro le permission a investigar le sito pro studiar le ossos del Homine de Kennewick. Mais le Corpore vole dar le skeleto al Tribo de Umatillas, un tribo de indianos de nordest de Oregon, pro reinterramento, sub le Acto de 1990 pro le Protection e Repatriation de Tumbas de Americanos Native (le indianos). Iste conflicto es un parte de un plus grande lucta super qui va controlar le prehistoria american, con le credos religiose de americanos native opponente le theorias ancora evolvente de scientistas super le prime americanos.
Le scientistas in iste caso dice que le parve quantitate del recerca que le anthropologos ha jam facite super le Homine de Kennewick e alcun pauc altere americanos antique suggere un diversitate surprendente intra le original americanos, que da indicationes de un historia complexe e largemente incognoscite. In lor opinion le question de qui esseva le prime americanos es ancora non constante. Illes vole compler un analyse del ADN del Homine de Kennewick, que le Corpore interrumpeva quando illes sasiva le skeleto.
Quando le ossos del Homine de Kennewick esseva discoperite initialmente, le bureau del policia appellava a un anthropologo forense independente pro examinar le skeleto. Basate super le forma del cranio, ille opinava que le skeleto esseva de un pionero caucasian del 19-me seculo. Mais quando le datos de radiocarbon indicava le skeleto a esser 9.300 annos in le passato, le Corpore sasiva le skeleto in preparation pro retornar lo al Umatillas pro interramento.
Skeleto dissimilar a indigenas
Le homine de Kennewick non es le sol skeleto que es dissimilar al indigenas contemporanee. Un altere skeleto cognoscite como le Homine de Caverna del Spirito, que es de circa 9.000 annos in le passato, non es similar al indigenas moderne. Le volta cranial es plus alte, e le facie es plus stricte. Intra populos vivente, le Homine de Caverna del Spirito es le plus similar al Ainu de Japon, le gruppo de populo que originalmente populava ille archipelago.
Ben que le analyse de ADN de skeletos antique sovente discoperite in le Statos Unite es similar al ADN de indigenas moderne, isto possibilemente non es le caso con skeletos como le Homine de Kennewick e le Homine de Caverna del Spirito. Secundo Science del 24 de april, 1998, al fin de april in Salt Lake City un anthropologo molecular del Universitate Emory in Atlanta, Georgia, SUA, Theodore Schurr, presentava resultatos de un studio de ADN de e indianos american, europeos, e asiaticos.
Le nove datos basate super un marca genetic nominate appropriatemente "Lineage X" suggereva que il ha un ligamine definite inter euroasianos e nordamericanos. Iste marca genetic es multo rar in le ADN de indianos american moderne. Nonobstante illo existe. Illo es anque incognoscite in le ADN de asiaticos. Mais illo ha essite discoperite in populationes eurasian, p. ex., inter alcun finneses, italianos, e certe israelitas. Il anque ha alcun indicationes que illo anque appare in turcos, alcun espanioles, e bulgaros.
Certe anthropologos qui studia le origines del population de America del Nord ante le arrivata del europeos dice que iste connexion inter certe indianos e populos de Eurasia pote explicar le casos problematic de certe skeletos de characteristicas caucasoide de un antique etate in America del Nord, como le Homine de Kennewick e le Homine de Caverno del Spirito. Possibilemente populos eurasian ha migrate a America del Nord in le antiquitate.
(Per Stanley Mulaik, publicate in Panorama, maio-junio, 1998)
SITO ASTRONOMIC LE PLUS ANCIAN TROVATE
Egypto: Un serie de grande petras trovate in Egypto es le monumento le plus ancian connectite con astronomia.
Scientistas ha confirmate que le circulo de petras e cinque lineas de megalithos stante e cadita in Nabta, al west del Nilo in le sud de Egypto, ha 6.500 annos. Isto es 1.000 annos plus ancian que Stonehenge al nord de Salisbury in le sud de Grande Britannia. Stonehenge esseva erigite ca. 1900-1650 a.Chr., usate per un culto del sol.
Le petras in Nabta contine quatro pares. Duo pares esseva alineate in direction nord-sud, durante que un altere es dirigite verso le horizonte del solstitio estive.
Le monumento esseva usate per nomades usque ante 4.800 annos. Illo es situate al ripa de un ancian laco que esseva plenate per aqua ante 11.000 annos, quando le monson estive african cambiava a nord. Ante 4.800 annos le monson de novo cambiava al sud.
