Panorama 1994
ENORME CAVA EXPLICA LE DISPARITION DEL DINOSAURIOS
SUA: Le cadita del meteoro, que significava le extinction del dinosauros ante 65 milliones annos, creava un cavo si grande como Belgica. Isto es usque dece vices plus grande que antea credite per le expertos.
Le revista Science (Scientia) reporta super nove investigationes al presumite loco del cadita, le peninsula Yucat? in Mexico. Un crater, que previemente esseva estimate a haber un diametro de 175 km, es secundo nove analyses 300 km, quasi como Belgica.
Isto face plus credibile le theoria del sequente undas fluvial, eruptiones vulcanic, incendios del forestes, e dramatic cambios climatic. Le crater Chicxulub es le plus grande del interne systema solar.
Le crater esseva discoperite solmente ante dece annos, proque illo esseva plenate de depositos de petras de calce. Virgil Sharpton, scientista al Instituto Lunar e Planetari in Houston, Texas, pensa que le crater esseva create per un explosion que equivaleva 100-300 milliones megatonnas de TNT.
Ille estima que le explosion jectava in le atmosphera 200.000 kilometros cubic, que faceva que le sol dispareva pro plure menses. Isto debe haber create un breve etate glacial, que eradicava le dinosauros.
Le theoria del grande explosion esseva lanceate in 1980 ma non esseva universalmente acceptate, proque nemo poteva indicar un crater de un grandor que possibilemente poterea explicar un si enorme catastrophe de natura.
(Publicate in Panorama, martio-april, 1994)
SIGNOS DE VITA AB UN DINOSAURO
SUA: Paleontologos american assere que illes ha trovate globulos de sanguine rubie in un osso de femore ab un tyrannosaurus rex, 65 milliones annos de etate. Assi ille lo pensa possibile poter extraher le material genetic DNA.
Le osso es, secundo The New York Times, multo ben conservate como parte de un skeleto petrificate, excavate ante tres annos in le est del stato Montana. Le paleontologo Jack Horner ab le Universitate Statal de Montana crede que ille pote comparar le fragmento genetic con le DNA ab vivente crocodilos e aves.
Usque ora nemo ha credite que material biologic poterea superviver milliones de annos sin esser petrificate. Trovatas in ambra, totevia, demonstra que isto es possibile.
Le scientistas american ha anque identificate le proteina de texito collagene in le osso prehistoric. Totevia, nulle scientista expecta que on — como in le nove film de Steven Spielberg Jurassic Park — va poter revivificar le ancian dinosauro per usar material genetic.
(Per Thomas Breinstrup, publicate in Panorama, martio-april, 1994)
MEDIO CONTRA SIDA IN SERO DE LACTE
Canada: Dr. Sylvain Baruchel del Hospital de Infantes in Montreal, Canada, annunciava al Conferentia Mundial de SIDA in Yokohama, Japon, in augusto que le proteinas contenite in le sero de lacte non solmente controla le virus HIV ma anque ameliora le systema immun del patiente.
In le annos 1980 recercatores habeva discoperite que le proteinas vivente in le sero de lacte pareva relentar le progresso de SIDA e le virus HIV in animales. Ora le travalio de laboratorio in Canada e in Francia ha trovate un ration.
Le sero de lacte ha un substantia appellate le glutathion que obstacula le assalto de HIV super le corpore e per attaccar le cellula infectate e per blocar le essayos del virus a penetrar le cellulas san. Le clave nunc es como reinfortiar le provision natural del corpore de glutathion.
Le infantes al hospital montrealese jam infectate de SIDA recipeva le proteina de sero in le forma de un pulvere pro cinque menses. Durante iste tempore lor nivellos de glutathion se augmentava insimul de lor peso corporal: un signo del retraite del maladia. Le tests super adultos comenciara iste autumno. Illos comenciara equalmente a presso del partenarios del recercatores canadian in iste projecto al Instituto Pasteur in Francia.
Le tractamento secundo dr. Baruchel es secur, non-toxic, e il ha nulle effectos lateral: un altere prova del ancian consilio medical que le lacte es bon pro nos.
SIDA es un syndrome de immunodeficiencia acquirite, un maladia grave, sovente mortal.
