DODECAPHONIA: UN DOCTRINA MUSICAL
In le historia del linguas artificial duo nomines transluce: Johann Martin Schleyer (Volapuk) e Ludvig Lazarus Zamenhof (Esperanto). Non equalmente note es le duo constructores de "linguas artificial" del musica, Arnold Schoeberg (1874-1951) e Josef Matthias Hauer (1883-1959), cuje systema ha essite quasi completemente oblidate.
Durante le seculo dece-none, le principios fundamental del musica (accordos de tres tonos - major e minor) finalmente habeva essite disintegrate. Ductores del vanguardistas a iste tempore esseva Franz List (1811-1886) e Richard Wagner (1813-1883) - ambes plus severmente criticate per multe esthetistas musical contemporanee. Inter illes qui abandonava le "territorio classic", cercante nove sentieros, nos debe nominar de plus duo: le bizarre Erik Satie (1866-1925) e Claude Deubssy, le "impressionista" (1826-1918).
Al initio del tertie decennio Schoeberg e Hauer, independente le un del altere, cognosceva que on non poteva vader plus avante, empleante systemas compositional musical fin alora existente. Ambes inventava nove methodos pro crear musica. On parla super "systema dodecaphonal" e "musica dodecaphonal", sed on debe distinguer minutiosemente inter le systemas de Schoeberg e illo de Hauer.
Schoeberg fundava su systema sur sequentias de dece-duo tonos. In un sequentia, omne tono es permittite apparer un vice solmente. Le sequentia pote esser transportate a dece-duo altitudes dissimile: illo pote esser speculate tanto horizontalmente como verticalmente. Alterationes ultra isto non es licite.
Hauer al contrario laborava con 44 si-nominate "tropos." Un "tropo" es un gruppo consistente de sex tonos (omnes inequal) plus le gruppo del sex tonos remanente ex le gamma chromatic. In un gruppo de sex tonos on es permittite alterar le ordine secundo gusto (absolutemente prohibite in le doctrina de Schoeberg).
Un parte del successores de Schoeberg, Hanns Jelinek e Herbert Eimert, inter alteres, ha dedicate interesse grande in le aspectos mathematic del systemas. Eimert, per exemplo, publicava in 1964 un lista notante omne le 1928 si-nominate"sequentias de omne intervallos" (Allintervallreihen), le qual ille habeva producite per medio de un machina mathematic. (Le problema del "sequentias de omne intervallos" habeva usque alora insistemente defiate omne effortios con stilo e papiro!)
Alicun curiositates ulterior debe esser mentionate (omnes discoperite per medio de machinas mathematic - e in certe casos etiam per mano!): On pote, ex deceduo tonos, compilar 4.096 harmonias. Iste harmonias totevia pote esser fusionate a 352 categorias. Post fusionar ulterior, on pote distinguer 201 classes, omnes totalmente disparate.
Le 44 "tropos" de Hauer pote del mesme maniera esser fusionate a 11 classes; illos anque es disjungite.
Hodie on trova in toto solmente singule componistas qui emplea le technica dodecaphonal. Il es, certo, possibile de crear musica extrememente belle per medio de dodecaphonia - le violinconcerto de Alben Berg es un exemplo evidente - sed le majoritate del componistas considera le carga mathematic troppo pesante, le systema troppo immaneabile, e dunque lo ha abandonate, ben que Schoeberg credeva que ille habeva create un systema pro le cento annos veniente. Su musica tamen es al minus sovente ludite, e forsan le etate del computatores pote apportar un renascentia pro su ideas musical.
On debe emphasar que il es toto impossibile, mesmo pro un auditor accostumate, estimar si un pecia musical es create dodecaphonicamente o per ulle altere methodo. Musica de dece-duo tonos non sona de modo fixe. On debe mentionar que le dodecaphonia non es equal a "atonalismo." Atonalismo es un phrase deljorno sin realitate in le theoria musical.