(Per Thomas Breinstrup, publicate in Panorama, maio-junio, 1998)
CHARME VIENNESE REMANE MALGRADO DANUBIO DISCOLORATE
Que le fluvio Danubio non plus es blau ma plus tosto gris-verde non es un secreto. Ma malgrado iste cambio de color, post le composition del walzer de Strauss le capital de Austria, Vienna, ha mantenite su charme e commoditate.
In le vita quotidian on non audi multo super le rege del walzer Strauss, ma in leStadtpark de Vienna sta le statua famose in plen corpore de Johann Strauss Junior con su violino al spatula, e statuettas de omne compositores — anque non‑viennese — pote esser comprate in le majoritate del botecas de souvenirs, anque como candelas pro le tabula.
Le musica in Vienna vive. In quasi cata decente "Strasse" o "Gasse" se trova plure librerias con selectiones ample de obras/biographias super le homines detra le musica classic, e un multitude de botecas de discos non poteva superviver sin un grande assortimento de musica classic sur cassettas o discos.Le musica ha per le vita theatral e concertal anque un loco central in le vita quotidian del vienneses. Le special "Bundestheaterkassen 70" in Goethegasse, detra le anterior burgo del imperator, Hofburg, se occupa del vendita de tickets al grande theatros e casas de concerto como "Volksoper". "Staatsoper", etc.
Estranieros ha le avantage de poter demandar tickets ab cassa 14 dies in avantia. Le vienneses mesme solmente pote obtener tickets septe dies ante le representationes, e quasi sempre illes es exhaurite, e assi multes veni in van malgrado le grande offerta variate.
Del resto on expecta que le publico arriva in belle vestimentos in e le theatro e le sala de concerto. Assi es recommendabile portar iste parte del guardaroba con se in coffro.Es facile ir al representationes. Vienna ha trames, autobuses e trainos subterranee, e un carta commun pote esser comprate. E on non debe timer perder se. Le nucleo central del citate circum Hoffberg es parve, e si on se sede in un tram o traino subterranee, on es in vicinitates rural post dece minutas.Le "U-Bahn" es specialmente multo munde con bon luce e commode scalas rolante. Fumar es ubique in le terrenos subterranee prohibite (anque in le trainos). E le "U-Bahn" e le trames es un agradabile modo de viagiar, e ci como in le autobuses le information es vermente bon. Ante cata halto le passageros audi le nomine del halto e altere connexiones traffical per le altoparlator.
Vienna es un belle citate que non pro nihil es le "capital del musica". Con le plus pictoresc Salzburg in le pensatas, Vienna vermente al prime momento pare un poco disappunctante, ma quando le expectationes se ha accostumate al citate, on discoperi su charme: belle flores, grande fenestras de ancian moda del botecas, parve cafe viennese, carros de cavallos, sempre surridente e amical vienneses (non solmente un mytho del guidas touristic) e multo plus.
Le lingua demanda un certe accostumation, proque le tono sona alteremente belle que in le pais vicin, Germania West. Si on abandona un boteca con le parolas "Auf Wiedersehen", le expeditor replica "Auf Wiederschauen". Si on ora crede que isto es le expression normal pro "a revider", on es stupefacite quando on le proxime vice essaya "Auf Wiederschauen". Le responsa deveni "Auf Wiedersehen", e le systema es non repeter le replica del unes le alteres. Solmente assi es recognoscite le ver austriaco.
Mangiar es equalmente importante pro le austriacos como pro omne alteres, e le mangia national e estranier se trova ben in Vienna. Tortas non es mangiar, ma in le parve cafe on se incontra tote le die con un torta e un tassa de the o caffe de alcun sorta. Caffe a saper es multe cosas, e in le local e commodemente arrangiateCafeKonditorei L. Heiner ab 1840 in Wollzeile 9 presso Stephansdom le offerta de caffe pare assi: Kanne Kaffe, Kl. Mokka, Kl. Brauner, Kapuziner, Melange, Melange mit Schlag, Gr. Mokka, Gr. Brauner e Einspener!
