DISCOPERTA DISCUTITE IN LE PAIS "DISCOPERITE"PER CHRISTOPHORO COLUMBO
SUA: Le americanos discute vividemente si o non — e specialmente quanto — on debe celebrar le discoperta ante 500 annos per Christophoro Columbo del nove continente. Alteres discute si Columbo del toto esseva le prime europeo illac.
Le 12 de octobre 1942 Columbo arrivava all Nove Mundo ab Espania. Ora le evento va esser grandemente celebrate. In februario replicas construite in Espania de su naves — Nina, Pinta, e Santa Maria — visitara portos statounitese. Quatro menses plus tarde un flotta de naves ab 40 paises abandona Espania pro New York, e in Espania mesme il habera un exposition "Etate de discopertas" ab april a octobre.
Christophoro Columbo anque essera rememorate in libros. 40 libros es o va esser publicate super ille, i.a., un encyclopedia Christophoro Columbo con 350 articulos super multe themas, ab le sclavitude aztec al medicina del 15-te seculo. Mesmo un opera super Columbo, "Le Viage" in tres actos, essera presentate in New York, e un album con musica calypso de Columbo anque essera vendite.
Agentias de viage offere tours de Columbo; le firma computatorial IBM offere exploration del aventuras de Columbo in le classes per usar un computator; e duo films essera producite in Hollywood. Le Smithsonian Institute in Washington aperi su plus grande exhibition; le Galeria National exhibi 600 obras de arte ab tote le mundo ex plus de 200 collectiones public e private in 33 paises; e le citate Columbus in le stato Ohio va usar milliones de dollars pro eventos pro celebrar le famose homine. Le exhibition dura usque le 1 de april, 1993.
Secundo le historico de arte, Maurizio Marini, un portrait in oleo de 43 x 58 cm —probabilemente per le pictor espaniol Pedro Berruguete (1450-1504) — acclara que Columbo habeva capillos rubie, oculos verde e profunde, un longe naso como un aquila, e que ille esseva plus magre que supponite. Le portrait non ha essite cognoscite ma esseva in 1990 vendite per un collector private.
Columbo atterrava a Bahamas in 1492, credente que ille habeva finalmente discoperite le via per mar a Asia. Ma ille non esseva le prime a discoperir America. Le aventurero islandese Leif Eiriksson, le filio de un norvegiano, arrivava ja circa le anno 1000, e Islanda e Norvegia ha per grande annuncios e eventos probate attraher le attention del mundo a lor famose ancestre. Le majoritate non cognosce le viages de Leif Eiriksson, e ille es placiate toto in le umbra de Columbo durante iste anno.
Al 12 de octobre 1992, le die del discoperta, le restos de Columbo va esser movite ab le cathedral in Santo Domingo in le Republica Dominican a un nove pharo Columbo. Anque isto non es sin controversias. Historicos dice que mesmo non le ossos es le sues.
(Per Thomas Breinstrup, publicate in Panorama, januario-februario, 1992)
PROJECTO PRO LE COLONISATION DEL PLANETA MARTE
Le planeta Marte offere multe difficultates al colonisation human. Illo es 64 milliones de kilometros distante del terra. Su atmosphera consiste in grande parte de anhydrido carbonic, que non es respirabile per homines, e il non ha multe nitrogeno, que es necessari pro le cultivation de plantas. Le temperatura medie es ‑60 Celsius, comparabile con Siberia in le hiberno.
Totevia, professor Christopher McKay, del Centro de Recerca Ames in California, crede que, con patientia, le colonisation de Marte es possibile e avantagiose. On debe saper que Marte ha, in le forma de glacie, multe aqua, circa 2.000 kilometros cubic de illo. Le planeta ha anque carbon, hydrogeno, oxygeno, nitrogeno, phosphoro, e sulfure.