(Per Rune Thorsell, publicate in Panorama, januario-februario, 1991)
PORTUGAL CERTO VALE UN VISITA
Portugal: Plagias, vino de Porto, e tauromachia non es le sol imagines que merita esser laudate quando on visita Portugal in le angulo sud-west de Europa. Ci es alicun consilios:
Lisboa: Il ha un abundantia de parve pensiones (pensaos), ubi on pote habitar a precios modeste. Nos trovava un parve loco familiar, Pensao Arco Bandeira —proxime a un del placias central de Lisboa — a recommendar. In le suburbio Belao(In interlingua Bethlehem) es situate le Museo National pro Carros (Museu Nacional dos Coches) e un grande monumento pompose pro Henrico le Navigator, ambes multo impressionante.
Illos pote esser vidite in un antemeridie. Le ancian citate, Alfama, debe absolutemente esser vidite — ma non perde le via in le stricte stratas! Si on ha solmente un parve interesse de arte e cultura (egyptie, mesopotamian, grec, roman, francese, etc.) le museo Gulbenkian (Museu Calouste Gulbenkian) es un fonte de auro. Gulbenkian esseva un millionario — possibilemente milliardario — qui ha comprate collectiones incredibile, al quales ille pois construeva un museo totalmente fantastic; on perde le aere per le multe impressiones. Pro Lisboa vale cinque dies pro vider le major parte del citate.
Queluz es situate un poco al nord de Lisboa. Es un grande castello, quasi un Versailles portugese, ubi estranier capites de stato ora habita durante visitas in Portugal. On pote visitar Queluz ab Lisboa in un medie die, e on anque debe vider le belle parco del castello.
Sintra es situate plus al nord. Ci es le Palacio Nacional de Sintra con duo characteristic caminos de cocina. Illos es multissimo grande. Io recommenda que on visita le palatio e anque le Palacio Nacional de Pena, un ver castello de conto. Il es un problema trovar un allogiamento in Sintra, proque il non ha multe pensoas de bon mercato. Nos succedeva haber un camera assatis bon ma obscur al Pensoa Nova Sintra in un del poc stratas principal del citate, que es multo agradabile, pro in toto 1.280 escudos inclusive jentaculo.
Le tour al castello de conte, que on debe vider, se face in un taxi (ma face un accordo del precio in avantia). Le chauffeures de taxis vive de isto. Per stratas serpentose on es conducite al castello e descende presso le entrata principal. On concorda con le chauffeur que ille essera al mesme loco un hora e medie plus tarde, e on non paga usque al retorno — practic e facile.
Nazar es un ver citate de piscatores, un poco touristic (ma in un maniera charmante), al Atlantico. Nos iva ab Sintra per Cacao a Nazar - con le traino. Ab le station de Nazar nos prendeva un taxi. Le chauffeur, apprendente que nos voleva remaner alcun dies, nos conduceva a un casa, aperiva le porta, parlava con le femina, e nos monstrava le camera, e nos habeva pernoctation!
Esseva un familia que rentava duo cameras. Ma il es practicamente impossibile non trovar un camera in Nazar - omne familias cerca touristas. Le plagia es fin, e on senti le vita quotidian del citate. Nos iva a tauromachia, combinate con le special canto triste portugese, le fado. Toto occurreva in le Pracao de Toiros (Placia de Tauros) in le parte del citate situate sur un rocca.
On prende un mini-funicular pro ascender (durata: alcun minutas) como un elevator. Le precio pro le vespere folkloristic esseva 500 escudos. Esseva absolutemente un experientia in un arena totalmente plen de gente, proque le personas local es le plus diligente spectatores. Le differentia ab Espania es que in Portugal le tauros non es occidite.
Coimbra es le citate universitari de Portugal, ancora plus al nord. Nos arrivava illac ab Nazar cambiante traino in Figueira da Foz. Le universitate e le cathedral ancian (Sao Velha), le monasterio del cathedral (Sao Claustro), e le stratas principal nos succedeva vider omnes in un die. Isto sembla esser assatis pro Coimbra. Nos videva lo que nos voleva.
Porto es le plus al nord. Illo es le citate del societates de vino de Porto. Preter le riviera es situate un societate post le altere. Omnes da un gratis demonstration sequite per un vitro de vino de Porto. On pote devenir medie-ebrie post haber visitate tres-quatro societates in sequentia. Proba al minus duo del locos, proque lor discursos super como cultivar le vino es multo differente. Il ha mercatos e multe altere cosas a vider in Porto, al qual nos usava cinque dies. Il vale visitar le bursa (Palacio da Bolsa), un ancian edificio impressionante. Ci, como in le majoritate de museos e castellos in tote Portugal, il ha naturalmente tours guidate.