In le vespere il ha ric possibilitates de mangiar austriac schnitzel natural con ris tornate in butyro, ma le cocina japonese, arabe, italian, chinese, e hungare se manifesta — le ultimo mentionate como un reminiscentia del imperio austriaco-hungare.In le central via de marchar, Kantnerstrasse, presso le majestatic Stephansdom es assi situate "Olympia", cuje nomine non pare multo hungare, ubi un orchestra de jardin con palmas de tres personas da furiose, hungare tonos tsigan ab le puszta, durante que un forte suppa de gulash ric de patatas, pipere rubie, e deliciose carne de vitello es mangiate con pan nigre.Si on prefere le mangiar italian de bon mercato, le catena international Pizzaland pote esser recommendate con un offerta ric de lasagna, spaghetti, e pizzas. Le ultimo mentionate es servite deliciosemente con alte bordo in le patella como "Pfandlpizza".Un curiositate es ir al "restaurante" presso le macellero, ma Ziegler sur Kohlmarkt 11 offere — in ultra del normal — suppa de gulash, porco rostite, e altere repastos calide a mangiar stante sur pede presso parve tabulas in le botecas absolutemente commode.
Le color plen blau del undas del Danubio vermente ha disparite in favor del nuances plus obscur, quando le fluvio rola a transverso de Vienna, ma le citate e su habitantes mantene le imagine ancian e idyllic "An der grünen, grauen Donau".
(Publicate in Panorama, julio-augusto, 1998)
VALLEA DEL FLUVIO LIGER: MI PARVE ORIENTE
Le Turchia e super toto Cappadochia ha monstrate a nostre amica Elly-Angela le mundo meraviliose del roccas e del ecclesias sub le terra. Mi viage es multo curte, alicun kilometros de Germigny a Sully, al ripas de Liger (=Loire).
Germigny es un village quiete, ubi se trova un ecclesia parve fundate verso 800 per un episcopo, amico del imperator Carolo Magne. Le edificio era certo minate per e guerra del Vikings, o normandicos, e anque per le tempore, pois fortemente restaurate verso 1840. Le plano es grec, quadrate. Le volta es simile a un modello armenian (7-e seculo) plus un turre-lanterna anque inspirate per le Oriente. Le volta est porta un mosaico con le colores auro, argento, azur, verde, e rubie, secundo le maniera de Ravenna.
St. Benoit sur Loire habeva un abbatia ric e potente, con reliquias salvate del Monte Cassino (7-e seculo). Le bibliotheca era vendite e dispersate a causa del guerras (10 seculo) usque Moscova. Nos pote admirar le basilica vaste e robuste, de stilo roman. Le grande turre o campanil-porta possede sculpturas remarcabile, le nave e le choro es harmoniose. On videra le crypta de St. Benoit e le tumba del rege Philippo I. Iste nomine oriental veni perque su matre era un princessa de Kiev, le prime citate capital de Russia. Un tal maritage Francia-Russia in iste tempore lontan (1050) es multo rar.
Vos trovara a Sully un castello del 16-e seculo e le memoria del famose ministro del rege Henri IV—e plure belle salas.
On debe incoragiar illes qui visita e describe paises que non es vermente "classic"pro nostre historia, ma que era un cuna celate de nostre patrimonio. P. Ex. Turchia e Armenia, e hic presso Orleans le edificios del ancian e obscur tempore, circa le anno 1000.