Professor McKay ha delineate un projecto pro le melioration de Marte in cinque stadios. Al prime, un expedition ab le Terra arrivara a Marte in le annos 2015-2030. Durante le secunde stadio de cinquanta annos, speculos fabricate del plastico Mylar dirigera le radios del sol al coperturas de glacie polar que sera irrorate de pulvere de carbon. Vapores de anhydrido de carbon, oxygeno, nitrogeno, e aqua sera liberate ab le crusta del planeta. Gases de chlorofluorocarburo creara un effecto de conservatorio, e, in consequentia, un altiamento del temperatura a ‑40 Celsius. Al tertie stadio, de 35 annos, plantas artificialmente facite pro esser robuste poterea converter le anhydrido carbonic in carbon e oxygeno. Isto producera le prime nubes, un cambio del color del celo de rosate a blau, e un temperatura de ‑15.
Durante le 15 annos sequente, le fusion del coperturas polar de glacie producera fluvios e lacos e finalmente oceanos con plancton e al terra forestes de arbores semperverde. Al stadio final, in le annos circa 2130-2170, le temperatura attingera 10, le atmosphera sera respirabile, e colonistas ab le Terra potera establir agricultura vegetal e operationes minerari.
Le costos de iste interprisa sera multo grande. On estima un investimento de plus de mille milliones de libras sterling durante un periodo de plus de 150 annos. Ma illo potera dar nos information utile del evolution de nostre Terra e anque formar un base pro le exploitation profitabilissime del asteroides que es multo ric in minerales preciose.
(Per Brian Sexton, publicate in Panorama, No. 1, januario-februario, 1992)
ROLOS DEL MAR MORTE FINALMENTE PUBLIC
SUA: Post 45 annos de acerbe lucta scientific le si-nominate rolos ab le Mar Morte es finalmente publicate. Illos es considerate le plus importante trovata archeologic de iste seculo.
Es le Bibliotheca Huntington in San Marino, California, que ora publica omne photos del rolos de pergamena, inclusive pecias, fragmentos e altere material super le rolos. Un scientista anonyme dice a New York Times, que isto in le mundo scientific corresponde al cadita del Muro in Berlin.
Usque ora octo recercatores ha essite le sol con accesso al rolos, e istes ha tenite via omne alteres. Le equipa in ultra solmente ha publicate le medietate del scripturas, cuje importantia es de acclarar le apparition del tres grande religiones, le judaismo, le christianismo, e le islam. In 1960 appareva 15 volumines con le rolos referente al Vetere Testamento.
Ben-Zion Wacholder e Martin Abegg ab le Collegio de Union Hebree in Ohio, SUA, ha editate un libro, Un edition preliminari del non-publicate Rolos del Mar Morte. Per medio de un lista de concordantia, finite per le octo recercatores in 1960 e deponite in 25 institutiones academic, illes reconstrueva le rolos. Illo consiste, in le parolas de Abegg al jornal britannic The Independent, de "52.000 parolas sur 52.000 cartas de cartotheca. Sur cata carta sta un parola, su placiamento in le texto, a qual rolo illo pertine, e sur qual linea illo sta." Per un computator e quatro studentes illes recreava le texto per poner le parolas del indice al placias correcte.
Scientistas ab le universitate in Zurich ha datate le majoritate del rolos ab le Mar Morte. Le scripturas, trovate in 1947 in le cavos Wadi Qumran al nord del Mar Morte 15 km ab Jerusalem, pote esser datate al duo seculos ante le nascentia de Christo. Le rolos probabilemente esseva celate, quando le claustro Qumran esseva destruite in le prime seculo a. Chr. Le datar occureva per un ameliorate methodo de carbon-14 e confirma que illos es religiose textos judee scribite ante le vita de Jesus.
Le rolos es conservate in le Museo Rockefeller in Jerusalem de Est e in "le Templo del Libro" in Jerusalem de West.
(Publicate in Panorama, No. 1, januario-februario, 1992)
DUO SECUNDAS POTE CAMBIAR LE MUNDO
Grande Britannia: Le prime fusion nuclear controlate succedeva in novembre, generante un amonta massive de energia.
Durante duo secundas esseva producite quasi duo milliones watts de poter per calefacer deuterium e tritium a un temperatura de quasi 200 mill. grados Celsius, plus que dece vices plus calide que le centro del sol. Le duo materiales es presente in aqua del mar, e illos fusionava producente helium. Helium es plus legier e non pote perder su massa, dunque energia anque esseva producite — exactemente secundo le theoria de Einstein.