Bon viage!
(Per Thomas Breinstrup, publicte in Panorama, martio-april, 1991)
ELEPHANTES APPARE POST 300 ANNOS
India: Desde le 300 annos passate, il existe nulle elephantes in Andra Pradesh, usque le mense de martio, 1984, quando un grege de septe entrava ab le stato de Karnataka a in le foreste de Kuppam del districto Chittoor.
Iste village jace al trijunction del tres statos Andra Pradesh, Tamil Nadu, e Karnataka, ubi un sol foreste se extende in contiguitate in tote le tres. Alora le populo del village deveniva felice que le Deo de elephante, senior Vighnesvara o Vinayaka, inviava su representantes terrestrial al village. Habente vidite le animales in circos o sur films, le habitantes in un explosion de devotion se approchava a illos, offerente cocos, e 27 de illes e altere septe era occidite in un action offensive del grege. On debe totevia dicer in defensa del animales que illos habeva visitate ni circos ni cinetheatros e dunque era nescie del ver intentiones del devotos. Subsequentemente le grege recipeva reinfortiamentos, su numero cresceva a 42, e le ultime reportos dice que illos non se subscribe al propaganda governmental re limitar su familias a un o duo babies.
Iste elephantes generalmente remane in forestes ma occasionalmente vole gustar canna de sucro, bananas, e mangos, e ergo erra in le region Kuppam-Palamaner. Illos attaca anque altere villages pro alimento, e in su irritation contra resistentia human non sparnia le vitas de homines.
Un del methodos recommendate a terrer los era facer focos artificial. Presto, le elephantes apprendeva que illos era ruito innocue. Alora le villanos curreva al officiales del Departimento de Forestes. Iste seniores redigeva un plano de eriger un palissada electric del longitude de 100 kilometros e executava solmente 50 km. Nulle plus de pecunia!
Ma, infortunatemente, propter le carentia de energia electric, le palissada era sin utilitate le major parte del tempore. E quando le lineas era infundite de energia, le maledicte bestias viagiava longe distantias e conformante le barriera entrava in le villages, informa Express Weekend. De plus, quando era absente le energia, illos simplemente attacava e demoliva le palissada.
Totevia, il ha devenite plus facile controlar chassa fraudulente e abatter illegalmente arbores, pois que le pachydermos ipse vigila le ricchessas de foreste.
(Per P. Narasimha Rao, publicate in Panorama, No. 2, martio-april, 1991)
UN MELIOR PAPIRO
SUA: Cata anno in le Statos Unite on utilisa 12 milliones de tonnas de papiro proveniente de pulpa de ligno pro le production de jornales.
Viste que le reservas de ligno deveni omne vice plus scarse, le attention del mundo jornalistic comencia a tornar se verso un specie de cannabe (hibiscus cannabis), Un arbusto cognoscite desde le antiquitate que pote attinger in solo tres menses un altura de cinque metros. Secundo le quotidiano francese Le Figaro, le papiro obtenite del fibra de iste planta es "plus forte, plus lisie, plus durabile, e plus blanc" que illo fabricate ex le pulpa de ligno. In plus, "illo non jalnesce."
Como avantage additional iste cannabe pote producer usque novem vices plus de pulpa per hectar que le pinos. In despecto de iste avantages, se calcula que, in 1988, le fibra de cannabe solo representava 1% del mercato del papiro pro jornales.
(Dennis Lane-Martinez, publicate in Panorama, No. 2, martio-april, 1991)
UN GRANDE POPULO SIN PROPRIE STATO
Inter le populos de Europa que non ha lor proprie stato, le catalanes occupa un loco particular. Illes ha de omnes le plus grande population — inter cinque e septe milliones — e son plus grande que le norvegianos, finnos, albaneses, e alteres como"populos statal" in Europa. Le catalanes anque occupa un region plus grande que, per exemplo Pais Basse, Belgica, Danmark, o Switza.