(Per Pierre Humbert, publicate in Panorama, julio-augusto, 1998)
DINOSAUROS PLUMATE TROVATE IN CHINA
China: Secundo articulos in Science del 26 de junio e Science News del 27 de junio de aqueste anno, paleontologos cercante a delinear le evolution del reptiles a in le aves ha finalmente discoperte lo que illes cercava, un dinosauro plumate.Un tal creatura, secundo Science, provarea finalmente lo que multe scientistas jam crede, que le dinosauros non deveniva totalmente extincte mais disveloppava le volo e se evolveva a in lo que nos nomina le aves.Solmente duo annos retro un dinosauro esseva discoperte con filamentos plumatoide super su dorso, mais multe recercatores non poteva accordar se si aquestos esseva realmente plumas.Ora un equipa de paleontologos chinese, canadian, e american assere que illes ha discoperte le cosa real, dinosauros plumate in ric depositos fossile in China. In le jornales scientific Nature e National Georgraphic, illes describe duo species de therapodos (dinosauros carnivore) de grandor de un gallo de India, que clarmente possedeva plumas proque illos veniva con plumas fossile.Un fossile esseva date le nomine scientific Protarcheopteryx robusta proque illo possedeva un anatomia plus primitive que le ave le plus primitive usque ora cognoscite, le Archaeopteryx, de 150.000.000 annos in le passato, trovate in lo que ora es Germania. Le altero, Caudipteryx zoui, de que esseva trovate duo specimenes, es plus proxime al aves.Le fossiles trovate es clarmente therapodos e non aves proque manca a illos certe characteristicas skeletal de Archeopteryx e aves moderne. Le paleontologos crede que iste dinosauros plumate non poteva volar proque illes possedeva relativemente curte membros anterior., curte plumas, e un corpore duo vices le grandor deArcheopteryx. De plus, lor plumas possedeva un forma symmetric como aquello in le aves nonvolante de hodie. Nonobstante aqueste fossiles veniva con plumas definite.Ben que certe paleontologos non es totalmente convincite — arguente que aqueste fossiles es de aves antique que ha perdite le poter de volar e ha evolvite a formas similar a dinosauros — le majoritate de paleontologos non se accorda a aquesto. Le fossiles es clarmente dinosauros e non aves nonvolante.Le theoria es que si le plumas initialmente pareva super habitantes terrestre, illos serviva alcun altere function non connecte con le volo. Alcun scientistas opina que iste protoplumas evolveva initialmente pro insular le corpores de parve therapodos. Plus tarde iste animales forsan usava plumas plus grande pro attraher accopulantes.(Per Stanley A. Mulaik, publicate in Panorama, julio-augusto 1998)
EXPLOSION SOLAR VA DISTURBAR SATELLITES
SUA: Un explosion in le atmosphera del Sol pote esser un signal de un serie de tempestates solar que poterea disturbar le communication in tote le mundo e impericular aviationes in altitudes grande.
Assi dice Alan Title, recercator gerente del Instituto Stanford Lockheed pro Recerca Scientific in Palo Alto, California. Ille expecta le tempestates e maculas solar a culminar in 2000, e isto pote causar explosiones si grande que satellites e cercatores electronic de personas es disturbate quando le consequentias del explosiones penetra le sphera magnetic del Terra. Similemente, aviones militar que vola in altitudes grande riscara alte nivellos de radiation.
Le 31 de maio, un forte explosion 88.000 km longe e 322 km large occurreva in le atmosphera del Sol. Illo se moveva con 3,2 milliones de km/hora.
Le 17 de novembre un tempestate de meteores “Leonid” potera disturbar le 500-600 satellites in orbita circum le Terrra. Le tempestate occurre cata novembre. Le particulas de arena del cometa se move plus velocemente que le balla de un calibre .22. Illos non pote penetrar le satellites ma pote crear quadros electronic que destrue equipamento electronic. In Japon, Corea, Okinawa, e Australia del Nord on potera vider le melio le 200-5.000 meteores per hora in le tempestate que durara cinque-sex dies.
(Per Thomas Breinstrup, publicate in Panorama, julio-augusto 1998)
GRANDE PONTE DE VIKINGS TROVATE
Danmark: Le ponte de vikings le plus ancian ha essite trovate in Nybro, octo kilometros al west de Varde in le peninsula danese Jutlandia. Illo se data de circa 800 annos. Inter le trovatas esseva anque un moneta arabe con un cavo, fabricate in Baghdad.
Le ponte es le construction le plus ancian trovate in Danmark. Usque hodie le ponte in Ravning, vicin a Vejle, ha tenite iste predicato, ma illo es alcun centos de annos plus juvene.
Le palos de querco se data de anno 791, secundo le Museo National danese. On ha excavate plus que 100 tal palos al ponte que es tres metros large e 50-60 metros longe. Le palos sta in le excavationes quasi como ante 1.200 annos, gratias al terra fungose que protege le ligno contra putrefaction.
Un moneta ab Baghdad del periodo 815-860 anque esseva trovate. Illo ha un cavo al centro e esseva usate como un joiel. Le archeologos—gaudiose — anque trovava un hacha ferree con un ben conservate manico de ligno.
Le ponte esseva trovate ante que on in le pentecoste placiava un tubo de gas natural ab le Mar del Nord. Le archeologos spera que le tubo de gas non cambiara le nivello del mar assi que le remanente palos putresce, nam un certe numero de palos remane al loco.
(Per Thomas Breinstrup, publicate in Panorama, julio-augusto, 1998)