Le fusion esseva celebrate per plus que 200 scientistas europee al "Joint European Torus" (JET) in Oxfordshire. Illo involve omne paises del Communitate Europee, Svedia, e Suissa. JET expecta durante 1992 e 1993 modificar le processo e assecurar un diffusion plus vaste e controlate del energia ab le fusion. Totevia, on non expecta un exploitation commercial del fusion nuclear ante 40 annos.
Quando le processo es sub controlo total, le mundo habera un enorme nove fonte de energia.
(Per Thomas Breinstrup, publicate in Panorama, No. 1, januario-februario, 1992)
UN SEPTIMANA IN ASUNCION
Paraguay: Le viage comenciava in Brasilia, le capital brasilian. Le autobus lassava le station le 9 de januario, a mediedie. Le 10 al mesme hora nos arrivava a Foz do Igua, citate frontier inter Brasil, Paraguay, e Argentina. Durante iste tempore on videva grande plantationes de soya, mais, canna, e multe fermas. On pensava super le "Ponte del Amicitate" que liga Brasil e Paraguay. Depost qualque horas on arrivava in Asuncion, le capital paraguayan.
Durante le fin de septimana io cognosceva le citate, que ha circa un million de habitantes. Le populo es multo hospital e amabile. In iste epocha, estate, il faceva calor de 35 grados C, e le sol esseva brillante.
Le 13, lunedi, io iva al "Centro de Estudios Brasileiros", e faceva un dono de libros (Interlingua-English Dictionary, Interlingua Grammar, …). Multe studiantes paraguayan studia portugese ibi e pois veni a Brasil pro studiar al universitate.
Martedi io iva al “Biblioteca Nacional,” in le centro del urbe, e faceva un altere donation de libros. On anque donava libros al “Universidad Nacional” pro le bibliotheca universitari.
Mercuridi esseva un die libere a promenar per le citate usque Cerro Lambar (Monte Lambare), ubi se pote observar tote le capital e le elegantissime quartiero Puerto Pabla. Daniel, mi collega paraguayan, qui ultra espaniol e portugese anque parla anglese e germano, esseva un perfecte hospite.
Jovedi io retornava al CEB e on combinava un curso intensive de interlingua in le mense de julio (13-23) con anterior divulgation per jornales, radio, e television (il ha solmente duo retes illac).
Venerdi io conversava con sr. Arnaldo d’Oliveira, coordinator cultural del ambassada brasilian. Ille dava su permission pro le uso de un camera in CEB, mense de julio, pro concretisar le curso a esser realisate malgrado su conviction in le fortia del lingua anglese.
Sabbato, nos viagiava usque San Bernardino, ubi se situa le famose Lago Ypacara.Un loco touristic, sin dubita, agradabile. Nos promenava per canoa sur le aquas del laco durante un hora meraviliose.
Dominica io comprava qualque cassettas folkloric e le artisanato local. Le musicas popular es polkas e guaranias, un rhythmo typicamente latinoamerican. Il ha multe"fiestas" (festas) e un cosa que io considerava characteristic esseva le siesta, que como in Mexico es un costume bastante popular. Tote le casas e portas se claude, mesmo illos del commercio, scholas, bares, etc.
Io parlava espaniol, ma in le casa de mi amico anque portuniol (um mixtura deportugese e espaniol). Tote le paraguayanos, ultra espaniol, parla anque le guaraniun lingua indigena multo usate, plus cognoscite que espaniol mesme.
Le 19 io retornava a Brasilia, post 28 horas de viage e 1.800 km de distantia.
Si vos, car lector, vole inviar material informative e libros pro aprentissage de interlingua, invia los a: Jorge Daniel Fereira Luez, Calle Alberdi 2033, Barrio Obrero, Asuncion, Paraguay.
Assi como a nostre collegas me place ille pais. In guarani: Rohayh Paraguay!
(Per Ramiro Castro, publicate in Panorama, martio-april, 1992)
SIN TATUAGE E DOLOR
SUA: Le technologia pro eliminar le tatuages de un modo satisfactori ha eludite le recuratores durante multe seculos. In le tentativa de remover un tatuage embarrassante, alcunos ha probate a abrader con papiro de sablo, a congelar, a comburer, o mesmo a fricar sal in le tatuage pro excoriar le pelle.