Le territorio del catalanes appertine a quatro diverse statos: Espania, Francia, Andorra, e Italia (Sardinia). On considera que le lingua catalan es quasi un membro intermediari inter le linguas ibero-romanic e gallo-romanic (inter iste gruppos il ha diverse subdialectos, in particular iste de Valencia — que ha circa 3,7 milliones de habitantes — e le si-appellate "mallorquin" super le Baleares). E homines qui parla catalano se trova etiam in America latin (Argentina e alterubi).
Plus que 95% de omne catalanes europee es concentrate super le terreno espaniol. Illes ha lor domicilio super le litore oriental del peninsula pyrenee del frontiera francese (illo tracia se trans iste region verso sud usque Alicante) — un zona circa 700 km longe. In le parte del nord late plus que 200 km; in le parte del sud, minus que 50 km, e illo se extende trans le mar usque le Insulas Balear.
Le mentionate regiones de Espania in le quales habita le population catalan contine 65.000 kilometros quadrate. Ultra le proprie region catalan (in espaniol catalun; in le lingua catalan, catalunya). Con le metropole Barcelona appertine a iste etiam le pluralitate de Valencia, le Baleares, e un stricte region in Aragon oriental.
Le Principat de Catalunya (principato de Catalonia) ha un extension de 31.426 kilometros, e circa 70% de su population de circa 6 milliones de habitantes parla catalano, ma super le Baleares, que ha 700.000 habitantes, circa 90% del population parla catalano.
In le fin del prime millennio Catalonia se trovava sub le influentia del arabes e del governamento francese, e desde le 10-me seculo illo attingeva de plus in plus le autonomia. In le anno 1137 illo se univa con le regno de Aragon. Desde le medio del 13-tie seculo usque le medio del 15-nte seculo se displicava le expansion del catalanes verso le Mediterraneo, e illo etiam esseva ligate a causa del colonisation super le Baleares e Sardinia, ubi usque hodie vive un minoritate catalan. Le catalanes anque se extendeva a Corsica, Malta, e Napoli. E etiam certe partes de Grecia ha populationes catalan. Durante iste epocha le lingua catalan esseva un importante lingua de contactos international.
Post le unification de Aragon con Castilia in le anno 1479 evanesceva de plus in plus le signification de aragonese-catalan. Pauco a pauco on annullava le autonomia catalan e liquidava le privilegios particular del catalanes.
In le 17-me seculo erumpeva le lucta pro le renovation del soveranitate catalan in le alliantia con Francia, ma iste effortios restava sin successos.
Un nove phase in le movimento catalan national comenciava durante le annos inter 1820 e 1830. Ben que non existeva un systema de instruction public (on lo liquidava in 1825), comenciava a penetrar in le citates le lingua catalan. In le medio del seculo on comenciava imprimer libros e presentar obras de theatro in Catalano.
Un movimento national nasceva opponente effortios de Madrid pro un centralisation e "castilianisation" del catalanes durante le ultime quarto del 19-ne seculo e in le comenciamento del del 20-me seculo, quando prosperava le lingua imprimite e quando le populo ganiava derectos in garantia.
Ma le annos inter 1910 e 1920 characterisava se per le accrescimento del restriction contra le movimento catalan. Post isto sequeva le reinfortiate combatto pro le independentia o autonomia catalan. Le statuto a un autonomia tamen se faceva approbar solmente in 1934; illo esseva valide usque le cancellation del regime republican in 1939. Le governamento de Francisco Franco de novo opprimeva le cultura catalan, e on poteva usar solmente le espaniol in le scholas e officios.
In le fin del annos 50 e in le comenciamento del annos 60, le territorio catalan videva un non-insignificante developpamento economic (mestiero, tourismo), que esseva ligate con le immigration de milliones de personas ab altere regiones del pais — in particular ab Andalusia — le quales se assimilava ad un alte grado, in contrasto al situation simile presso le bascos espaniol. Le immigrantes hodie amonta a circa le medietate del habitantes de iste region, ma le pluralitate de illes parla catalano.
Le catalanos native — super toto in le proprie region catalan (istes son le quatro provincias: Gerona, Leida, Barcelona, e Tarragona) conservava nonobstante le disfavorabile conditiones social combinate con un pronunciate conscientia national.