(Per Richard W. Sorfleet, publicate in Panorama, septembre-octobre, 1994)
LE CANNIBALES DEL EXPEDITION PERDITE
Canada: Le expedition arctic de Sir John Franklin inter 1845 e 1847 se terminava in un disastro mysteriose. Le naves Erebus e Terror navigava in le Oceano Arctic cercante le Passage del Nord-West a Asia. In septembre 1846 le naves deveniva trappate in le glacie que esseva finalmente applattate. Secundo un jornal discoperite in 1857 in le alte Arctic Sir John periva in junio, 1847, presso le Insula de Rege William. Le superviventes essayava a retornar al sud ma dispareva.
Nove expeditiones in le ultime dece annos pro resolver le mysterio ha trovate le restos human in le location general describite per le jornal. Un examine de un corpore revelava un invenenamento de plumbo - un resultato del uso per le expedition del technologia le plus recente del die in le preservation de alimento in cassas de latta (capsulate per le soldatura de plumbo). Nunc anthropologistas canadian ha discoperite un nove evidentia del fato del expedition - cannibalismo.
Le tracias del secaturas facite per cultellos es visibile super 93 de 400 fragmentos de osso. Le corpores ha essite dismembrate pro causar tal secaturas, observava Anne Keenleyside. Mesmo le ossos de digitos e le pedes habeva essite raspate in un acto de desperation final.
Le expedition de Sir John Franklin ha devenite un symbolo del effortios heroic e le grande follia in le historia del exploration de Canada Arctic. Le solution a iste mysterio is nunc plus terrificante que antea pensate.
(Per Richard W. Sorfleet, publicate in Panorama, septembre-octobre, 1994)
ANIMALES CURA HOMINES NEUROTIC
SUA: Le presentia de animales ha un effecto calmante pro homines con alicun difficultates vital, neuroses, e altere males psychic. Pro isto sempre plus de psychologos avisa a lor patientes comprar un animal.
Secundo le opinion de Hubert Montagner ab le Universitate Frenche-Compte, personas con problemas marital deberea emer un can. Infantes habente animales es minus aggressive e plus benevole que illes qui non ha animales. Feminas qui in lor infantia possedeva canes es plus independente e tolerante, e viros monstra plus de senso del proprie valor e plus de capacitate de identificar se con le proprie gruppo social.
In le salas de qualque hospitales statounitese il ha animales, le plus sovente canes. Multe patientes qui sojornava in le salas se refaceva plus rapidemente, dice le reportos.
Medicos e psychologos assere que cattos benissimo influentia al sanitate e psyche de lor possessores. Illes consilia que homines solitari, propense a depressiones e neuroses, ha un catto.
A un congresso de medicos in le capital statounitese Washington, prof. dr. L. K. Bustad assereva que contacto permanente con un catto causa un abassamento del pression arterial.
Un gruppo de expertos del servicio de sanitate in le Statos Unite de America opina que le compania de un catto es un medicamento contra stresses e assi obvia un colpo cardiac pro multe personas.
(Per Jerzy Dembicki, publicate in Panorama, septembre-octobre, 1994)
MUSEOS PRO PUR NONSENSO
Germania: Le homine es insan. Nulle dubita de isto. Previemente iste anno ille faceva record mundial con le tour le plus longe in un gocart con pedales pro infantes. Durante 12 dies ille luctava a transverso de nive, pluvia e altitudes in le rubie gocart Acro-Morgan ab 1920 de Muenchen a Dresden.
Le diploma ab le libro Guiness de records pende con photos del viage sur le vitro in le sol museo pro gocarts in le mundo. Solmente 250 metros ab le placia municipal in Muenchen illo es situate in un vico, ubi le vicinos le plus vicin — ultra de un boteca pornographic — es le Museo pro Vasos del Nocte, le Museo pro Tiracorcos, le Museo pro Serraturas, le Museo pro Lepores de Pascha, e plure alteres. In total — ma exclusive le boteca pornographic — illos constitue "Zentrum fuer Aussergewoenliche Museen" (Centro pro Museos Extraordinari).
Le homine detra se appella Manfred Klauda. Su mania de colliger le faceva establir ante quatro annos le septe museos que es installate a 500 metros quadrate in un villa grande in le etage subterranee e al prime etage. Cata museo es un camera plus o minus grande, ubi le gemmas quasi coperi le pariete ab solo a subtecto.
Le vasos de nocte pende mesmo in filas a transverso del camera. Il ha modellos in omne colores e con inscriptiones plus o minus gustose como "Sieg Heil", "Zur Erinnerung" (A memoria), "Vive la marie" (Que vive le femina maritate), "Oh, landlord, fill the flowing bowl", etc. Plus que 2.000 vasos de nocte ab duo millennios es demonstrate.