Ora le New York Times reporta super un nove tractamento a radios laser que pote facer disparer tatuages sin lassar alcun cicatrice. Le tractamento utilisa impulsos de luce laser que dura 40 milliardesimos de secunda a un potentia de 100 milliones de watts. In le majoritate de casos, le procedimento se executa sin anesthesia local.
(Per Dennis Lane-Martinez, publicate in Panorama, martio-april, 1992)
LOCA TU INVITATOS
Japon: Ultra effectuar servicios de nettage domestic e de livration a domicilio, un compania japonese provide, pro certe precio, invitatos sur commanda.
The Wall Street Journal ha reportate que iste invitatos locabile son disponibile como substitutos pro tote occasion desde nuptias usque funerales. In le nuptias illes pote facer le rolo del companion de infantia del sposo o del sposa, de un empleato del compania pro le qual illes labora, de un parente venite ab lontan, o mesmo del patre o del matre de uno del contrahentes. On allega que le major ordine commercial que le compania ha recipite usque ora concerneva un matrimonio pro le qual le compania ha fornite 60 del 80 invitatos del sposa.
Le servicio costa ab 15.000 a 25.000 yens per persona (o ab 110 a 180 dollars)
(Pro Dennis Lane-Martinez, publicate in Panorama, martio-april, 1992)
LE VITAS DEL CATTOS
SUA: 90% del cattos tractate in le citate de New York pro "syndrome de grattacelo"(i.e., pro haber cadite desde plure etages de altura) ha supervivite. Secundo le revista Journal of the American Veterinary Association, veterinarios newyorkese ha autorisate le exito ab le hospital pro un "acrobata" felin 48 horas post que illo habeva suffrite un cadita de quasi 150 metros (circa 32 etages) que ha resultate a pena in lesiones minor.
A que se debe un tal prodessa? Le expertos in iste campo cita le habilitate del catto de relaxar su musculos de tal modo que su gambas se extende horizontalmente. Assi al maniera de paracadita, le animal descende con le corpore applattate al maximo, lo que functiona como un freno e mitiga le effortios del impacto. Un reflexo gyroscopic adjuta le animal a cader super su quatro patas.
(Per Dennis Lane-Martinez, publicate in Panorama, martio-april, 1992)
PLUS GRANDE CAVO IN LE SPHERA DE OZONO
Antarctica: Pro le tertie anno consecutive scientistas ha mesurate profunde cavos in le sphera de ozono supra Antarctica.
Le mesuramentos monstra que 50-60% de illo dispare durante le primavera del hemispherio meridional ab septembre usque a novembre. In le altitude critic inter 12 e 20 km supra le terra quasi tote ozono es via a iste saison.
Ante que le cava esseva discoperite in 1985, le sphera de ozono habeva un densitate de circa 30 cm. Le mesuramentos recente monstrava solmente tres millimetros.
Le scientia pensa que le causa del cavo es un quantitate elevate de chloro in le atmosphera que se origina del gases CFC usate in refrigeratores, articulos industrial de nettage, e in bottas de aerosol.
(Per Thomas Breinstrup, publicate in Panorama, martio-april, 1992)
LE NEANDERTHAL VIVE LONGEMENTE
SUA: Le homine neanderthal viveva durante milles de annos latere a latere con homines moderne in Europa, conclude un equipa de scientistas francese. Illes pensa que le neanderthales e le homines ha habite contacto, e que illes forsan ha excambiate utensiles e ideas — si, forsan mesmo certe genes.
In un cavo francese on discoperiva petras de flint e pote ora concluder que le neanderthales non esseva extincte ante 36.000 annos. Usque ora on ha credite que le neanderthales dispareva ante 40.000 annos, quando le homine moderne appareva. Le discoperta es recipite con interesse anque in le SUA.
Durante annos le anthropologos ha debattite tres explicationes de proque le neanderthales se extingueva. On ha credite que illes esseva eradicate per le homines moderne, que le duo esseva cruciate e le neanderthales geneticamente eradicate, e que le neanderthales simplemente se developpava in le homine moderne.