Le lingua on usa cata die como medio del communication. Etiam durante le annos post le Secunde Guerra Mundial on publicava continue libros e periodicos catalan. Nasceva etiam nove cantos catalan e nove obras de theatro. Viste que le governamento de Franco non permitteva opposition politic, nasceva organisations super un base cultural absolute. Le juventute, super tuto le studentes e etiam le parve e medie burgeses e le clero esseva un fortia special in le lucta politic e cultural del catalanes. Ecce qualque factores importante que contribueva a iste lucta:
- Le population catalan es grande — circa un sexto del population del territorio espaniol.
- Le economia del territorio catalan es multo ben developpate con industria pesante, construction del machinas, e production e victualias.
- In altere regiones del paises west-europee il a varie altere minoritates national.
- Le catalanes non cognosce le sentimento de inferioritate vis-a-vis le majoritate espaniol. Isto explica etiam le facto que illes pote absorber e assimilar immigrantes ab altere regiones de Espania.
- Le effortios del governamento de Madrid pro opprimer per un partition administrative le movimento catalan non habeva successos particular.
Post le declino del regime Franco nasceva in Catalonia un organisation de 11 associationes national — per exemplo, le consilio del politicos qui demandava pro Catalonia un statuto pro autonomia. Iste demanda se poneva in vigor in 1979 como parte del nove reorganisation administrative de Espania sur base regional.
In 1982 eveniva le proclamation del autonomia de Valencia e in 1983, ille del Baleares. In iste tempore occurreva le reinfortiamento del positiones del lingua e cultura catalan, le quales, post multo tempore, recipeva de novo lor legitimation.
On comenciava ancora un vice usar le lingua catalan in le scholas e in le medios de communication public (radio, television, jornales quotidian). On anque editava multe libros in catalano — solmente 872 titulos in 1976, ma 2.140 in 1981 e 3.471 in 1985.
Le interdiction official del uso del catalano durante le regime de Franco causava problemas de "analphabetismo", e un grande parte del catalanes non pote leger le lingua e, in particular, scriber lo. Ma in le "patria" catalan le situation es melior que in altere regiones catalan como in Valencia e super le Baleares. Nonobstante, on ha travaliate assiduemente pro corriger los.
Francia es un altere pais europee ubi habita personas del nationalitate catalan, qui vive in le sud del pais in le nord-est del Pyreneos. Le frontiera inter Francia e Espania transversa le region catalan. In le departimento Pyreneas-Orientales con su centro Perpignan (in catalano: Perpinya) se trova 60% del catalanes francese. Le nomine historic de iste territorio es Roussillon (in le lingua catalan Rosellon). Jam in le 15-te seculo le soveranos francese habeva grande interesse in le ambiente de Roussillon, de origine un parte de Aragon.
Desde alora on observa in iste region le oppression del lingua e cultura catalan. Le stato del repression e francisation durava etiam usque le revolution de 1789 e anque in le 19-ne seculo. Ma le lingua e cultura catalan monstrava grande resistentia.
In le 20-me seculo se reinfortiava le effortios del renascentia. Ma mesmo hodie on non ha attingite un stato satisfactori. Usque nunc il ha habite un debile effortio pro usar le catalano in le scholas, e pauc libros se publica in catalano.
Le crescimento del tourismo post le Secunde Guerra Mundial e le translocation de franceses ab Africa del Nord post 1960 reinfortiava le domination francese, e le juvenes abandonava lor villages e cercava travalio in le citate. Con isto se dislocava le lingua e le cultura catalan continuemente al nivello del folklore e del patriotismo local. Ma le organisationes national del Catalonia espaniol monstra un certe interesse pro le catalanes de Roussillon.
Un phenomeno multo specific es Andorra, un stato miniatura in le montanias pyrenee con un population qui parla catalano. Hic catalano, con le espaniol e le francese, es le lingua bureaucratic.
In 1983 Andorra habeva 40.000 habitantes. Ma multes de illes es immigrantes recente — principalmente franceses e espanioles. A pena un quarto del population general es catalanes cuje familias se habeva establite in Andorra ante tres generationes, e le composition ethnic del pais nunc se ha cambiate.