Al latere es le museo pro serraturas, a saper, plure centos serraturas ab omne tempores, montate in maniera artistic que simila al serraturas mesme. Multo apte es le tapisseria da associationes a un cellario de castello.
Le prime — e securmente le sol — museo de tiracorcos del mundo in le camera vicin narra, con plus que 1.000 exemplares, lo que ha occurrite desde que le fermeros de vino placiava un corco in un bottilia pro le prime vice ante 300 annos. Ci il ha tiracorcos audace, estranie, deviante e simplemente disgustante pro tote le moneta.
Le lepore de pascha ha essite un figura central, desde le germanos celebrava le venita del primavera. Durante seculos illo ha causate gaudio presso infantes e animas infantil. Probabilemente le ultimes va esser incantate le plus super le parve animales colorose. Le museo entrava in le libro Guiness de records in 1992 como le collection le plus grande de lepores de pascha in le mundo.
Si on prefere plus cosas in memoria de imperatrice Elisabeth de Austria o bourdalous (parve plattos decorate), il ha anque museos pro iste curiositates.
E, garanti le femina gentil al cassa, Manfred Klauda ha un collection multo plus grande. Le museos solmente monstra exemplares seligite! Le museos extraordinari a Westenriederstrasse 26 es aperte cata die ab 10 a 18 horas, e multes entra e paga con humor le 8 marcos german pro le billet.
Ma on debe memorar placiar le gocart a foras.
(Per Thomas Breinstrup, publicate in Panorama, novembre-decembre, 1994)
NAPOLEON ESSEVA INTOXICATE A MORTE
Francia: Le imperator francese Napoleon non moriva per cancere in le stomacho ma per un lente intoxication intendite — a causa del jelosia, vengiantia, e aviditate de un nobile depravate, qui pulsava su proprie sposa a in le bracios del imperator.
Assi pensa le economo e jurista ab Montpellier, Renee Mauri, 66 annos, qui ha justo editate le libro Le assassino de Napoleon o le Mysterio sur Sancte Helena. Ante 30 annos le dentista svedese Sten Forshufvud legeva le diarios del servitor de Napoleon, trovante que 31 de 33 signos possibile de un lente intoxication de arsenico: pedes intumescite, dentes perdite, manos frigide, perdita de capillos sur le corpore, etc.
Un experto de intoxicationes in Glasgow discoperiva post haber bombardate un bucla del capillos de Napoleon con neutrones un contento de arsenico que esseva 13 vices le normal. Altere buclas esseva analysate a un contento plus basse, ma omnes confirmava le theoria que Napoleon esseva assassinate per arsenico.
In octobre expertos ab le instituto technic in Lausanne, Suissa, analysava le contento de arsenico in un bucla a septe vices le multitude que on expectava trovar. Professor Raymond Houriet, Lausanne, e le inspector criminal Claude Roux, ab le instituto de policia in Lausanne, sublinea que mesmo le alte concentration anormal de arsenico in le capillos non necessarimente significa que Napoleon, 51 annos, esseva intoxicate a morte.
Secundo Renee Maury, le conte Montholon — un del tres generales de Napoleon sur le insula Sancte Helena — esseva le assassinator. Ille sequeva in 1814 Napoleon a Anglaterra pro escappar su creditores e accusationes de haber prendite moneta ab le salarios del soldatos. Napoleon le discargava como ministro quando Montholon maritava Albine, duo vices divorciate. Ma Montholon ora sperava hereditar le fortuna personal de Napoleon — e deveniva de facto le herede principal. Dunque ille faceva su sposa le amante del imperator, ma jelosia, que Napoleon esseva le patre del secunde infante, le faceva ager.
Montholon pote ben haber legite super le assassinationes per arsenico de marquis La Brinvillier in le 17-me seculo e alora sapite que argento vive con lacte de amandolas al fin vermente functiona ma non lassa tracias post se. E le 3 de maio, 1821, Napoleon justo, contra su voluntate ma initiate per Montholon, habeva amandolas amar e un superdose de argento vive, que finiva su vita.
Historicos francese non es multo enthusiasta del nove theoria.
Intertanto, le corpore de Napoleon es situate intra le plus interior de cinque sarcophagos in le crypto del Ecclesia de Invalides in Paris, impossibile a acceder, celante forsan le solution del enigma
(Per Thomas Breinstrup, publicate in Panorama, novembre-decembre, 1994)