Le neanderthales differe del homines in plure manieras. Illes esseva plus curte que le homines e con plus de capillos. Illes habeva grande manos e pedes e un musculatura imponente. Illes non esseva gigantes intellectual, ma illes developpava methodos pro superviver le tempore glacial. Illes chassava, maestrava le foco, e ha, secundo omne signos, practicate un religion primitive.
(Per Thomas Breinstrup, publicate in Panorama, No. 4, julio-augusto 1992)
LE POPULATION DEL MUNDO EXPLODE
Le population del mundo cresce con 100 milliones de homines per anno, e iste cifra non ha jammais essite si alte.
Durante le veniente 40 annos le population global va crescer con 3,7 milliardos de personas, e 90% del crescimento va prender loco in le paises developpamental. In Africa le population se triplicara a 1,5 milliardos. In Asia le cifra crescera ab tres a cinque milliardos.
Isto es le conclusion de un reporto ab le Banca Mundial, que previde un pejoramento del connexion inter povressa e pollution. Le povres es victimas del pollution e pollue mesme multo, proque illes per penuria es fortiate a pensar in terminos curte pro poter superviver.
Le responsa secundo le Banca Mundial es stimular crescimento economic, proque crescimento economic es un del methodos pro proteger le ambiente — lo que es un idea popular al momento.
Le Banca Mundial propone que on — in le prioritate mentionate — da le plus grande attention al tertio del population mundial qui ha conditiones sanitari insatisfactori, al un milliardo qui non ha accesso a aqua pur, al 1,3 milliardos qui habita in pollution aeree multo periculose ab fumo e fuligine, al 300-700 milliones de feminas e infantes qui habita in pollution aeree interior ab focos aperte (isto corresponde a fumar tres-cinque paccos de cigarrettas per die), e al plure centos milliones de fermeros cultivante terra que deveni exploitate e malproductive, proque manca a illes ressources e sapientia de methodos le plus simple pro fortificar le productivitate del terra.
Abolition de subsidios public pote esser un adjuta. Quando Indonesia aboliva subventionar remedios contra verminas, le ambiente rural sentiva un amelioramento.
Le precio del cambios es remarcabile. Un summa realista esserea 75 milliardos dollares in nove investimentos pro minimar le pollution; assecurar le forestes, sanitate, e aqua potabile pro plus de homines; e investimentos in education e planification familiar.
Ma le conditiones ecologic del mundo essera multo melior si on succede con le multe initiativas proponite.
(Per Thomas Breinstrup, publicate in Panorama, No. 4, julio-augusto 1992)
SECUNDO UN NOVE THEORIA LE CLIMATE DESTRUEVA LE DINOSAUROS
SUA: Secundo un equipa de geologos american ab le Dartmouth College, le dinosauros probabilemente esseva destruite a causa de un grave cambio del climate, non per un collision de un grandissime asteroide con le Terra como previemente credite.
In un articulo in le magazin GSA, editate per le Societate American de Geologia, illes non accepta le theorias de un asteroide e dice que le multe crateres sur le Terra ha potite apparer como le resultato de un erosion.
Iste geologos supporta in vice le theoria que le extinction massive del diosauros ante 65 milliones de annos esseva causate per cambios climatic como le resultato de oceanos cambiante, intense activitates vulcanic, e altere factores.
Secundo le theoria de asteroides, que ha multe supportatores, un cometa o meteoro gigantic collideva con le Terra e creava un enorme nube de pulvere, que non permitteva ulle lumine del sol a penetrar.
Le obscuritate e sequente frigor cambiava le climate tanto que le grande reptiles non poteva superviver. Le theoria assi anque explica como le dinosauros e altere formas contemporanee de vita dispareva si rapidemente ab le superficie del terra.
(Per Thomas Breinstrup, publicate in Panorama, No. 4, julio-augusto, 1992)
FACTOS FRIGIDE AB LE FUNDO DEL TERRA
Groenlandia: Un equipa international de expertos de glacie attingeva in julio finalmente le fundo post haber forate 3.028,8 metros per le glacie groenlandese. Le columna glacial de tres kilometros va dar novas super le climate del Terra durante 500.000 annos.