In le nord west de Sardinia il ha anque un enclave isolate de gente catalan (inter 10.000 e 30.000 personas) in le citate italian Alghero (Alguer in le lingua catalan). Illes es descendentes del habitantes qui colonisava Sardinia in le medio del 14-te seculo durante un epocha de prospertitate in Valencia.
(Per Dr. Leo Satava, ethnographo tchec qui vive in Praha. Publicate in Panorama,Maio-junio 1991)
NOVE METHODOS DE ADMINISTRAR PHARMACOS
Un revolution discrete se realisa in le industria pharmaceutic, un innovation que rende le pharmacos plus secur e plus effective per cambiar le methodo per le qual illos es absorbite per le corpore. Recentemente, le compania pharmaceutic Duncan Flockhart recipeva ab le governamento britannic autorisation de vender ibi Volmax, un producto antiasthmatic que es confectionate per un novelle methodo, que ha essite utilisate anque pro altere medicamentos. Iste methodo rendera le pharmaco que illo contine, salbutamol, plus facile a administrar e plus prolongate in su effectos— un beneficio major pro personas qui suffre de attacos asthmatic durante le nocte.
Durante un tractamento de comprimites, le concentration de un pharmaco in le corpore fluctua, de sorta que, typicamente, il ha tempores quando illo excede le dose optimal, con le risco de effectos secundari, e altere tempores quando illo non attinge concentrationes sufficiente pro producer le effecto desirate.
Iste problema es aggravate per le grado de "conformitate del patiente" al instructiones del medico. Alicun patientes non seque exactemente iste instructiones. Illes oblida prender le medicamento, e prova compensar le omission per prender un duple dose, lo que exaggera le fluctuation del concentration del pharmaco.
"Alza", un parve compania in California, ha disveloppate methodos pro superar iste problema per discargar lente- e regularmente plure septimanas o mesmo menses, usante emplastros special cutanee, pilulas "intelligente" e polymeros.
Le emplastros special consiste de un pecietta de material supportante, un reservoir del pharmaco, e un adhesivo, e utilisa le cute como le puncto de entrata. Un membrana de polypropylene e oleo regula le passage del pharmaco per le cute al e oleo regula le passage del pharmaco per le cute al vasos sanguinari.
Idealmente, le transferimento del pharmaco debe esser controlate per le membrana, non per le cute. Pro isto on provide que le permeabilitate del membrana es minor que le permeabilitate del partes minus permeabile del cute. Iste factor es specialmente importante in le caso del emplastro special que combatte le dolor postoperatori. Un sol milligrama de su ingrediente active, fentanyl, pote occider le patiente si illo es administrate insimul.
On ha utilisate tal emplastros pro lassar le nitroglycerina (que ha un uso medical in le tractamento del angina) permear in le sanguine, ubi illo evita le dolor del pectore causate per maladias cardiac. Altere emplastros tracta le hypertension, le asthma, e le cinetosis (mal de mar, de aviatores, etc.).
Un novelle emplastro, ancora non approbate pro uso general, pote administrar testosterone a homines deficiente in iste hormone natural. Dr. Robert Gale, del firma Alza, diceva que isto "augmenta le potentia sexual, le vigor, e le tono muscular, ma diminue le possibilitate de damno al ficato causate per le forma oral del hormone, o per injectiones mensual que pote producer fluctuationes de humor".
Le pilulas osmotic, usate typicamente in Volmax, consiste de un nucleo solide del pharmaco, revestite de un membrana special con perforationes minute facite per laser. Post que le pilula es inglutite, aqua es tirate per le membrana per osmose, assi pulsante le pharmaco per le foramines a un rata constante durante que illo passa per le systema gastric.
Le polymeros bioerodibile es anque utile. Istos es plasticos, miscite con pharmacos o vaccinos, que se discompone quando exponite a humiditate in le corpore. Iste discomposition permitte le substantias active disseminar se. Per variar le recepta pharmaceutic del polymero, il es possibile variar le quantitate e le typo del pharmaco, e anque le tempore de su effectos. On disveloppa polymeros que pote esser lassate in le patiente, post operationes chirurgic, pro combatter infection. Alteres provide un structura que promove le reconnexion de nervos secate.