Summit Camp es le plus alte puncto sur Groenlandia, e le gaudio esseva grande quando le equipa de GRIP (Projecto de Glacie sur Groenlandia) attingeva le roccas. Previemente duo nucleos de glacie ha essite forate. Le prime mesurava 1.390 metros, forate proxime a Thule al nord per scientistas american. Le secunde mesurava 2.037 metros, prendite in Groenlandia sud-est. Ambe nucleos de glacie es a reguardar como calendarios de circa 100.000 annos.
Le nove foration va probabilemente poter narrar super 300.000-500.000 annos. Le glacie mantene provas del climate, de tempestas de sablo in le tempore glacial, de eruptiones de vulcanos e de enorme focos de forestes. Le pression al fundo del nucleo ha essite comprimite si tenue como un pagina de jornal. Le scientistas assi expecta nove informationes super le initios e fines de plure tempores glacial.
Le labor al summitate de Summit comenciava in 1989, supportate per le Fundation de Scientia Europee. Le causa del initio esseva le discoperta que le nive celava informationes super le presentia de isotopos in le pluvia. In periodos frigide il habeva poc isotopos, in periodos calide multes. Assi on pote sequer le cambios grande e parve del climate. Per iste methodo on revelava que le plus recente tempore glacial finiva abruptemente ante 11.500 annos, 700 annos plus tosto que antea expectate.
(Per Thomas Breinstrup, publicate in Panorma, No. 5, julio-augusto 1992).
SEISMO DEMOLIVA MUROS DE JERICHO
Israel: Le collapso del muros de Jericho e le cruciata del israelitas del rivo Jordan esseva causate per un tremor de terra, dice Amos Nur, gerente del facultate geophysic del Universitate Stanford in California, SUA.
Un tremor de terra pote anque haber destruite le citates Sodoma e Gomorra, ubi le grande nubes de fumo, vidite per Abraham, in vice esseva nubes de pulvere causate per le tremor de terra. Le recerca a Amos Nur monstra que le areas Galilea, Judea, e Samaria experientiava grande tremores durante al minus 10.000 annos, causate per movimentos del platta arabe a est e le platta african-sinai a west, accompaniate per large massas de fango, que poteva stoppar le rivo Jordan e lassar gente cruciar lo.
Professor Nur pensa que le libro de Josue describe justo un tal evento circa anno 1000 ante Christo. On ha constatate que il habeva septe avalanches de fango ante Christo proxime al citate. Illos poteva haber stoppate le rivo Jordan usque a duo dies, dice le scientista. Anque al minus 30 tremores de terra ha evenite in le parte de Jerico presso le Mar Morte. Le historico judee Josephus describe un tremor de terra in Judea, que demoliva le citate Qumran in anno 31 a. Chr. e assassinava 10.000 personas. In Qumran esseva trovate le Rolos del Mar Morte.
(Per Thomas Breinstrup, publicate in Panorama, julio-augusto, 1992)
VOLE SALVAR LE ANCIAN EGYPTO
Egypto: Dozenas del monumentos historic ancian in Egypto necessita tractamento urgente, archeologos adverti.
Le sphinge de 4.600 annos ha prime prioritate, proque le petra se demoli. In februario un petra de 300 kg cadeva ab le spatula derecte del grande figura. Le monumento appareva in un vision de Tuthmosis IV e le promitteva le corona del pharaon si ille lo disterrava ab le arena, ma ora on desira que le arena protective sia de novo illac.
Post le cadita del petra archeologos voca pro un campania international pro salvar le ancian monumentos egyptie. Egypto mesme non possede le moneta necessari. Le pyramide Cheops habeva essite pro le prime vice de un centennio claudite pro le publico, permittente que laboratores remove sal ab le parietes e installa un nove systema de electricitate e securitate. Quando iste es finite, on va continuar con le Sphinge. Le projecto costara $1,75 mill.
Finalmente, on construe un sepe circum le area Giza, assi que il non plus esserea possibile conducer in auto usque le monumentos. Le traffico se ha altiate remarcabilemente durante le passate annos.
(Per Thomas Breinstrup, publicate in Panorama, julio-augusto, 1992.)
CROCODILOS MANGIA CORPORES
India: In le Gange, riviera reverite per le hindus como sancte, se bania annualmente milliones de habitantes de India. Nonobstante, in annos recente illo ha devenite alsi un deposito de cadaveres. Parentes troppo povre pro pagar le alte precio de un cremation utilisa le Gange como medio de disfacer se de lor car defunctos, polluente assi le aquas sacrate. Pro detener le marca de corpores in discomposition le governamento de India plana introducer crocodilos in le Gange como mesura efficace de remover le cadaveres.
(Per Dennis Lane-Martinez publicate in Panorama, julio-augusto, 1992)
LE FERROVIA ESSEVA TROPPO SUCCESSOSE
Grande Britannia: In le parte oriental de London, le fluvio Tamisa face un grande curva serpentin al sud in le direction de Greenwich, sequite per un altere curva al nord, lassante un peninsula que esseva plen de bassinos portuari, le West India Docks, construite in 1802. Un pauc plus al est, le latere nord del Tamisa era occupate per un altere serie de docks, primo construite in 1828 e reconstruite plus recentemente in 1921. In summa illo es le complexo portuari le plus grande del mundo.
Ma post le fin del Secunde Guerra Mundial, tote iste complexo cadeva in disuso, reimplaciate per bassinos plus proxime al mar.
In 1981 le governamento britannic establiva le Docklands Development Corporation, cargate de reimplaciar le bassinos superflue per un grande disveloppamento urban, consistente de edificios commercial e residential. Illos include le edificio del jornal prestigiose le Daily Telegraph e le prime grattacelo anglese a Canary Wharf.
Circa 1983 on discuteva le selection de un systema de transporto public pro le disveloppamento del Docklands. Claro, un systema de autobuses non esserea sufficiente, ma le construction de extension del ferrovias metropolitan esserea troppo costose, circa 500 milliones de libras sterling.
In omne caso, le capacitate del trainos metropolitan es circa 20.000 passageros per hora, ma on calculava que le maxime fluxo de passageros in Docklands esserea circa 1.700 personas per hora. Pro isto, on decideva construer un systema separate de 12 km, le Docklands Light Railway (Ferrovia Legier del Docklands), dividite in duo lineas de Stratford al nord e Tower Gateway (apud le Turre de London) al west, con un via commun del West India Quay verso le terminus al sud, Island Gardens, apud le bordo del Tamisa. Varie departamentos public pagava le costo de construction del via e del 11 vehiculos, limitate a 77 milliones libras.
Ecce un description del ferrovia in su stato original: Le trainos, que resimila trams, esseva construite in Germania per le firma Linke Hoffmann Busch. Illos es articulate e ha un longor de 28 metros. Le 16 stationes ha platteformas le mesme longor del vehiculos e toto al nivello de lor solos.
Un grande innovation es que iste trainos habeva nulle guidator. In le sala central de controlo un computator survelia tote le systema. Illo es informate continuemente del position de omne vehiculo e de su velocitate. Illo ha in su memoria le horario de operation e pote commandar le vehiculo accelerar se, si illo es in retardo. Illo manovra le cambios. Illo sape le velocitate maximal pro omne partes del linea, le parametros ideal de acceleration e retardation, e quando un vehiculo approcha un station o parti.
Illo opera le indicationes in omne stationes que informa le passageros quante minutas illes debe attender pro le proxime traino a lor destination. Illo opera le indicatores de destination sur cata vehiculo e le cameras de video in omne station que monstra sur le schermos in le sala de controlo quando le numero de passageros indica le necessitate de poner in operation un traino additional.
Le homines sedente ante le schermos pote anque parlar per altoparlator al occupantes del vehiculo, si isto es necessari, o informar le policia, si il ha turbationes. In cata traino il ha un homine in uniforme blau clar, le "Train Captain."Ille controla vostre billet ma non guida le traino excepte in caso de emergentia. Un tal caso occurreva quando in 1987 le regina veniva — duo minutas ante le tempore— pro inaugurar le ferrovia, e le computator, que estima le horario plus importante que le regina, refusava lassar le traino partir.
Tosto on comenciava leger reportos de discontento. Al horas de puncta le trainos esseva troppo plen. A un station, le passageros qui voleva descender non poteva sortir del traino a causa del affluentia de alteres qui voleva montar! Le causa de iste situation esseva que le ferrovia esseva troppo successose. Le servicio designate pro portar 1.700 passageros per hora nunc debeva portar plus de 2.000 passageros per hora. On calculava que al anno 1993 le numero de passageros per hora attingerea 15.000. Que facer?