Il ha anque le fibras tenue. Istos, impregnate con antibioticos, pote tractar le morbo periodontic, un infection dolorose del gingivas ubi un cavitate se forma inter le dente e le gingiva que distacca le dente. Le fibra, que on inserta in le cavitate, occide le bacterios que es le causa del maladia e reduce le inflammation intra le periodo de un septimana.
Nove systemas pro le application de pharmacos es sub disveloppamento, capace de augmentar o reducer doses secundo necessitate, que functiona per medio de membranas cuje permeabilitate pote esser cambiate per un currente electric. Proviste que on pote disveloppar nove systemas de indicar le dosage ideal — le dose e le intervallos optimal del administration de multe pharmacos resta ancora incognite — le firma Alza pensa a un horologio-bracialetto capace de stimular un membrana electricamente pro administrar doses de pharmacos a horas determinate.
Finalmente, le systemas de administrar pharmacos essera empleate con ancora un novelle technologia, illo del anticorpores monoclonal, que es proteinas capace de orientar un pharmaco verso un organo de un texito specific, o verso un sol typo de cellula.
(Per Roger Highfield, publicate in anglese in le Daily Telegraph, traducite in interlingua per Brian Sexton, e publicate in Panorama, No. 3, maio-junio 1991)
MAQUINA COMPONE COMO MOZART
Svedia: Computatores pote componer in un stilo de Wolfgang Amadeus Mozart, quasi intoccate del mano e anima human. Le recercator musical, Ulf Larnestamm ha analysate 18 sonatas pro piano del grande maestro e ha registrate sur dischettos le regulas basic de lor composition..
Larnestamm presenta su "ars combinatoria" (composition mechanic) pro devenir doctor de musica al Universitate Uppsala. Per datos, tabellas con mesuras preste, e un systema de regulas, qualcunque persona pote scriber nove musica in le stilo de Mozart.
Mozart totevia sapeva rumper le regulas - esto esseva su genialitate. Larnestamm anque dice que su respecto pro Mozart augmentava post su studios del detalios de su musica.
Le textos original de Mozart totevia ha menaciate su reputation. In le bibliotheca del Universitate Harvard on ha trovate tres incognite textos per Mozart, manuscribite in un edition de su obras.
Al composition K 231 Mozart scribeva le texto (in traduction modeste): "Lecca me in le culo, rapide, rapide." Le vidua de Mozart, Constanze, censurava le parolas, assi que editiones plus tarde veniva - Que nos sia allegre!
Al K 233 Mozart scribeva: "Lecca mi culo bellemente, vermente munde, lecca lo; es un desiro oleose, es solmente ben lubricate." Constanze lo cambiava in "Nihil me refresca plus que vino."
Le presidente del Regal Association Musical in London, Stanley Sadie, lo commentava per titular le discopertas "displacente e vulgar."
(Per Thomas Breinstrup, publicate in Panorama, julio-augusto, 1991)
LE ARBUSTO DE SECURITATE
SUA: In le Statos Unite certe organisationes caute pro le securitate - tales como le CIA, le armea, le NASA - ha recurrite a un vetule idea pro proteger lor terrenos: le arbusto.
Communmente utilisate cento annos retro pro includer le bestial, le arbusto in question pote semblar inoffensive de longe, ma su folios dissimula multe armas insuspectate, spinas de 12 centimetros de longor (4 pollices imperial) affilate como rasorios. Ultra isto, secundo le revista Discover, quando illo es totalmente developpate, iste haga hostil es tam spisse que illo pote obligar que un vehiculo tote-terreno (o "jeep") face un halto complete. Su precio es derisori comparate a illo de un barriera de filo, ma illo dura tres vices plus longe.
Iste menaciator sepiforme se appela "poncirus trivoliatus" ben que illo ha recipite le supernomine "PT", initiales in anglese de pain e terror (dolor e terror)
(Per Dennis Lane-Martinez, publicate in Panorama, julio-augusto, 1991)
MADEIRA, UN INSULA UBI ON POTE BEN PARLAR INTERLINGUA
Madeira es le tertie subtropic insula montuose in le Oceano Atlantic post le Insulas Canari e le Azores. Illo es un region independente de Portugal.