Le administration del ferrovia ageva rapidemente. In 1990 on habeva jam prolongate le platteformas pro acceptar trainos de duo wagones accopulate. On habeva commandate nove vehiculos, simile al primes ma con portas plus commode, construite in Grande Britannia e Belgica. Software novelle pro le computator, del typo Seltrac utilisate in Vancouver, permittera que le trainos curre plus frequentemente sin impericular le securitate. In loco de un traino omne 7,5 minutas, capace de portar al maximo 260 pasageros, il habera un traino omne 2 minutas de duo wagones accopulate capace de portar al maximo 568 passageros. On calcula que post iste meliorationes le ferrovia, utilisante 80 wagones in loco del prime 11, essera capace de portar 18.000 passageros per hora, quasi le mesme capacitate del metro.
Le rete del ferrovia legier Docklands es in plen expansion. In responsa al planctos del homines de affaires, qui voleva ir al centro financiari de London — solmente touristas vole ir al Turre de London — on ha construite al west un tunnel al station Bank. On construe actualmente un longe extension al est a Beckton, e on plana un extension in tunnel sub le Tamisa que permittera le habitantes de Greenwich e Lewisham servir se del ferrovia.
(Per Brian Sexton, publicate in Panorama, No. 5, septembre-octobre, 1992)
LE CEREBRO E LE SEXUALITATE HUMAN
SUA: Recercatores ha trovate un nove differentia anatomic in le structura del homines homosexual e heterosexual, un discoperta que appoia le theoria que le orientation sexual es establite per le natura.
Le scientistas american Laura Allen e Roger Gorski del Schola de Medicina al Universitate de California a Los Angeles (UCLA) reporta que in le studios de autopsias illes trovava un structura cerebral appellate le commissura anterior, le qual es 34% plus grande in homines homosexual que in le cerebros de heterosexuales.
Lor discoperta, diceva Allen, adde importantia al theoria que le orientation sexual non es un question de selection, ma de un function del designo o del developpamento biologic.
Isto appoia multo al concepto que le preferentia sexual non es un factor del ambiente. Illo non appare in le infantia ma ante le nascentia o un pauco postea, dice Allen.
In un nove studio publicate in augusto, 1922, in le Proceedings of the US National Academy of Sciences, Allen e Gorski mesurava le grandor del commissura anterior in le texito removite ex le autopsias de 34 homines homosexual, 25 homines e 84 feminas heterosexual.
Allen diceva que le region del commissura anterior era clarmente plus grande in le homosexuales que le heterosexuales pro un factor de 34%. Le structura del region presso le homosexuales era 18% plus grande que in le cerebros del feminas heterosexual. Ma iste 18% dispareva quando illo era adjustate statisticamente pro le differentia del peso cerebral inter homines e feminas. Le differentia inter homosexuales e heterosexuales, dice Allen, es totevia multo real.
Le commissura anterior es un structura de cellulas nervose que connecte le hemispherios sinistre e dextre del cerebro presso al fundo del cranio. Gorski diceva que le function precise es incognoscite, ma on pensa que illo porta signales inter le duo medietates cerebral.
Robert Brag, porta-voce pro le gruppo de Fortias national de homosexuales del SUA, diceva que le studio appoia a su credentia que le natura creava nos justo como nos es, e il ha necun ration a reparar nihil, proque nihil es frangite. Isto appoia al assertion que on ha nascite assi.
(Per Richard W. Sorfleet, publicate in Panorama, No. 6, novembre-decembre, 1992)
HOMINE REFRIGERATE
Austria: In le anno passate on trovava in le Alpes un cadavere mumificate de un viro. Illo jaceva circa 5.300 annos in le glacie eternal. Le corpore del homine esseva— e es — ben conservate. Ille habeva con se sagittas in un flechiera e un hacha de bronzo. In un sacco de corio de un cervo ille portava lapides a facer foco. Le corpore, que on poneva a in un refrigerator specialmente construite, se trova in le Instituto de Anatomia a Innsbruck.
(Per Jerzy Dembicki, publicate in Panorama, No. 6, novembre-decembre, 1992)