Le archipelago madeirese consiste del insulas habitate Madeira e Porto Santo e del insulas inhabitate Ilhas Desertas e Ilhas Selvagens. Le archipelago es un gruppo de vetule, volcanic insulas roccose. Madeira es 740 kilometros quadrate grande, 900 kilometros ab Lisbona, e 600 kilometros ab le costas marrochin.
Le nomine Madeira significa "insula de ligno". Iste nomine esseva date per Gonalves Zarco e Triste Vas Texeira. Illes lo discoperiva in 1419. Le insula esseva inhabitate e coperite de arbores.
Gratias al vento alisee del nord-est e del aqua del mar calide, illo ha un climate agradabile e un abundante vegetation subtropic. (Dunque on nomina Madeira le jardin flottante del Oceano Atlantic.) Le capital es Funchal con 100.000 habitantes, le tertio del total, e su situation es verso le costa sud del insula.
On pote facer omne cosa como natar, sport nautic, navigar, piscar, jocar a golf e tennis. Pro gauder realmente del panoramas splendide, on debe promenar super le si-nominate sentieros "levadas", que son un sorta de canales que flue al longe del costa montuose.
Sovente facite per mano, iste canales provide aqua potabile e humecta le plantages innumerabile.
Iste sentieros vos guida al longe del campos, permittente que on vide le cultivation terrassal e le costas scarpate coperite con vegetation que los circumfere. Splendidissime son le arbores eucalyptic, le cedros, le pinos, e le sortas diverse del flores como orchideas, hibiscos, bouganvilleas, mimosas, gaiatas, fuchias, e strelitzias.
Pro le alpinistas il ha alicun alturas como Pico Grande (1657 m), Pico de Arriero (1818 m), e Pico Riuvo (1862 m). Del ultime on dice que on pote vider benissime le levar del sol. Super toto ab le alturas on ha le panoramas bellissime super le mar e le paisages.
Necessari es un bon condition physic e un manca de pavor del altitude. Le promenada pote esser penose gratias al sol e al elevation. Si vos vole, es possibile pernoctar in un cabana montuose. Es recommendate informar in anticipation al Secretaria Regional do Turismo in Funchal.
Altere possibilitates sur le insula son, per exemplo, un visita a Funchal. Recommendate son le "mercados dos Lavradores", un exemplo de un mercato atlantic construite circa un patio con flores in colores flammante.
Possibilitates bastante existe pro parlar interlingua con le madeireses. Parla con le venditrice de flores, le venditores de fructos, le expertos de pisces qui son occupate con le preparation del specialitate local, le "espada".
Le jardin botanic es un delecto pro le oculo. Illac son tote le flores e arbores de Madeira etiquettate con lor nomines portugese e latin.
A partir de illac vos habera un panorama super le porto de Funchal. Le edificios de Funchal non son interessante in reguardo a cultura e historia.
In Monte (montania in interlingua) on pote inhalar aere fresc e nostalgia. Illac on ha le possibilitate de conducer in slitta, le si-nominate "curros de cesto" — un sorta de sede rotunde montate super plancas que es pulsate a basso del montania per homines in costumes blanc. Finalmente arrivate in Funchal, le homines parti rapidemente pro cercar nove touristas. On les debe amar!
Si vos circumfere le insula, vos videra le sequente:
Un porto coloristic in Ceara de Lobos, casas fabulose in Santana, piscinas natural in Porte Moniz, aguardente a bon mercato in Ribeira Brava, un cascada e vincas a Seixal, un ecclesia sin horologia in San Vicente, le sol plagia in Prainha (le qual es nigre) le vetule citate del insula — Machico e Canico — es famose de su cibollas.
In le interior del pais in le montanias on videra Camacha, famose de su industria de canna e de su dansas popular; Eira de Serrado, con un panorama super un vallea profunde; Paul da Serra, un plana turfiera differente de vegetation madeirese. E, in Santa da Sera, on pote jocar a golf.
In un parola, Madeira es bellissime. Si vos vole plus de information, scribe al Secretaria Regional do Turismo, Avenida Arriaga 18,9000 Funchal, Madeira.
Bon Viage!
(Per Jeanette van Oostrum, publicate in Panorama, novembre-decembre, 1991)